2017年12月23日 星期六

無綫50周年!經典劇集畫面你記得幾多? __,無綫,

勁正!今年係TVB50周年,唔經唔覺無綫已經陪觀眾過咗半個世紀!而喺呢50年,TVB除咗捧紅唔少巨星,仲造就咗唔少神劇,當中好多難忘嘅場口同畫面到依家 ...


勁正!


今年係TVB 50周年,唔經唔覺無綫已經陪觀眾過咗半個世紀!而喺呢50年,TVB除咗捧紅唔少巨星,仲造就咗唔少神劇,當中好多難忘嘅場口同畫面到依家都不時畀網民拎出嚟回顧,甚至連TVB嘅新劇都會用嚟致敬一番,果然係經典中嘅經典!

謝天華《神鎗狙擊》單手攀岩

要數神劇,梗係唔可以唔提TVB嘅警匪片啦,因為呢類劇集緊張刺激,加上有大量動作同爆破等場口,超級吸睛!而2013年嘅劇集《神鎗狙擊》就因為一啲角色神乎其技嘅身手,而被網民力捧成神劇!

劇集入面,謝天華飾演一個身手好好嘅神槍手,佢有型有款,加上可以一個打十個,成功迷倒萬千少女!而單係佢出場嘅一幕,就已經成為經典!皆因謝天華一出場就喺度攀緊岩,期間仲因為要接電話,而用單手捉住岩石添!單手爬山嘅謝天華喺冇任何安全措施嘅情況下,都可以Chok住咁講電話,簡直係挑戰人體力學嘅極限,難怪會成為網民心目中嘅經典

鄭嘉穎《鐵馬尋橋》失控咆哮

一套劇集要成功,好多時都係要靠天時地利人和,要劇情好、演員演得好,仲要對準觀眾嘅口味!但係有啲時候,可能只係一個表情,就足以令大家永遠都記住呢套劇!

2010年嘅劇集《鐵馬尋橋》,係一套講用武術重振家聲嘅民初劇,劇集搵嚟較少拍劇嘅元秋,加上有好多動作場口,同埋好多慘絕人寰嘅情節大派洋葱,成為當時嘅熱話!不過要講到最搶鏡嘅,相信就係男主角鄭嘉穎佢喺劇入面細個嗰陣畀人拐走咗,大個重聚之後又要為家族報仇,所以情緒非常複雜!當中佢失控落淚咆哮嘅一幕,更加放咗係主題曲入面,令觀眾每晚都聽到鄭嘉穎淒厲嘅叫聲,成功感動觀眾!好多網民亦Cap低咗呢個畫面,一嬲嘅時候就會用佢嚟表達心中嘅不滿,直到依家都不時會見到呢個經典畫面!

苗僑偉《賭場風雲》四條A

TVB歷年來都有好多破格嘅劇集,題材亦非常多變,當中2006年嘅劇集《賭場風雲》就係成功例子之一!

劇集少有咁以賭場做背景,加上有唔少好戲之人,好似宣萱、歐陽震華、許紹雄同苗僑偉等坐鎮,吸引好多觀眾追看!當中最經典嘅,就係苗僑偉所飾演嘅喬正初!佢喺劇入面係一個為咗贏而不擇手段嘅賭神,最後因為輪咗畀宿敵歐陽震華,而面臨崩潰!苗僑偉喺入面七情上面,面容扭曲到連眼都凸埋,最後因為接受唔到自己手牌咁好都輸,而爆出嘅一句:「我四條A!」,更加成為網民心目中嘅金句!而苗僑偉傳神嘅演繹仲被網民整成GIF動圖,不斷咁流傳!

馬德鐘《洪武三十二》鞭打本王

TVB嘅古裝劇一向有保證,有啲甚至受歡迎到翻拍完再翻拍,好似《十兄弟》咁,可想而知古裝劇嘅威力!而2011年嘅劇集《洪武三十二》,相信係網民心目中嘅經典古裝劇之一。

劇集講到明朝嘅帝位之爭,而且牽涉到錦衣衞同間諜等情節,相當緊湊!不過最深刻嘅,就係劇中有好多大膽嘅畫面,令觀眾大飽眼福。其中,飾演燕王嘅馬德鐘因為要令飾演沈千三嘅徐子珊相信佢係真傻,而赤祼上身,趴喺床上,仲要求徐子珊用皮鞭鞭打自己!可能因為意識大膽,超越咗一般嘅電視尺度,所以引起網民熱烈討論,仲令當中一句「本王罪孽深重,求你鞭打本王」成為咗金句添!

關禮傑《叛逃》跳天台

TVB50周年台慶劇《誇世代》早前熱播,劇中除咗以超誇張劇情同超強客串陣容做賣點之外,更加會拎番一啲自家劇集嘅經典橋段嚟「抽水」,當中最矚目嘅就係陳豪跳天台一幕!

其實呢個橋段係出自2014年嘅劇集《叛逃》嘅,劇入面關禮傑係一個訓練警員嘅教官,所以身手都有番咁上下。而其中一集,佢就同警員進行跨樓跳躍特訓。關禮傑首先助跑衝上天台邊,然後一跳就飛咗過去相隔成條馬路嘅對面天台!咁都未算最勁,劇入面第一次進行訓練嘅陳展鵬只係急速行咗幾步,就成功飛咗過對面天台,簡直能人所不能!

而喺《誇世代》入面,陳豪就冇咁好身手啦,佢雖然勉強都叫跳到出去,但最後就好不幸咁跌咗落樓!

劉江《拳王》講呢啲

近年好多題材「貼地」嘅劇集,都會因為有共鳴而受得觀眾喜愛,近年嘅《降魔的》就係一個好例子!不過除咗劇情之外,原來演員嘅演出夠「貼地」都好重要!

藝人劉江就因為一個夠「貼地」嘅表情,而畀網民Cap圖,仲因為咁而成為咗網絡紅人!劉江喺2012年嘅劇集《拳王》入面,做咗一個靦腆笑樣,畀眼利嘅網民留意到,將入面嘅對白改咗做「講呢啲」,充分咁表達出呢個表情嘅深層意思,亦因為呢句說話成日都會喺現實生活中應用到,而被網民廣泛流傳!

而劉江喺呢句潮語爆紅之後,都有親身將金句神還原,就連喺攞「傑出演員大獎」嘅時候,旁白都用「講劉江,唔可以唔講呢啲」嚟介紹佢,證明呢句金句已經成為佢嘅代表作!

姚子羚《與敵同行》表哥眼

劇集之所以成功,演員固之然係重要嘅一環。若然演員本身有吸引力,自不然會吸引觀眾追看。不過人紅自然是非多,甚至引嚟網民嘅惡搞,最後成為網上熱話!

要數惡搞對象,藝人姚子羚都算係經典嘅一個,好多網民都會將佢嘅相改圖,刻意咁將佢對眼大幅度咁縮細,暗指佢眼細!而喺2008年嘅劇集《與敵同行》入面,就因為有網民用咗佢嗌表哥嘅一幕嚟改圖,而令姚子羚獲封表哥嘅稱號!「表哥眼」稱號一出,令網民更加瘋狂改圖,時至今日,每當姚子羚有新劇出,網上都會流傳嗰部劇集嘅「表哥眼」改圖,威力非常驚人!

而姚子羚面對住呢啲惡搞圖,都依然好大方,仲喺回應網民時自稱表哥,獲得一班網民大讚!

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!
Related Posts Plugin for WordPress, Blogger...