掃呢頁CODE去手機

2017年10月22日 星期日

【咁突然】張建聲證實 《反黑》今晚播埋大結局24小時內下架 __,張建聲,

熱爆網劇《反黑》本來今日凌晨播出第30集大結局,好多網民都準備好上定網等睇!但係《反黑》嘅facebook專頁o尋晚突然發消息,標題「突發消息:反黑是 ...


熱爆網劇《反黑》本來今日凌晨播出第30集大結局,好多網民都準備好上定網等睇!

但係《反黑》嘅facebook專頁o尋晚突然發消息,標題「突發消息:反黑是日停播」,叫網民等候專頁公佈消息,好多網民猜測有關方面想齊集演員一齊睇直播,所以暫停喺凌晨發放大結局。

果然網民估中咗,但係今日《反黑》專頁發放消息更加震撼,表示大結局將會喺今晚(10月22日)8點播出,一眾演員同拍攝班底會同觀眾一齊收睇第一季嘅大結局,跟住就係震撼嘅消息,「而在大結局播出後24小時,《反黑》將會與各位暫別。有賴各位觀眾一直以來的支持,在不久的將來,《反黑》必定強勢回歸!」

究竟播出後24小時同各位暫別係咩意思呢?叫觀眾等season 2定係所有《反黑》集數要下架呢?

直至飾演招積哥嘅張建聲,喺facebook轉載終於有答案,張建聲留言話:「第三十集播出後24小時內亦會全線下架,要計準時間進度喔,往後還有重要消息宣佈……」,之後張建聲再開直播解釋:「因為會有個新發展方向,稍後公佈。」

全即係話《反黑》今晚播出大結局嘅24小時之後,連同其他集數都唔可以再喺YouTube免費睇喇!咁大件事?如果追開又未睇晒嘅話極可能唔夠時間睇喎!好多網民都話追唔切,有網民就好體諒,話《反黑》俾網民免費睇咗咁耐,都要為成本着想下,下架出DVD或者變成收費睇係好正常。

《反黑》season 1成本高達6千萬,喺YouTube播放雖然話可以計點擊獲得分紅,但點計都收唔番6千萬,season 2成本更有傳加到1億2千萬,繼續免費睇當然冇可能啦。所以想免費睇又未睇晒嘅話最好快啲煲晒佢喇!

《反黑》原定今日凌晨播大結局但臨時抽起。 (網上截圖) 《反黑》喺專頁發佈消息,一眾演員將會喺今晚一齊睇大結局。(網上截圖)
同時公佈結局播出後24小時後將暫別大家。(網上截圖) 張建聲開live宣佈《反黑》會下架。(網上截圖) 《反黑》劇照
《反黑》劇照 《反黑》劇照 《反黑》劇照

鍾意就快D Share啦!