有人話，女人最幸福嘅事就係搵到一個好歸宿，原來已經五十歲嘅陳法蓉，到目前為止，依然單身，但其實身為89年香港小姐冠軍嘅陳法蓉，多年來都有唔少戀事發生。1994年，正當倪震同周慧敏分手嘅時候，陳法蓉就同呢位才子撻着咗，可惜兩年後倪震被影到同周慧敏再續前緣同遊美國三藩市，而陳法蓉隨即宣告單身。2001年，陳法蓉被指同許晉亨拍拖，之但係女方就嫌男方經常蒲吧媾女，閃電提出分手。之後陳法蓉就同大陸男演員楊俊毅傳緋聞，但最後都係無疾而終，但講到最經典，就要數到08年，有指陳法蓉搶走陸詩韻嘅油王男友朱明，二人仲一度傳出過婚訊，不過喺一年後分手，之後朱明被發現原來係「空心油王」，欠債纍纍仲人間蒸發。仍然係單身係陳法蓉，最近就接受到車淑梅主持嘅《舊日的足跡》訪問，講到戀事，佢就話自己一直都有拍拖，更以「一啲都唔dry」嚟形容自己。陳法蓉話自己一直追求海枯石爛、公主王子式嘅愛情，過往每一段感情佢都愛得歇斯底里，最長嘅超過七年，最短都有兩年多。入行多年，陳法蓉話唔會同圈中人拍拖，因為接受唔到男朋友同其他女藝員親熱，佢話：「我好小器，喺愛情入面要求有回報，對方亦要盡力令我唔好懷疑佢。」而陳法蓉亦相信真命天子係天註定，所以佢從不心急，只擔心會揀錯郎。陳法蓉坦言自己並非冇人愛，只係一直未嫁啫。佢話自己有一個盒，裡面放咗一枚求婚戒指：「當時我真係答應咗男方，但因為發生咗一啲事，最終未能嫁出……從來冇同人同居，所以唔涉及搬走同和歸還物件嘅事情。」陳法蓉話，相信彼此曾經相愛，就應該好來好去，求婚戒指就當作一個紀念，訪問入面，陳法蓉仲提到，一位曾經拍拖七年嘅舊愛，最近搵佢傾訴心事，話有意離婚，陳法蓉話佢就勸對方要考慮清楚，慢慢解決問題。佢又話自己依然單身，亦習慣單身嘅自由感覺，佢話能夠搵到伴侶固然開心，但搵唔到都唔算失敗。
| 年屆50歲嘅陳法蓉曾經同倪震同許晉亨拍拖。(資料圖片) | | |
| | | |
| |
|
鍾意就快D Share啦！
|
|
|
