掃呢頁CODE去手機

2017年10月26日 星期四

800萬街坊股神:無股災 買滙豐 [壹週刊 - 1442] __,滙豐,股神,M1,

雷敏謙買股票只揸實股,自然是對自己揀股有信心,亦是為免手痕將實力股賣出。他多年前買入的股票,部分至今已升值數十倍,他為免沽出後要重新揀股,寧可留着收息 ...






雷敏謙買股票只揸實股,自然是對自己揀股有信心,亦是為免手痕將實力股賣出。他多年前買入的股票,部分至今已升值數十倍,他為免沽出後要重新揀股,寧可留着收息。(廖健昌攝)

壹號頭條

800萬街坊股神:無股災 買滙豐

逢七股災,過往三十年俱應驗,準過「秋官效應」。今年恒指由二萬一千點,升至二萬八千點。踏入十月,恒指升近一千點後突然煞停,正好在十月十九日(三十年前股災日)急插六百點,過百隻牛證被打靶。其後恒指反覆,本週一再跌近二百點,週二只窄幅上落。

是升還是跌?本刊找來已經歷多次股災的多位街坊股神,評論現時市況及入市心得。無論是藥劑師股神、荃灣巴菲陳、還是元朗股神,都睇好後市,並已鎖定心水股票;甚至直言,要回到二○○七年的三萬二千點,並無難度。

回想八七年股災,恒指由三千七百幾點,直插四百二十點,聯交所主席李福兆宣布停市四日。九七年十月,索羅斯狙擊港元,銀行同業拆息暴升至三百釐,恒指由萬三點於數天間跌至九千點。到○七年恒指高見三萬二千點後,一年間插至一萬點。港股這輪急回,是否股災前奏?

實名登記了二百多隻股票、市值約八百萬、長揸唔放的藥劑師股神雷敏謙,過往曾以十多元買入港交所、及以六十多元買入騰訊( 700),至今仍持有。他長線投資的回報跑贏不少坊間基金,對一七年股市他充滿信心,毫不擔心今年會有股災,「我知道好多人話逢七會跌,但我就話雞年唔會跌,我從來唔覺得雞年係差。九三年我買股票係賺足一倍,○五年都唔覺得係差。」

雷敏謙認為今次股市就算升至十年前股災的三萬二千點,亦很正常,「比起十年前,依家嘅公司賺錢能力強好多。」恒指由二萬一千五起飛,他認為今次的升勢並非泡沫,「依家股票銀碼比十年前大,但成交額無多到。我聽蔡陳葆心話,今年股市散戶好少參與,基金都搵唔到人接貨,所以比較硬淨。」





馬化騰(中)的騰訊股價由年頭未破二百,升到今日三百五十元,不少無貨股民都待它下跌入貨。(梁正平攝)





○七股災前雞犬升天,師奶都變股神,當時未有手機 app即時報價,眾人要爭着撳機看心水股走勢,逼滿半條街。

買新世界、信和





雷敏謙有股災貼士,他認為新世界、信和這類股票抗跌力比起李嘉誠的長實差,股災時可以低位吸納搏反彈。

若然股災無出現,他睇好人人看淡的滙豐( 5),「特朗普以往曾破產,唔係靠銀行佢死咗好耐。所以你見佢上台後放寬了銀行,八個月都無聽見佢罰邊間銀行。」即使股市要冧,他認為某些股可撈底搏反彈,「長實( 1113)、新鴻基( 16)嗰啲股,股災後唔會升一倍,因為你知誠哥有抗跌力,股災唔會跌得傷。但新世界( 17)、信和( 83)嗰啲,股災後低位可以翻足一倍,值得搏。」

但不論牛市還是股災,他大部分股票仍會繼續長揸,「買咗咁耐有份感情,好似偉易達( 303),東尼以前介紹,佢係歐洲手機一哥,我買嘅時候先係三蚊,今日股價已升至一百一十四元,加上利息高。又譬如 ASM太平洋( 522),永遠都係亞洲第一。呢啲股你不覺得需要賣出去,所以我啲貨係實股,無咁手痕!」

荃灣巴菲陳:短炒港交所





巴菲陳戰績彪炳,間中有些豪擲千萬買股的隱形富豪亦會找他吃飯攞貼士,所以找他亦要碰運氣。(梁正平攝)

荃灣街坊股神陳志強,略胖的身形配上一頭白髮,加上揀股了得,被冠以巴菲陳稱號。○七股災前扑中國壽( 2628)、湖南有色( 2626)等股票升值超過一倍。他預言逢七股災將會「斷纜」,雖然上週四急跌六百點,但認為只是調整,「除非北韓射個核彈出嚟,依家啲大行風險管理得好犀利,加上有中國咁大嘅經濟體撐住。」

騰訊、港交所( 388)這些股王,近年升幅不少,騰訊今年年頭一百八十元,現價已經三百五十元,巴菲陳認為騰訊長揸短炒皆宜,但港交所短炒更好,「你見到喺低價十蚊、八蚊橫行,就可以買,買十萬八萬,等佢一升,第一日升十蚊唔好放住,等佢第二日再升多五蚊先放,咁兩日就賺 5%。升幅無細價股咁大,但主要係安全。」他說炒股最主要是克服心魔,「炒股要克服貪心、怕死、沒有耐性,跌嘅話你驚唔驚。你又要怕死又無耐性,就咁沽咗佢就走寶了。」

股市轉勢都唔走





巴菲陳亦看好兩隻建滔集團的股票,認為創辦人作風踏實,而且積層板有手機概念,有進一步升值潛力。

就算有股災,他亦非常淡定,「我揀啲數據靚、管理好的公司。四月嗰時買咗長飛光纖光纜( 6869)同中國重汽( 3808)。中國重汽有德國人將科技投入,大陸貨櫃拖頭又成日要用,有損耗要換車,所以股價升咗倍幾。大陸有消息會發展 5G,長飛光纖食正條水,前景都好好,上星期四跌五百幾點,佢跌個九,第二日恒指升三百,佢彈番兩個幾,你話呢啲股去邊度搵。我轉勢先會走,唔係講股市,係業務轉勢,走咗我賺少好多呀!」

元朗股神:妖孽未出,股災未到





曾錦安炒股最愛以小搏大,兩個月前買騰訊牛證,由一毫升至八毫,他覺得比花百萬買正股好。

○七年買富智康( 2038)勁賺四倍贏百萬,擅長捉大戶心理的元朗股神曾錦安,肯定一七年無股災,「只係震倉。如果真係股災,個市係升唔番三百幾點,連三十點都上唔到。」他見到散戶暫時未入市,所以未有股災風險,「幾次股災之前都係個市升咗三、四輪,一街都係股神,我叫佢哋做妖孽,而且散戶急住衝入市,唔理後果只怕買唔到貨。依家散戶仲有戒心,大戶唔會出手,到你無防範,平時唔買股票嘅都入市,覺得股票好易賺錢,殺傷力先最大。」

細價股靠捉心理





元朗股神買的富智康,是「血汗工廠」富士康的子公司,自從○七年炒至廿五蚊後,股價一直停留在單位數字。(美聯社圖片)

曾錦安說玩細價股,最主要是靠捉心理,「我年幾前買隻中國軟實力( 139),由四毫升到個二,之後長期喺八毫徘徊,我就覺得有問題放咗,庄家點會俾散戶低價買,之後一齊賺。庄家睇中散戶買全年最低位搏反彈,點知今日低位,其實係明日高位,繼續插,結果由個二插到七仙,唔見九成半。」

他揀細價股有一套心得,「最好半新股,沿途無乜蟹貨,另一種係創業板,主席官司纏身、或者欠銀行好多錢,因為創業板隻殼最值錢,易俾人睇中賣殼。」

他說市面很多課程、財經節目,散戶知識多了,但卻同樣會中招,「起碼識睇陰陽燭,又講咩三頂背刺、早晨之星。但大戶都識製造圖表陷阱,你以為係單日轉向,其實唔係,係假突破。」他奉勸小股民炒股不要賭身家,「就算無晒,你下個月生活都要無問題,同埋要買唔會令你夜晚瞓唔着嘅股票。」

金牌經紀黃國英:恒大係聖經





黃國英說只要讀熟恒大、融創的股價圖學懂他們的玩法,內房股仍然很好玩。內銀股亦不要碰,搏資源股更好。(廖健昌攝)

基金經理、豐盛金融資產管理董事黃國英說,內地炒家攻港搵食,散戶無運行,「大陸人覺得港股平,但佢哋玩法好難 handle,好似恒大、融創,間中跌十幾個巴仙,之後抽高幾個開,又回兩、三成,之後再抽。我成日叫人買洛陽鉬業( 3993),上一次升到五個一,之後插落四個四,依家又上番五個二,戳到你飛起。」連他的愛股騰訊他亦認為升幅收窄,「我近排先買咗騰訊十一月 call輪。但由二百蚊講到依家三百五,只會愈來愈少 upside。」

要從大鱷口中搵食,黃國英話始終要學人玩法,「最簡單你拎恒大( 3333)、融創( 1918)幅股價圖,當係聖經咁研究,因為嗰啲大茶飯格局就係咁。」簡單一點的選擇,是內地的電力股,「大陸一般年頭會加電費,出年加價應該加得比較多,所以可以一搏,我估都有一、兩成升幅。」

○七蝕入肉





散戶買大陸人揸庄的公司,黃國英說一定要事先研究恒大股價圖。

回憶起○七年股災,他心有戚戚然,「嗰陣好入肉,但問題係先保命,焦點唔係輸幾多,係保住仲有幾多。中秋節返嚟嗰日,我記得開市已經裂口低開八百幾點,即斬,第一口價已經斬。」他形容那段時期是投資的噩夢,投機的天堂,「依家成個月先郁一千點,嗰陣一日已經得。美國推出救市方案,恒指挾上兩萬點,我哋套現了很多現金,之後沽滙豐,因為原本滙豐做得最好,但政府救其他銀行,滙豐優勢忽然消失急跌,之後又沽澳元,追番之前輸嘅。現在美股、日股獨大,暫時資金流去嗰邊,香港個市就愈高愈慢,最終可升到三萬二,不過唔會咁快!」

撰文:孫樂祈

攝影:財經組

news@nextdigital.com.hk


鍾意就快D Share啦!