掃呢頁CODE去手機

2017年7月6日 星期四

中南海保鑣總管傅政華 現身香港 [壹週刊 - 1426] __,M1,

傅政華(箭嘴示)同習近平言談甚歡,就係要話你知,佢個位仲好穩陣。八卦陣中南海保鑣總管傅政華 現身香港習總訪港三日,保安工作十分之大陣仗,搞到好似全城戒 ...


傅政華(箭嘴示)同習近平言談甚歡,就係要話你知,佢個位仲好穩陣。

八卦陣

中南海保鑣總管傅政華 現身香港

習總訪港三日,保安工作十分之大陣仗,搞到好似全城戒嚴咁款。究竟中方保安由邊個統籌呢?早前有傳係政法委書記孟建柱親自揸旗,睇真啲,習總離港嗰日,竟然係由公安部副部長傅政華列隊歡送習總。

習近平到埗後發表講話,表示「香港一直牽動我的心」,幾分鐘就講完,難為背後成班人等佢幾個鐘。

佢有名你叫「中南海保鑣總管」,嗰日烈日當空,佢仲同習總、林鄭傾偈,睇佢手舞足蹈,好 high噃。梗係啦,傅政華要展示實力,十九大即將換屆,官場中人梗係想坐穩張櫈

查實上年五月,全國人大委員長張德江訪港,傅政華喺幕後打點保安工作,但佢只係隱身港島某別墅,點解今次高調現身呢?話說今年四月流亡富豪郭文貴大爆,傅政華要求佢調查中紀委書記王岐山同佢家族資產,仲話係習近平下嘅暗令,郭文貴自稱傅政華勒索佢五千萬美金,先肯釋放佢嘅家人同員工,郭文貴依家身在美國,依然咬住傅政華唔放,不停用個人社交網站批評佢。

被郭文貴大爆黑材料,傅政華一度消失喺中國官媒,今鋪佢刻意同習近平同場,仲言談甚歡,大陸官場宮心計,真係要買定花生剝等睇好戲。

小學生乾煎暈倒 原因係「國家禮節」

約七十名小學生一早到機場跑道旁送別習總,三名學生暴曬過度暈倒,慘不忍睹。

警方因應習總旋風式訪港,封路擾民造成大塞車,港島成為重災區,灣仔繁忙時間一度出現三公里車龍。警方部署空前嚴密保安措施,記者去接機唔准帶毛巾、遮同筆,仲出動飛虎隊狙擊手,動用一萬四千警力護主。

明明「君臨天下」,但俾人感覺更加似「如臨大敵」喎。時事評論人呂秉權話,習總五年前上任國家主席,大走親民風,提出「多同群眾座談……多到困難和矛盾集中、群眾意見多的地方去,切忌走過場」,又要「減少交通管制,一般情況不封路、不清場閉館」。但今次佢訪港嘅種種安排,似乎自打嘴巴。

「親民」嘅習總無論抵港定離港,新聞處都安排記者一早到機場停機坪等候,嗰度一啲遮蔭設施都冇,記者叫苦連天,更可憐嘅係一班戴紅帽送習總嘅小學生,都要喺烈日下暴曬近成粒鐘,結果三名小學生懷疑中暑暈倒。

究竟點解要大家苦候咁耐?據聞呢啲係「國家禮節」。根據不成文規定,等候國家元首級人馬嘅基本時間大概係三個鐘,咁先顯得佢哋高高在上、備受尊重。

傳防彈遮護習總 仲可以防火攻

今次習大大訪港,保安布防嚴密,貼身保安措施更加唔嘢小。警方同中南海保鑣(中央警衞局人員)都配置最全面裝備迎習總。

落機當日,習總身邊有幾名中南海保鑣拎住黑色長遮同手提公事包,同周星馳電影《國產零零漆》有得揮。傳聞呢把遮大有來頭,表面上係普通嘅遮,但一打開就可以防彈,仲可以防火攻,價值成十萬蚊港紙有多。不過,我哋問過曾任 G4嘅保安專家黎家智,佢話保鑣拎住嘅真係一把普通嘅遮,用嚟幫習總擋雨,避免尷尬。當日記者唔俾拎遮,習總就有幾把遮,真係同人唔同命。

警方 G4同中南海保鑣,一人攞住一個黑色公事包,成個「喼神」咁。其實中南海保鑣拎嘅喼比較薄同軟身,放嘅係防彈氈; G4手持嘅黑色行李喼,入面相信係槍械,用嚟應付緊急情況。

車隊方面,除咗防彈寶馬,警方再次出動無線電干擾車,用嚟干擾同偵測無線電波,例如遙控炸彈同遙控飛機。今年四月印尼總統佐科.維多多訪港嗰陣都出動過,當時有做空管人員嘅網民爆料,話架車干擾到機場航空頻譜,質疑係草菅人命。唔知警隊係咪知衰,今次喺機場再唔見呢款車出現。

呢兩位中南海保鑣手持嘅係普通嘅遮,真正嘅防彈遮之所以防彈,因為用咗超強纖維「凱夫拉爾」,一般防彈背心都係用呢種纖維所造。

呢架無線電干擾車,今次有喺護送習近平嘅車隊入面,但無喺機場出現。(《蘋果日報》圖片)

成立一週籌三萬六 立言七一獲強心針

今年七一遊行得六萬人參與,比上年減少近半,唔少政黨政團嘅籌款數字都相應下跌。不過,上月底先由張秀賢領軍成立嘅倡議組織「立言香港」,今年第一次擺七一街站,就籌到三萬六千蚊,打咗支強心針。

張秀賢話,立言成立咗一個星期就籌到呢個數目,係意料之外;街站反應雖然熱烈,不過未及佢喺學民思潮嘅年代咁好。佢又話未來主要會繼續省靚立言個招牌同「做大個餅」,搞各種活動同政策建議。

舊年籌到五十萬、成為籌款冠軍嘅香港眾志,今年數字就下跌至約四十三萬,不過眾志立法會議員羅冠聰話成績算唔錯。七一遊行當日遇上警察聲稱「掹槍」事件,佢話會去信立法會保安事務委員會,提出討論警察濫權,亦會去信保安局要求徹查。至於舊年籌得約四十四萬嘅公民黨,今年大跌至約二十六萬,跌幅最大,陰公豬囉。

至於事隔兩年,今年再喺七一遊行擺街站嘅本土民主前線,今年就籌到大約四萬蚊,發言人黃台仰話,街站反應比想像中正面,冇乜參與遊行市民鬧佢哋,反而有人同佢哋打氣。

「立言香港」成立唔夠一星期,首次擺街站就籌到大約三萬六千蚊。

香港眾志籌款比去年下跌約七萬蚊,但都籌得約四十三萬,仍然有一定吸金力。

撰文:巫不言


鍾意就快D Share啦!