掃呢頁CODE去手機

2017年12月7日 星期四

【俠味道‧翁靜晶(12)】細訴與陳百強關係 難忘對方教Table manner __,翁靜晶,陳百強,

「生活靜靜似是湖水,全為你泛起生氣;全為你泛起了漣猗,歡笑全為你起」相信好多香港人,對《漣漪》並不陌生,有指呢首歌係陳百強為翁靜晶而寫。翁靜晶直認不諱 ...




「生活靜靜似是湖水,全為你泛起生氣;全為你泛起了漣猗,歡笑全為你起」

相信好多香港人,對《漣漪》並不陌生,有指呢首歌係陳百強為翁靜晶而寫。翁靜晶直認不諱,回憶嘅時候都嘴角泛笑﹕「佢話有首歌係寫嚟送俾我嘅,播俾我聽就係《漣漪》啦。陳百強係一個藝術感好強,好浪漫嘅一個人,如果有個鋼琴,你就真係暈㗎喇,佢可以即刻彈首歌出嚟,靚到呢,你好似成個人跌咗落一個好浪漫嘅仙境咁。」

在別人眼中,陳百強與翁靜晶或許是一對絕配,覺得佢哋曾經拍過拖,不過,事實係「冇」。翁靜晶話﹕「大家有啲兄弟嘅感覺,從來都冇追求過我,呢樣嘢就有啲失望啦。我都同佢講過,我話喂,識咗咁耐喇,你好似連一啖都未錫過我喎,咁佢就錫咗我額頭一啖,就出咗去同啲男仔一齊玩。」

翁靜晶形容與陳百強之間嘅感情好單純,大家話題都係食乜嘢、睇乜戲,聽咩歌。翁靜晶15歲幾時,陳百強曾經帶佢去卡地亞舞會,令佢畢生難忘,佢話﹕「我着咗條黑白嘅裙,好靚嘅,嗰次主要係介紹我俾佢爸爸識。我唔知點解,但係我又跟埋去,食嘢吖嘛。」當年嘅翁靜晶就係好大鄉里出城,陳百強要去唔同嘅餐桌招呼朋友,而翁靜晶就「戇居居」坐喺度食,佢話﹕「食到一半,佢突然攞咗個好似雪糕咁嘅嘢嚟,我就問Danny『食咁少嘢,乜咁快上甜品?』,佢話『欸(遮口)』呢個係用嚟嗽口,等你癖味,之後先食主菜。仲叫我食兩啖好喇,淑女係唔會食晒,我咪學咗咁樣嘅餐桌禮儀,Danny真係教咗我好多嘢。」

陳百強擁有翩翩公子嘅高貴氣質,且才華橫溢,可惜他在92年與世長辭,終年35歲。翁靜晶悼念故友﹕「如果佢一路活到依家,一定好努力去做運動,一定會係好顧自己形象,唔會好似我咁,由得自己咁肥,食咁多嘢。如果你話佢突然間喺我面前,佢第一句就會問『What happened?』會問我點解搞成咁,好肯定會係咁囉。雖然佢唔係度,但佢永遠係一個最靚最靚嘅影像。」

記者:嵐山、馮國康、倩宜

攝錄:馮峰、卓振輝

攝影:陳俊強



翁靜晶親自解答同陳百強的關係。 外界一直視陳百強同翁靜晶係金童玉女,覺得佢哋曾經拍過拖。
當年陳百強帶翁靜晶出席舞會,目的係想將翁靜晶介紹俾自己爸爸認識。 翁靜晶笑言,如果陳百強現時出現於自己面前,對方第一句同佢講嘅一定係:「What happened?你發生咩事?」 翁靜晶指陳百強係個藝術感好強嘅人,只要有個鋼琴喺度,佢就可以即場彈首歌氹你開心。

鍾意就快D Share啦!