一代性感女神葉玉卿（卿卿）1996下嫁美籍商人胡兆明後便退居幕後，跟丈夫在美國生活，更先後為胡家誕下大女胡芷欣（Victoria）、次子胡可聰及幼子胡以聰，專心相夫教子的她一家在當地生活得樂也融融。而胡家有女初長成，今年18歲的Victoria無論樣子及身材都盡得卿卿真傳，擁有完美身形的她，更憑健康性感泳衣相成為人氣高企的星二代，雖然Victoria身在美國讀書，但一舉一頭仍受到大批網友關注！
考到6個獎學金
之前一直忙於考大學的Victoria，日前在美國高中畢業，作為媽媽的卿卿即拉大隊舉家見證Victoria的歷史性時刻！身穿白色連身裙披上紅色畢業袍的Victoria，在老師、同學及家長面前於台上接過畢業證書，令卿卿坦言覺得十分感動，更為她成功考入心儀大學Union College而感到驕傲，卿卿越洋接受電話訪問表示：「佢考到9間大學，雖然佢呢間唔係長春藤嗰幾間大學，但呢間好Good Fit佢，佢仲考到6個獎學金。佢好叻，依家要開學前學習獨立，佢之前好大壓力有情緒病，但依家全部都過晒。」
卿卿做私人攝影師
而去年與初戀兼日韓混血男友Chris分手的她，原來已走出失戀之痛，現與身高有6呎1寸的「翻版Tom Cruise」男友Will拍拖。而Victoria與Chris再見亦是朋友，故在畢業典禮中新歡舊愛三人同場出現，大家亦不尷尬，更大方合照齊齊賀畢業，卿卿表示：「佢同Will係幼稚園同學，之前一直係朋友，依家先係男女朋友。雖然個女同Chris分咗手，但我哋同Chris父母都係朋友。個女同Chris以及Will本來係玩開嘅朋友堆，但Chris知道佢哋拍拖都有少少唔舒服，冇同Will講嘢，但依家已經放低咗冇嘢。」事後Will更親自到卿卿家中接Victoria到畢業晚會，Victoria打扮得明艷照人，卿卿更充當其私人攝影師為他們拍下甜蜜一刻。
仔仔都有拖拍
現時Victoria即將入讀大學，而次子可聰亦有女朋友，正所謂子女有自己不同的世界。問到卿卿會否有失落感覺？她說：「咁又冇，依家忙到不得了，兩個仔都未讀大學，但依家好熱鬧，因為佢哋會帶埋男女朋友嚟屋企，我諗如果有失落感覺，應該會係個女真係讀大學嗰時，大約8月初9月頭左右。」另外，卿卿笑言年紀唔輕，並無意復出幕前，更謂當子女們長大成人後，便會到處遊玩享受人生。
|
鍾意就快D Share啦！
|
|
|
