賭王四房「數學天才」孻仔猷君同上個月被爆同少女標本袁紫僑(CoCo)分手一個月，話明係城中鑽石筍盤當然係搶手貨，火速被《蘋果》讀者爆料，目擊佢同28歲大陸超模奚夢瑤蜜遊東京，奚夢瑤已躋身巴黎名牌Chanel、LV同Dior時裝騷多年，又幫過Victoria's Secret行騷，猷君揀光算係更上一層樓，令唔少宅男「葡萄」。
猷君同奚夢瑤蜜遊東京就神神秘秘，不過噚晚女方忽然喺Ig貼咗一幅上海尚嘉中心嘅夜景相，本來普通夜景相都冇咩特別，不過最吊詭地方喺LED外牆上面，忽然有個紅色心心，同埋呢座大廈嘅主人係四太梁安琪嘅私人投資公司尚嘉嘅旗下項目，令人聯想係猷君玩浪漫示愛啦!
而奚夢瑤留咗「24」呢個數字，睇番佢對上一次貼一張白色枕頭相係10月12日，計番噚晚再出post就啱啱24日，猷君仲有畀「LIKE」，同留一個心心emoji回覆。
猷君除咗讀書叻，追女仔都好浪漫，以為佢哋公開喺Ig打情罵俏，但猷君今日刪走返個心心emoji。
《蘋果》嘗試搵過猷君同四太，猷君暫時未聯絡到，四太就睇完動新聞，佢話唔知個仔係唔係拍拖：「係朋友定女朋友唔知，自己太忙，冇聽到個仔話拍拖，其實男仔女仔後生仔呢個年紀應該拍拖。」
問到猷君疑似喺佢上海嘅商廈玩LED投射心心示愛，四太就話：「不嬲我哋大廈都會有唔同LED投射，唔同節日都有唔同主題，我都要問番。」
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|
