今晚大台台慶頒獎禮，嚟到「最受歡迎電視男角色」同「最佳男主角」，就由楊怡同周麗淇現身頒獎，「最受歡迎電視男角色」由馬國明憑《降魔的》奪得，「最佳男主角」由連繽三屆提名嘅王浩信憑《踩過畀》奪得。
王浩信先同同劇拍檔張振朗擁抱，講到感言佢就話：「之前如果你撩我，我會即刻stop，但我今日唔會，因為我知下一個應該都唔使講住，我以為我唔會咁激動，因為我喺TVB工作都每一日好似攞緊獎，因為我每一日都做緊我鍾意嘅嘢，就係分享我生命，用角色感動大家。好多謝TVB，喺呢50年畀到好多喜、怒、哀、樂全球嘅電視迷包括我，以前細細個返到屋企，睇TVB睇閃電傳真機，畀咗無限嘅世界、無限嘅幻想白日夢畀我，令我每一日都好似好夢幻，多謝譚玉瑛姐姐、多謝包包、多謝Ben哥哥，你畀咗個非常美好嘅童年我。喺我成長過程中，多謝好多偶像，多謝周星馳同達哥、多謝劉德華同朝偉、多謝五虎將，你令到我想做到我夢想就係做好演員。」
講完點解會成為演員之後，王浩信又話：「由05年到今日，好多唔同嘅起起跌跌入面，好多謝扶持過我嘅同事、家人、朋友。首先我要多謝TVB8，因為喺我銀行得番雙位數時，C君你都知，我想喺櫃員機撳錢嘅時候，TVB8畀到機會我做音樂主持同綜藝節目，佢令我爆騷，多謝你。不過TVB8好快離開大家，不過唔緊要，跟住我要多謝樂小姐，佢畀機會我完成我理想，每一日去為我理想而憤鬥，好多謝教過我嘅前輩，Lisa姐、松哥、三哥、華哥、撈家、安仔郭晉安先生，特別係佢喺越南呢個旅程，啟發咗我好多演技上嘅嘢，多嘢合作過嘅監製、同事。」
最後又點少得屋企呢？王浩信話：「跟住我要多謝我屋企人，無論咩情況都好，你哋都畀到好多嘅愛我，無論我幾咁遍體鱗傷之下都畀到一個安全島我，多謝我Daddy、Mammy喺呢13年入面雖然我一蚊都冇拎過返屋企，但都畀我好任性咁繼續我工作。多謝太太YoYo，佢將我家庭、囡囡打理得非常之好。最後，爺爺今日我終於得到大家嘅認同。跟住我仲想講我要多謝幾位好朋友、fans。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
