掃呢頁CODE去手機

2017年12月3日 星期日

英超Fever:【英超Live】迪基亞堅神級 曼聯爆廠 __,曼聯,

又係周六,又有英超睇喇喂!今輪最大話題梗係仙魔大戰啦,喺呢場矚目激鬥之前仲有唔少波睇,車路士、熱刺、利物浦等勁旅都會登場,《東網體育》會追到實,你又點 ...




又係周六,又有英超睇喇喂!今輪最大話題梗係仙魔大戰啦,喺呢場矚目激鬥之前仲有唔少波睇,車路士、熱刺、利物浦等勁旅都會登場,《東網體育》會追到實,你又點可以錯過!?

【03:25】【全場完】阿仙奴 1:3 曼聯

今季英超其中一場經典賽事,曼聯作客砌低阿仙奴贏出「仙魔戰」!兵工廠查實發揮唔曳,可惜開賽初段,兩名守衞哥斯尼及梅斯達菲後防派膠,紅魔早早領先2球。之後幾乎全屬主隊天下,拿卡錫迪、A山、比利連等連環埋門,都一一畀迪基亞神救。雖然拿卡錫迪追番1粒,但連格稍後再建一功,曼聯就算有保羅普巴直接領紅,阿仙奴出晒四大前鋒都未能入波,曼聯贏3:1完場。

【03:17】

89分鐘,達美安於禁區內踢跌韋碧克,但球證冇畀12碼

【03:12】

85分鐘,韋碧克門前一頂鑿高

【03:02】

74分鐘,普巴一腳踩落比利連隻腳度,球證直接畀紅牌趕佢出場

【02:54】

A山禁區外一抽,又過唔到迪基亞

【02:53】

63分鐘,曼聯打反擊成功,普巴於右路恰死哥斯尼傳中,連格門前輕鬆搞掂,紅魔又領先2球差距

【02:45】

56分鐘,拿卡錫迪近射過唔到迪基亞,A山衝前一射睇怕入硬,但竟然又畀迪基亞用腳叉走

【02:39】

兩軍鬥攻勁彩,連格射門中楣,馬迪爾補中省中蒙利爾;轉頭伊禾比近射,又畀迪基亞救到!

【02:38】阿仙奴 1:2 曼聯

49分鐘,阿仙奴火速追番1粒!兵工廠藍斯同拿卡錫迪突破越位接應傳送,前者第一時間彈畀拿卡錫迪一射入網

【半場完】阿仙奴 0:2 曼聯

阿仙奴今仗後防遊魂,搞到半場落後兩粒。先有哥斯尼傳送被截,後有梅斯達菲扭波出事,兩次犯錯都足以致命,曼聯憑華倫西亞及連格連入兩球。其實兵工廠今仗前場球員發揮不俗,尤其係拿卡錫迪,入唔到波堅唔抵,迪基亞於半場末段連環神救,阿仙奴未能追番粒勁慘,換邊後睇吓槍手可唔可以扭轉劣勢。

【02:14】

比利連右路窄位狂抽靚爆,迪基亞又飛身神救,哥拉辛拿斯跟手再射,又過唔到迪基亞

【02:06】

拿卡錫迪右路出波禁區頂,奧斯爾第一時間一抽,畀迪基亞接實

【02:02】

32分鐘,拿卡錫迪於禁區內一射中楣,格列沙加補射又搞唔掂,阿仙奴始終追唔番一粒

【01:59】

奧斯爾右路起左腳妙射罰球,楊格救空門成功

【01:50】

拿卡錫迪門前被力壓下仲係射到波,但又過唔到迪基亞

【01:41】阿仙奴 0:2 曼聯

11分鐘阿仙奴又派膠,梅斯達菲後場扭波被截,馬迪爾禁區交連格,連格門前射入,紅魔贏到2粒!

【01:32】阿仙奴 0:1 曼聯

4分鐘曼聯就開紀錄!哥斯尼後防交波被截,華倫西亞交普巴,普巴質番畀華倫西亞,後者於右路射穿蒙利爾同施治大細龍門入波!

【00:55】

「仙魔戰」陣容已出!本身話因傷缺陣嘅拿卡錫迪,將會正選上陣,拍A山同奧斯爾於前場攻堅,阿仙奴攻力唔使懷疑;曼聯作客勁旅一向比較保守,今仗收起福仔,搵連格於前場跑動,加上出3中堅域陀連迪路夫、基斯史摩寧、馬高斯盧祖,打守勢波時加埋華倫西亞同艾舒利楊格,可以擺5人防守,睇嚟呢場都係攻防戰!

阿仙奴正選陣容

門將:33施治

後衞:6哥斯尼、20梅斯達菲、18蒙利爾

中場:24比利連、8艾朗藍斯、29格列沙加、31哥拉辛拿斯

攻中:11奧斯爾、7阿歷斯山齊士

前鋒:9拿卡錫迪、

曼聯正選陣容

門將:1迪基亞

後衞:2域陀連迪路夫、12基斯史摩寧、5馬高斯盧祖

防中:25路爾斯華倫西亞、6保羅普巴、31尼曼查馬迪、18艾舒利楊格

攻中:14連格、11安東尼馬迪爾

前鋒:9盧卡古

【00:51】全場完 白禮頓 1:5 利物浦

利迷今次唔使食救心,都要多得白禮頓冇乜料到。利記今場青風送爽,反擊順到爆,古仔個球「估你唔到射球」真係精彩!

【00:45】白禮頓 1:5 利物浦

利記又閃電整多粒,古仔引球推入禁區,半傳半射搞到李維士鄧克OG。鄧克連續兩場擺老烏,堅係灰!

【00:43】白禮頓 1:4 利物浦

利物浦87分鐘整多粒,古天奴主射罰球,出其不意射地波,主隊人牆跳起晒,門將估唔到古仔會咁射,一啲反應都冇

【00:29】

73分鐘,白軍右路二傳禁區內,格連梅利快腳勾射,僅僅柱邊出界,紅軍執番身彩!

【00:25】

白禮頓罰球斬入禁區又做成險象,紅軍守衞解圍不遠,主隊一轟唔中目標

【00:22】

65分鐘,古天奴於禁區外靚射,省到白禮頓守衞隻手彈出,球證話冇事

【00:06】白禮頓 1:3 利物浦

神軒禁區犯天條,球證畀12碼白禮頓,梅利主射搞掂追番粒

【00:04】白禮頓 0:3 利物浦

換邊後4分鐘,白禮頓本來有入波機會,但浪費大好良機。你唔入,利記即打反擊,沙拿自己一個人引晒白軍守將,畀個靚波法明奴,後者一轟又破網!

【23:46】半場完 白禮頓 0:2 利物浦

利記憑住閃電式2分鐘連入2球,半場領先緊海鷗。主隊組織不時斷纜,除咗格連梅利個腳差啲開齋之外,都冇乜有威脅嘅埋門,半場真係要諗諗計點翻身

【23:31】白禮頓 0:2 利物浦

個頭比賽先重開,紅軍搶到個波即時打反擊,古天奴左路地波送去遠柱,法明奴一射又得手,閃電拉開距離

【23:30】白禮頓 0:1 利物浦

利物浦31分鐘憑住角球攻勢,「中堅簡」衝近柱勁頂破網,先開紀錄

【23:17】

白軍喺前場搶到個波之後搞咗一輪終於出到個冇乜力嘅波,利記一班守住前柱嘅球員竟然冇人攞到個波,畀格連梅利輕鬆控定再射,好在佢起腳個時有紅軍球員拍埋去,令到佢射唔中目標,唔係利記就大鑊喇

【23:05】

利記開波5分鐘,不停出現機會,法明奴連續兩次頭槌攻門都無功而還

【23:01】

利物浦開波1分鐘即有機會,穆罕默德沙拿射門畀白軍守將擋出

【22:40】

接住11點英超,最有睇頭之戰係利物浦作客「海鷗」白禮頓。紅軍續由腳風超順嘅穆罕默德沙拿於前線擔大旗,拍住羅拔圖法明奴同菲臘比古天奴攻堅,但今仗竟然起用中場安利簡恩客串中堅,隨時成為計時炸彈。

白禮頓正選陣容

門將:1馬菲賴恩

後衞:2般奴沙托、22沙恩杜菲、5李維士鄧克、3邦治

中場:11安東尼洛卡特、6達爾史堤芬斯、13柏斯高哥斯、24戴夫保柏、37伊薩亞布朗

前鋒:17格連梅利

利物浦正選陣容

門將:22米洛列特

後衞:66阿歷山大阿諾特、23安利簡恩、6洛夫雲、26安德魯羅拔臣

中場:7占士米拿、14佐敦軒達臣、5韋拿杜姆

前鋒:11穆罕默德沙拿、9羅拔圖法明奴、10菲臘比古天奴

【22:21】全場完 車路士 3:1 紐卡素

車仔雖然先失1粒,但靠艾華路莫拉達建功及夏薩特省2粒,喺主場反勝3:1,連盃賽在內近6仗錄5勝1和,重上正軌。

【22:02】車路士 3:1 紐卡素

域陀摩西斯殺入禁區被馬特列治踢跌,球證直指12碼,夏薩特操刀射成3比1。

【21:43】

夏薩特遠射省中紐卡素後衞,差啲改變方向入網。

【21:17】半場完 車路士 2:1 紐卡素

車仔半場反超前2:1,主要都係紐卡素突然跌Watt,表現走晒樣畀車仔有機可乘。

【21:07】

真禾特38分鐘就試一試腳風,可惜遠射唔中目標

【21:02】車路士 2:1 紐卡素

域陀摩西斯右路出波,莫拉達壓贏對手頂入,車仔反超前。紐卡素踢完頭個15分鐘之後極速跌Watt,睇到肥賓勁躁!

【20:50】車路士 1:1 紐卡素

車仔落後一球積極搶攻有回報,艾斯派古達長傳入禁區,客隊守將解圍不遠,夏薩特後上笠死紐記門神,真係Fit到爆呀!

【20:47】

車仔差啲追和!法比仔一個50碼長傳畀夏神,後者一控一射都好靚,不過卡爾達路出得切封位,擋出夏神射門

【20:41】車路士 0:1 紐卡素

開賽13分鐘,紐卡素一個高空波揼落車仔禁區頂,引發混戰一輪,個波入咗禁區,高圖爾斯猶豫之際閂咗個波畀杜韋加爾,後者一句唔該就射入!

【20:15】

車路士率先出戰,喺主場對紐卡素,領隊干地精銳盡出,勢要攞足3分緊追佔據聯賽頭2位嘅雙曼!喜鵲近期表現唔多掂,想攞到分就要睇肥賓有冇妙計喇。

車路士正選陣容

門將:13泰拔高圖爾斯

後衞:28艾斯派古達、27安達斯基斯坦臣、2魯迪格

中場:15域陀摩西斯、7尼高路簡迪、6真禾特、4法比加斯、3馬高斯阿朗素

攻中:10夏薩特

前鋒:9艾華路莫拉達

紐卡素正選陣容

門將:26卡爾達路

後衞:19查維文基路、20科利安利祖尼、2施亞蘭奇勒、18贊素梅賓巴

防中:10迪亞美、23米基爾馬連奴

中場:11馬特列治、17艾約斯佩雷斯、7積及梅菲

前鋒:9杜韋加爾

東網體育同你追實體壇每個精彩時刻!

http://bit.ly/2ecTF2A  


來源 source: http://hk.on.cc
鍾意就快D Share啦!