熱爆娛樂: 【獨家】劉太甘比認懷孕4個月凸肚行街保鑣高度戒備 _

2017年9月6日星期三

【獨家】劉太甘比認懷孕4個月凸肚行街保鑣高度戒備 __,甘比,

恭喜！恭喜！城中66歲富豪劉鑾雄（大劉）果然有心有力，病癒後冇耐再有好消息！37歲嘅甘比（陳凱韻）又有咗喇！真係咪話唔勁呀！雖然甘比同大劉已經育有一仔一女，不過今胎意義唔同，家姐秀樺、細佬仲學出生時，大劉同甘比仍然係男女朋友嘅關係，而今胎就係佢地正式結婚後生嘅第一胎，當然會更加開心

早前大劉多次分身家，令外間懷疑大劉健康有問題，o依家劉太甘比再大肚有咗近4個月，足已證明大劉身體已經冇乜大礙，仍然有心有力。雖然粗身大細，不過甘比都不忘shopping當做運動，日前約下午5時許，《蘋果》仲見佢一個人出現喺銅鑼灣利園商場嘅Hermès專門店買嘢，見佢著住一條鬆身牛仔裙，步伐輕盈咁喺店入面行咗一圈睇手袋，店員見到劉太，當然要招呼貴賓啦，見甘比拎住手機放大咗張相俾店員睇，店員搖搖手，估計店裡冇甘比想要嘅款式，後來疑似係店舖經理嘅職員出埋嚟招呼劉太，見佢同嗰位經理有講有笑，睇嚟佢同店員們都非常熟落。

逗留咗唔夠半粒鐘已經離開，甘比身邊保鑣見有記者影相都好緊張，即刻擋喺前面開路，不過甘比走出店時，風一吹好明顯肚凸凸，身形發福咗唔少，似乎真係有咗身孕，《蘋果》打畀甘比恭賀！甘比就表示：「多謝晒！」問到佢有咗幾多個月？佢就話：「其他嘢唔回應多謝關心！」

攝影：朱志聰、黃曉程	劉鑾雄（大劉）同太太甘比（陳凱韻）造人成功。	甘比成為劉太之後嘅第一胎，仲有咗近4個月。
	佢日前出動去shopping。
走嗰陣保鑣甚為緊張。		側邊睇甘比肚凸凸。