歌手趙學而（學而）到油麻地為4月28日的紅館演唱會開新聞發布會，並由阮兆祥（祥仔）擔任主持，他笑言學而過往有些MV場面很激：「又錫又剩搞到我面都紅晒！」祥仔送上由卡式帶、CD及黑膠碟等製成的獎項，代表不同錄音器材都有學而的聲音。工作人員搬出三點式索女的紙版公仔的時候，祥仔笑說：「期待學而喺紅館都會有呢個Look！」學而即自嘲這樣穿會趕客，然後把頭拼到紙版公仔上拍照。
恨同王傑合唱
受訪時，學而坦言很開心：「好多朋友都話想嚟，我都有好多心儀人選，如果有梁朝偉，觀眾都會好開心，但要睇大家啲期，仲有王傑。（佢忙鬧人？）係咩？佢有火啫。」她指王傑在音樂上幫了自己一大把，而且近年在內地工作都有接觸對方，很想與他合唱《誰明浪子心》：「邀請咗，但佢啲期好密，上年佢宣布退隱後，啲期就一路排到今年年尾。都有少少擔心囉，如果佢唱唔到，希望都可以嚟睇。」至於劇集《皆大歡喜》的演員，學而則表示一定要請，亦很想邀請周潤發和葉德嫻等前輩來捧場，一同見證自己在音樂上的成績。
演唱會以女人成長為主題
至於會否加場？學而說：「未知，睇吓賣飛嘅情況點，但一場OK喇，貴精不貴多。上次九展我都係預一場，但唔知點解啲飛賣得咁緊要，於是好急咁加多一場。」她又預告屆時會性感現身：「上得台啲衫會比平時靚啲。（三點式？）咁瘦嘅人着，你都嚇一嚇啦，唔好睇㗎！」她坦言正在努力增肥和操肌中，希望穿衣服好看一點：「但我咁多年食極都係咁，嘥晒啲米飯。造型方面未落實，好多嘢都改緊，仲執緊Rundown。」她透露演唱會以女人的成長為主題，想令女士們有多點共鳴：「由我入行嗰種少女心態，對人生同愛情嘅睇法，一路成長到結咗婚，希望好似女人嘅故事書咁呈現出嚟。」
叫朋友自己買飛
問到老公可會上台？學而笑指他不懂說話：「佢會全程陪伴我。（幫你打點？）一定要啦，幫手招呼朋友。換衫就唔好搞喇，有專人會做。佢都醒嘅，雖然唔係做呢行，但都知道要畀足夠時間我休息。」她指老公已幫手處理朋友們的訂飛，飛債暫時不多，因為她已在社交平台叫朋友自己買，自己亦不想留太多飛，希望多留一些飛在市面賣。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
