掃呢頁CODE去手機

2018年2月8日 星期四

blue blood大佬醫風濕 [壹週刊 - 1457 - 財經] __,M1,

王穎妤有位風濕科醫生大佬王紹文。中環人語blueblood大佬醫風濕天氣凍,老人家風濕發作,要搵風濕科專醫,唔講唔知blueblood王穎妤有位專醫風 ...






王穎妤有位風濕科醫生大佬王紹文。

中環人語

blue blood大佬醫風濕

天氣凍,老人家風濕發作,要搵風濕科專醫,唔講唔知 blue blood王穎妤有位專醫風濕嘅大佬王紹文醫生。

王醫生自認是全港第十一名風濕科醫生,細妹嗲功了得,阿哥對病人都好親切㗎,好鬼好傾,除咗講病況,似乎對投資更加熱衷,王醫生對做醫生嘅前景有點灰暗,仲話家陣有 AI人工智能同病人做醫生配對,唔需要專程上門睇醫生,佢都好緊貼市場脈搏,同病人對話中都講起「平安好醫生」,仲鼓勵病人多啲返大陸睇吓最新嘅經濟發展,搞到上去睇風濕嘅婆婆,以為同經紀佬傾緊偈,睇真啲平保旗下正分拆出來上市嘅「平安好醫生」,由前高盛私人銀行家 Eddie Law持有 7.91%, Eddie Law同純官友好,王醫生會否透過哎吔大舅爺關係優先認購到呢隻「平安好醫生」?此乃真正大茶飯,同你睇症收幾千蚊真係蚊髀同牛髀。聽講跟過大劉嘅 blue blood唔單只搞藝術搵銀,好似劉太甘比咁,識得投資恒大地產,仲執到啲咁喎!咁呢次「平安好醫生」上市,應該又係一個搵錢好機會





王穎妤





由平安保險分拆出來的平安醫療科技,主要業務就是平安好醫生。

順德佬撐籮友





順德聯誼會有不少重量級會員,如李兆基、蔡伯勵及鄭裕彤後人,會所是自置物業之餘,手頭股票更值三千七百多萬,是城中富貴聯誼會之一。

位於中環恒生銀行總行旁邊嘅順德聯誼總會唐樓外表殘舊,呢啲正所謂「禾稈冚珍珠」。早排開會董會議,揭開盤數睇,以 1月份收市價計聯誼會手持一堆股票市值三千七百幾萬元,以股數計揸得最重貨嘅竟然係中電( 2),其次為順德鄉里鄭裕彤家族旗下嘅新世界( 12),可惜買入時間係 97年 4月股市瘋漲之際,購入價起碼 50蚊一股,順聯會坐艇到鄭裕彤騎鶴西去,股價都未返到家鄉,所以唔好因為是順德籮友(順德話即老友)就要去買籮友嘅股票,有口痕會董提出,何不換馬至碧桂園( 2007)?話晒入咗恒指成分股,兼且背後老細楊國強都係順德佬,但前車可鑑,有時盲撐鄉里搞到坐艇,真係坐到籮柚都扁埋。





順德聯誼會九七年購入新世界股票,坐艇至今。



369傻人有傻福

永泰地產( 369)揸住灣仔 W Square,去年吸引唔少 deep-pocketed嘅投資者垂青,可惜呢隻 369管理層鄭氏家族好鬼老實,雖然冇興趣但都唔識出吓通告公告天下,話俾人知有人想「溝」我,起碼刺激吓股價嘛。激到揸咗貨嘅基金佬扎扎跳,今鋪卒之肯賣啦,以$28.5億出售予「收租王」永倫集團,不過基金佬依然氣頂話:「如果唔係買咗塊中環貴地,借唔到咁多錢,你估班友會賣咩?」咁個價好唔好先?基金佬話:「好!買嗰個係傻㗎,又冇重建價值,回報率得 1.8%。」去年 369以 116億元同資本策略( 497)投得市建局中環卑利街同嘉咸街交界地盤,之後就要賣荃灣永南貨倉及灣仔 W Square,難得有傻人同永泰接貨,咁又怕咩傻去啃塊貴地呢?





位於灣仔 W Square並沒有重建價值,以交易價計,回報率只有 1.8%。





永泰地產由鄭維志(後)及鄭維新(前)兩家族持有。





去年永泰地產與資本策略以$116億投得中環卑利街地盤。

中坑福臨門「認頭」

有位即將步入晚年嘅中坑闊佬,上個禮拜收到九龍福臨門 call,問佢「認唔認頭」,唔好搞錯,唔係搞大咗人家個肚要認頭,而係福臨門入面專門四出搜羅野味嘅專家,班到條野生花錦膳喎,呢位中坑收到電話欣喜若狂,拿拿臨認頭,整個川芎白芷燉花錦鱔頭湯,中坑話:「以前邊輪到我去認頭吖?梗係 call咗何添或者恒生班老嘢先啦,終於都輪到我喇。」但有喜亦有悲,何解?啲識食嘅伯父走吓一件,走吓又一件,冇乜幾個剩先輪到佢,所以佢都驚驚哋,諗起有時喺深水灣波會或者遊艇會開車出來,經過跑馬地墳場見到副對聯「今夕吾軀歸故土 他朝君體也相同」,言猶在耳,此君又收到另一間高級食肆嘅電話,話某肥嘟嘟富豪同條女食剩咗半隻野生山瑞,問此君有無興趣 underwrite埋嗰半隻,中坑話:「包唔到女咪包銷埋隻山瑞。同啲老友去擦餐勁囉!」但係呢位中坑不願暴露其身份,佢話:「容乜易個個叫我請食飯㗎!」





呢位中坑「認頭」之後,叫大廚燉兩鍋川芎白芷花錦鱔頭湯大宴老友,其中一人喝過後說:「三十年來未飲過咁正嘅湯呀!」





富豪飯堂福臨門有專人四出搜羅野味,迎接呢個寒冬。

撰文:宗菁華


鍾意就快D Share啦!