掃呢頁CODE去手機

2017年9月20日 星期三

【獨家】無綫「御用警司」演足20年 66歲談泉慶獲退休警務處長讚賞 __,無綫,談泉慶,

講起談泉慶,最大印象首先係佢幾乎演親都係警察角色嘅差佬look,仲有佢個「二撇雞」look。相信有部分觀眾應該知道,談泉慶仲係保齡球高手,攞過世界盃香 ...


講起談泉慶,最大印象首先係佢幾乎演親都係警察角色嘅差佬look,仲有佢個「二撇雞」look。相信有部分觀眾應該知道,談泉慶仲係保齡球高手,攞過世界盃香港區男子組冠軍,曾經代表過香港去馬來西亞參加世界盃。

談泉慶有無綫「御用警司」之稱,好似喺《獵鷹》做李幫辦、《誓不低頭》嘅監獄署(懲教署前身)事務高級監督、《卡拉屋企》演警司楊Sir、《一切從失踪開始》嘅王Sir,到《天地男兒》演曾Sir等,真係「警察,全部都係演警察」。

日前談泉慶喺銅鑼灣南華會接受《蘋果》專訪,眼前嘅佢,已經66歲,剃走咗「二撇雞」,身形比當年後生時仲弗。講到當年成為「御用警司」,佢話係有原因嘅:「因為我做過輔警,嗰時香港電台有套《執法者》要拍跑馬地紙盒藏屍案,港台喺無綫搵人,見呢個幾好喎、幾有台型,不如搵佢嚟拍港台啲嘢。」

台型,並唔係得個講字,談泉慶有6呎1嘅身形,喺當年,屬於比較少見。

談泉慶話無綫後來好多有關警察劇,都係搵輔警去演:「因為好初期嗰時,佢哋拍警察搵埋啲特約留長頭髮,又唔識步操,啲手勢完全唔識,警察部投訴,你哋點搵人㗎?醜化晒我哋啲形象喎!無綫就話要搵啲特約演員公司傾吓,警察部話唔緊要,我哋有個輔警部門,可以出嚟做其他工作,當然唔能夠醜化我哋警察形象,所以由嗰時開始搵晒啲輔警做差人。」

自從拍完1979年港台劇集《執法者》之後,談泉慶正式踏上其「警察之路」,演警察嘅次數多到佢自己都數唔到,談泉慶話:「嘩,好多!真係TVB御用警司嚟,嗰時有個退休警務處長,見到我話好欣賞我做警司,又高大,尤其是戴嗰頂銀邊帽好有型。」

成日做警司呢類咁有威嚴嘅角色,出到街會唔會有人真係驚咗佢?談泉慶笑住話:「會㗎,有時啲交通塞車,我架車泊咗喺度又塞住,我會教其他駕駛者咁樣去,大家疏通吓,咁佢哋又聽我話。」

雖然成日做同一類型角色,但談泉慶話唔覺得厭:「最緊要自己享受做戲過程。」喺參演過咁多作品中,談泉慶最鍾意同李婉華及吳鎮宇拍嘅處境劇《卡拉屋企》,佢話:「《卡拉屋企》我做警長,又有威嚴,又詼諧。無綫有度好,好多時重播啲劇,啲朋友見到,就會問我仲有冇做?我話冇做20年啦,佢哋話成日以為我仲做緊戲。」

不過,談泉慶喺98年離開無綫,轉做幕後,但佢話其實仲有興趣返幕前……

採訪:戴彩煥

攝影:沈健程

攝錄:馮嘉銘

(攝影:沈健程) 談泉慶(右)拍港台《執法者》時被睇中做警察,點知一演,由演足20幾年都係演警察。 喺唔同作品中,談泉慶都做過警察,次數多到數唔到。(電影《暗渠》截圖)
喺《新紮師兄續集》,談泉慶今次就冇做阿Sir,係做曾華倩嘅姊夫喎! 談泉慶嘅台型,同佢6尺1身形應該好有關。 談泉慶除咗出名演警察,仲有打保齡球。
雖然談泉慶已經脫離公仔箱好耐,但係每當佢有份參演嘅劇集重播,啲朋友觀眾又會以為佢仲有做。

鍾意就快D Share啦!