2018年2月8日 星期四

自爆從未缺過愛情, 42歲佘詩曼唔憂嫁:唔會委屈自己 [壹週刊 - 1457] __,佘詩曼,M1,

娛頭自爆從未缺過愛情,42歲佘詩曼唔憂嫁:唔會委屈自己佘詩曼入行22年,攞過兩屆視后,有「港劇女王」之稱的她,事業一帆風順,不刻意公開另一半的阿佘自爆 ...






娛頭

自爆從未缺過愛情, 42歲佘詩曼唔憂嫁:唔會委屈自己

佘詩曼入行 22年,攞過兩屆視后,有「港劇女王」之稱的她,事業一帆風順,不刻意公開另一半的阿佘自爆從未缺過愛情,但曾經為事業放棄一段可以開花結果的感情。尚差三個月就滿 43歲,阿佘不心急封盤,更不會為結婚而結婚:「我以快樂行先,唔會委屈自己。」

隨時閃婚

成功女人去到某個年紀,仍是單身,很容易為了想嫁而降低要求。還有三個月,佘詩曼踏入四十三歲,她可會行這一步?「真係唔知喎,因為可能每過幾年嘅諗法都唔同,隨住年紀,我相信諗法都會改變,但以前同而家,我都係以快樂行先,唔會委屈自己。」只要是對的時間遇上對的人,會閃婚嗎?「我唔排除㗎,有得閃就閃」





媽咪早年移居夏威夷,近年經常留港,跟阿佘感情要好。



希望遇到他

未有着落,阿佘一點都不擔心,更沒有結婚壓力,她說:「有壓力其實都無用,其他人成日話每個階段做唔同嘅嘢,想要唔同嘅嘢,其實我覺得每一日都係做緊唔同嘅嘢。雖然我花咗好多時間喺事業上,但其實我係無缺過愛情嘅,只係未遇到一個我認為適合付託終身嘅人,但我又唔會為咗結婚而結婚,因為我覺得自己嘅快樂最重要,希望可以遇到佢。」媽咪有冇催婚?「媽咪反而無乜所謂,佢成日都話你開心就得啦,因為 is your life。」







阿佘喜歡小朋友,但未想過雪卵待用,堅持順其自然。





在電視台相交的一班好姊妹,除阿佘外,其餘六位都已經結婚有家庭。

結婚白頭到老

九七年香港小姐季軍,阿佘有身材有樣貌,性格爽朗不失溫柔,是不少男人心目中的女神,既然大把人追,不缺愛情,今日幾乎乜都有的阿佘,揀老公的基本條件是什麼?「因為人就係咁,當你有麵包時就想有愛情,有愛情又想要麵包,當有麵包又有愛情時,又會對身邊人有好高要求,所以唔會建基於經濟上,應該係兩個人嘅溝通,或者思想目標都係同一個方向。因為要同一個人一齊生活,係一個好大決定,我比較老土,我覺得結婚應該係白頭到老,我希望真係搵到一個 perfect match,同佢一齊係開心嘅。」

陳松伶美國雪卵

將踏入 43歲的佘詩曼,曾有考慮雪卵,為日後孕育做準備。圈中亦有年屆超齡產婦的女藝人,嘗試雪卵。







11年陳松伶下嫁細自己 8年的張鐸,一直未有所出。去年 47歲的她接受本刊訪問時,透露婚前曾做過雪卵。「結婚初期,我們在美國有做婚前檢查,婚前檢查後一、兩個月,已經在美國開始做精子及卵子的檢查,並做一個儲存。」





前年已有一子的李嘉欣,亦傳出為追個女,一早雪定卵子,事後她說:「唔知過期未,但冇計劃實現件事,順其自然。」

有人提議雪卵

女人年過四十,有事業有金錢沒男人,又很喜歡小朋友,就會想辦法「單性繁殖」下一代,醫學昌明,有人會找代母,亦有人會雪卵,以備需要時可用,阿佘坦言不是沒有考慮過。

「我鍾意小朋友,但而家同以前有少少唔同,要培育一個小朋友好大責任,或者係競爭好大,比成年人社會競爭更大。有人曾經叫我咁樣做(雪卵),但好似話會突然間痴肥一、兩個月,唔知係要打針定點樣,總之要養好身體好健康,有充足營養,通常都會肥十至廿磅,我暫時未有空閒時間,容許去做呢件事,都係順其自然。」

入行廿二年,阿佘有沒有試過為了事業而放棄一段會開花結果的感情?她說:「有,但又唔算係完全為事業而放棄,仲有其他因素。兩個人一齊好講緣分,我相信個天會安排最好嘅路。喺事業,我好幸運,希望未來感情路上,都係個幸運兒!」







在無綫多年,攞過兩屆視后。





演技毋庸置疑。





今時不同往日,阿佘外出工作,都有四、五個助手貼身服侍。

塊面流血照拍落去

一六年離開無綫後,開了「佘詩曼工作室」,主力發展電影及內地市場。阿佘近年在不少國際賽事奪過視后,內地亦有相當知名度,現在外出工作總有四、五個助手包圍着。

「我好享受而家嘅狀況,比起以前,自己已經逐漸將腳步放慢,我仲未搵到退休原因。不過今日唔知聽日事,可能聽日突然間唔想再做嘢,跟住咪退休囉,唔知㗎,每日都唔知自己想點。」她說。

畢竟拼搏多年,她也試過攰極想放棄:「梗係有啦,攰吖嘛,攰就會想放棄,因為體力不足同埋病,我係一個幾容易受傷嘅女人,拍攝時成日都會受傷,受傷後就覺得自己唔得㗎喇。試過塊面流血,點樣繼續拍落去?有好多嘅情況,無辦法,好似後面有一百個人推住你向前行,頂頂吓又頂得到,又 OK喎,咁咪過咗囉,我始終都係好鍾意工作,先會有呢個意志力同熱誠,我覺得自己好幸運。」







阿佘回憶當年媽咪病重入院做手術,她身在北京頒獎禮未能陪伴身邊,十分無奈。





首次在零下 21度的哈爾濱拍戲,阿佘更要講俄羅斯對白。





在內地人氣急升,早前上真人騷煮嘢食,睇得又食得。

男人緣

阿佘有樣有身材,性格爽朗,但又不失嬌嗲,異性緣由出道至今冇減弱過。入行廿二年,傳過的緋聞不多,她承認的戀情,亦只有陳浩民與鄭嘉穎。

陳浩民

02年,拍攝電影《情緣汽水機》擦出火花,戀情維持四年後,因男方頻被踢爆偷食而分手。

鄭嘉穎

07年,阿佘與鄭嘉穎合作《法證先鋒Ⅱ》互生情愫,但當時男方未與周麗淇正式斬纜,關係未敢進一步。至翌年年中,回復單身的鄭嘉穎,被網民踢爆冒住八號風球帶阿佘返家,「佘穎戀」曝光,但拍拖一年後分手。

張智霖

00年,剛入行的阿佘與張智霖合作拍《十月初五的月光》,劇集大收兼成為銀幕情侶,更有傳二人曾過電。

吳卓羲

06年,有指二人合作拍攝《歲月風雲》時暗撻,更傳阿佘買近 20萬的名錶及訂了價值二百萬的保時捷跑車給他。

我恨是演員

父親在她小時候離世,佘詩曼跟母親感情要好,早前演出內地真人騷《說出我世界》,她說有年出席北京頒獎禮,早已移居夏威夷的媽媽入醫院做手術,她也未能陪在身邊。一直自覺幸運以演員為職業的她,突然十分討厭演員身份。

「媽咪有事唔可以即刻飛過去,猛問自己點解咁無用,作為女兒做少少嘢都唔得,好彩媽咪大步𨂾過無事發生。又試過拍《 Fall in Love》拍咗二十四小時,到最後一日,一定要將任務完成,無論天光天黑廠景外景都要完成,最後一個 shot仲要吊威吔,吊到上二樓咁高,之後要好型好筆直咁嘅甫士落地,我係好攰同好驚,因為啲威吔拉到咯咯聲。感覺就好似靈魂同肉體分開,我吊喺上面嘅時候,就諗咁辛苦為乜?我都係一個普通女仔,但當拍完見到作品出街,係自己鍾意嘅嘢,就唔會記得。」她說。







今年 42歲的阿佘,多年來身材、樣貌幾乎無變。





拍《棟篤特工》,黃子華事前要求阿佘不能做花瓶,令她十分感動。





跟梁家輝首度合作,她說對方是個好對手、好前輩,經常提點她。

感激黃子華

阿佘近日完成在哈爾濱取景,與影帝梁家輝首度合作的內地電影《西伯利亞風雲》,返港又忙於為電影《棟篤特工》宣傳。提到跟梁家輝合作,阿佘自言奉獻了很多第一次,她說:「第一次去咁凍嘅地方拍戲,最低氣溫去到零下二十一度,第一次同家輝哥合作,第一次接觸日本導演,又第一次用俄羅斯話講對白,所以喺拍攝前做咗好耐功課,同埋亦都好緊張!佢(梁家輝)俾咗我好大力量,因為佢一埋位就已經好入戲,連帶我都好投入,同埋佢會提點我,係好好嘅前輩對手。」至於男神黃子華,阿佘說:「我實在好感激佢,佢講到明唔要佘詩曼做花瓶,我有戲演,亦帶動到成個故事。」

億萬筍盤





西貢雙連獨立屋。

42歲未封盤的佘詩曼,身家億億聲,養得起自己有餘。

一零年返內地賺人仔,戶口「水浸」,將賺到的彈藥返港掃磚頭,靠自己舖定冇憂路。

現時她手持 13年以七百多萬買入的昇御門,及當時市值三千六百萬的跑馬地紀雲峰,到 15年再出擊,豪擲三千四百多萬購入西貢雙連獨立屋,與媽咪一人一屋,既有自己空間,又可互相照應。

前年她再掟千四萬入貨,睇中何文田皓畋,以現時市值,單是浮面物業,阿佘已是有過億磚頭的女神。

撰文:海山

攝影:黃志明

化妝; Katherine Lo

髮型: Lorraine Lam@ Hair Culture

服裝提供: Maje& Claudie Pierlot

場地提供: ClubONE時尚康山


鍾意就快D Share啦!
Related Posts Plugin for WordPress, Blogger...