喺90年代絕對係女神級嘅「寶麗金四小花」湯寶如、劉小慧、黎瑞恩、王馨平，如今個個都已經係40開外。今年48歲嘅王馨平(Linda)，最近復出幕前，代表作當然要數3月喺《博愛歡樂傳萬家》中門大開咁唱番《別問我是誰》。試完水溫睇反應後，前晚收起性感嘅Linda，就同四小花之一嘅湯寶如，喺經典金曲節目中，背對背合唱《美少女戰士》，又唱又跳勾起80後集體回憶之餘，身為熟女嘅佢哋，竟然滲出點點少女味出嚟。Linda雖然差兩年就50歲，不過滑漏白淨零毛孔皮膚竟然keep到依家，上月尾(27日)晚上9點幾，《蘋果》見到冇化妝嘅佢，紮住馬尾、着住白色T恤同牛仔褲，到灣仔惠康超級市場買即沖咖啡同朱古力橙餅。 本身高人一等嘅Linda，無論喺超市揀嘢食，抑或排隊嗰陣，都高出旁邊女士們成個頭。雖然當日只係穿着簡單裝束，不過Linda無論樣貌同身形，點睇都唔似實際年紀。買完零食後，冇帶環保袋又冇買膠袋嘅Linda，就咁捧住啲嘢食行去附近嘅黑色座駕，原來Linda老公就坐喺乘客位等候，接過老婆捧住嘅一堆零食，兩公婆都回心微笑咗一下。《蘋果》事後問Linda，佢就咔咔笑話：「係呀係呀，其實嗰晚我老公話等佢去超市，因為係我揸車，不過嗰包嘢食得我知放喺邊度，所以我同老公講，我去買可以快啲。」外貎反映心境，只要時刻保持開朗，又使乜嘥錢買護膚品！
| 採訪、攝影：梁繼光、羅德光 | | |
| | | |
|
鍾意就快D Share啦！
|
|
|
