2017年8月10日 星期四

老豆揸五千萬物業  Celine三歲做搖錢樹 [壹週刊 - 1431] __,Celine,M1,

Celine同妹妹Dion難得可以去公園放電,不停擒高擒低,馬上回復童真。娛頭老豆揸五千萬物業 Celine三歲做搖錢樹有「小巨肺」之稱的譚芷昀(Ce ...


Celine同妹妹 Dion難得可以去公園放電,不停擒高擒低,馬上回復童真。

娛頭

老豆揸五千萬物業  Celine三歲做搖錢樹

有「小巨肺」之稱的譚芷昀( Celine)再下一城,上週在美國《全美一叮》順利晉級,更成為首位華人奪得 Golden Buzzer殊榮, Celine衝出國際,爸爸譚順生( Dr Steve)亦父憑女貴,近年身家不停上漲。

Celine三歲開始就被爸爸安排唱歌賺錢,目前 Dr Steve已經手揸五千萬資產,他們一家愈住愈豪,短短幾年間由北角六百呎舊居搬到大嶼山愉景灣, 14年再升級租住君匯港千呎單位,半年前已經成功進駐山頂,入住位於柯士甸山道的低密度豪宅,月花超過十萬租住相連單位,真豪氣!

有策略

處心積慮捧紅個女, Dr Steve出咗唔少力,三歲開始訓練個女學聲樂,之後四出參加歌唱比賽,成功製造曝光率,一四年 Celine七歲參加《中國新聲代》奪冠後,開始衝出國際,一五年再出戰《全英一叮》,可惜無功而還,去年兩父女齊齊簽約蕭定一旗下做歌手。

「佢係個功利主義者,好識碼住啲名人同 artist,嗰陣 Celine得三、四歲,仲未參加《中國新聲代》,佢已經幫個女搞個人演唱會,喺地鐵站度唱歌,等佢練大啲個膽。之後親自幫個女傾 job,如果小型活動,好似商場、 annual dinner嗰啲,就已經企硬十萬唱兩首歌,啲價仲貴過 TVB啲三四線明星,仲要對方用埋佢學校啲琴師同 band隊,但如果係大型活動或者拍埋啲紅嘅 artist,就減價都肯唱,而家紅到咁,大陸有啲商演出到一百萬唱三首歌,不過因為《全美一叮》嗰邊唔俾參賽者接其他工作,所以有錢都冇得賺住。」知情者透露。

玩咗半粒鐘,兩姊妹身水身汗。

放電半粒鐘,兩姊妹跟工人姐姐步行返回山頂寓所。

Celine在街上突然手舞足蹈,放聲唱歌。

食水深

自從有 Celine做生招牌, Dr Steve開設的「 Sing and you music center」,現時有三間分校,在學校網頁中,亦以 Celine歷年的威水史作招徠,而且學費比一般的音樂學校貴得多,好似「舞台巨星訓練課程」、「我是歌手班」、「流行聲樂考級課程」等,閒閒哋過千蚊一堂。如要預約 Dr Steve親自授課,每四十五分鐘收費高達二千五百元,四堂起跳,比起明星級數的麥潔文收六千元四堂,每堂一小時, Dr Steve的收費認真揦脷。

「最平嘅 group class都要四百五十蚊一堂,最少要學十二堂,埋單五千四百蚊。通常上完三個月 group class,佢哋就會 sell你上 one to one lesson,最平都要一千二百蚊一粒鐘,如果想搵 Dr Steve親自教,就冇一萬蚊都落唔到樓,上堂嗰陣仲好多規矩㗎,家長唔可以跟入課室,唔可以影相同埋錄影。」一名學生家長透露。

本刊亦曾到訪 Dr Steve位於灣仔分校,學校面積不大,一眼睇晒。當日 Dr Steve如常返學校上堂,校內並沒有其他職員,無論開門、上堂,甚至聽電話,都係由佢一手包辦,對於記者任何提問, Dr Steve全程封嘴,只笑笑口話:「唔方便呀!我要上堂。」

週一( 7/8), Dr Steve如常返學校上堂,對記者提問全部封口唔答。

Dr Steve開設的「 Sing and you music center」,門口放滿 Celine的獎狀做生招牌。

本刊透過 WhatsApp查詢, Dr Steve學費每 45分鐘收$2,500,比星級老師麥潔文收$6,000四堂仲要揦脷。

孟母三遷

靠個女搵到食, Dr Steve一家近年收入大增,居住環境亦連跳四級。短短七年,由原本位於北角的六百呎舊居,一一年搬到離島區的愉景灣,一四年再進駐西九君匯港的千呎單位。半年前更上一層樓,搬到山頂的低密度豪宅,做上等人。

「佢哋一家四口而家住嗰度,打通咗兩個單位,一個七百幾呎,一個八百幾呎,兩個單位夾埋月租最少十萬。」知情者透露。

上週五( 4/8),老闆蕭定一為 Celine搞祝捷會, Celine一身花裙配高踭鞋,非常老積。

Celine由三歲開始,已被老豆安排四出演出,增加曝光率。

登山成功, Celine已由畢架山英基轉到山頂英基返學,近年亦甚少再參加校內活動。

被指專黐名人紅星, Dr Steve試過在晚宴中帶住 Celine搵劉嘉玲合照。

Celine在《全美一叮》技驚四座,更成為首個華人奪得 Golden Buzzer殊榮。

公園放電

上週三(二日),啱啱比賽完返港的 Celine,在山頂寓所附近出現,由工人姐姐湊住同妹妹 Dion去公園玩,兩姊妹在滑梯上擒高擒低,扎扎跳,馬上由面對傳媒老積樣回復童真。其間 Celine同 Dion全程用英文溝通,有街坊經過同佢打招呼,佢都友善 say hi,放電半粒鐘,工人姐姐拖住兩姊妹返歸, Celine沿路不停指手畫腳,又突然好似開籠雀,手舞足蹈在街上放聲唱歌。

成功登山兼愈來愈出名,為方便返學,原本就讀畢架山英基小學的 Celine向校方申請轉校,最終成功調到位於山頂賓吉道的英基小學,屋企離學校車程只需四分鐘。

「以前 Celine喺畢架山返學嗰陣,開頭都成日參加學校啲活動,好似合唱團、學校啲歌唱比賽一定有佢份,佢 daddy媽咪都有出現,不過後期開始參加咗內地啲唱歌節目後,就好少見到佢,半年前搬咗屋轉埋校,有家長問佢哋搬去邊,佢哋都唔答,神神秘秘咁。」一名學生家長透露。

聲震屋苑

上週五(四日), Celine孖住老闆蕭定一出席祝捷會,被問到爸爸管教是否嚴厲, Celine當場面有難色,據知 Celine從小生活極有規律,朝早六點起床練琴,每日最少練歌兩粒鐘。

日前記者在 Celine寓所外圍,亦清晰聽到 Celine練歌,當日 Celine正在唱比賽歌《 How am I Supposed to live without you》,震音震遍整個屋苑,「小巨肺」果然名不虛傳!

Dr Steve自稱設計一套「三角形訓練策略」教女,即聲樂、丹田同共鳴,成功打造「小巨肺」,絕對用心良苦。

早前 Dr Steve同老婆撇甩兩個囡囡,到半島酒店撐枱腳。

放工後, Dr Steve到灣仔電腦商場購買 IP cam。

經老豆悉心培訓, Celine每日定時定候練歌、彈琴,好有規律。

07年出世的 Celine, 9歲人仔已經揚名國際,帶挈阿爸阿媽搵大錢。翻查資料, Celine未出世時, Dr Steve兩公婆只持有上環一個價值約 300萬單位,但自 Celine 3歲識搵錢後, Dr Steve開始入貨, 11年分別以過千萬買入愉景灣單位及灣仔商廈單位,現手持資產接近五千萬。

位於柯士甸山道的 The Mount Austin,屬區內低密度豪宅,林夏薇婚後亦在此居住。

被數臭史

九歲小巨肺譚芷昀( Celine),參加美國《全美一叮》一夜成名,其父譚順生卻被連環翻舊賬,爆臭史。

硬撬薛家燕學生

譚順生曾在薛家燕的音樂中心任教師,早前被家燕姐炮轟暗撬其中心多名學生,更收取萬多元天王級學費,被家燕姐狠批為人不道義,譚順生即發聲明道歉,兼願以家燕姐名義將八萬元學費捐保良局。

疑虛報資料

譚爸爸在網上介紹自己教唱歌的資歷亦被網民大起底,其申報贏獎時唱過的歌曲,包括《妳的名字我的姓氏》和《愛比我重要》等,歌手還未出歌,年份有出入,被質疑虛報資料,甚至連博士銜頭亦被質疑真確性。

刻薄員工

早前,有位陳先生爆料曾在譚爸爸的學校任職,一星期返三日,每日工作 8小時,人工約二千元,陳先生表示做咗一個月,譚爸爸完全沒有出糧,故自動離職。

利用張翊龍名氣

第二季《中國新歌聲》香港賽區冠軍張翊龍爆料,譚爸爸曾答應送兩堂唱歌試堂給他,結果上了半小時,就被譚爸爸要求對方拍片,表示自己是他的學生,並要多謝譚爸爸為他練歌。

童星出身

圈中有不少資深演員歌手,以前細細個就俾父母安排入行做童星,最經典莫過於兩歲半就入行的馮寶寶。

馮寶寶

兩歲半入行做童星,拍第一套電影《小寃家》,被剝削上學的權利,父親花錢請老師到片場教她讀書,六歲時已經拍咗 36部電影,十年間拍超過二百部電影,成為全球拍最多電影的童星,馮寶寶揚言自己似棵搖錢樹,當時片酬兩萬元,可惜當年其父馮峰將她賺返來的辛苦錢,全部輸晒喺賭枱上。

梅艷芳 梅愛芳

父親早逝,家境貧困,梅艷芳四歲半時已與胞姊梅愛芳踏足舞台,曾於荔園、酒廊、歌廳唱歌表演,直至 18歲,梅艷芳參加無綫新秀歌唱比賽成功彈出,一炮而紅成為天王巨星。

秦沛 姜大衞

年僅三歲的秦沛已在電影《蕩婦心》演出,而姜大衞四歲時已拍第一套電影《別讓丈夫知道》,五歲時兩兄弟孖住合演《街童》,其後兩兄弟以童星身份參與無數演出,至今已拍超過 200多部電影及電視劇。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...