掃呢頁CODE去手機

2017年6月17日 星期六

林雅詩有鑊難補惟有着草 __,林雅詩,

着草龜縮可能係最好方法~應該係~林雅詩喺香港可能唔係好多人識,不過喺馬來西亞就響晒朵,連當地全國警察總長同拿督都識佢!為博宣傳呃Like,佢夠膽喺馬來 ...


着草龜縮可能係最好方法~應該係~

林雅詩喺香港可能唔係好多人識,不過喺馬來西亞就響晒朵,連當地全國警察總長同拿督都識佢!為博宣傳呃Like,佢夠膽喺馬來西亞玩Facebook直播造假扮被搶手袋,被成千上萬網民同當地人民「媽」到飛起!林雅詩急急「着草」返港,仲要加映一場大龍鳳,真係唔笑就有鬼!佢一落機就識行識走,愈叫愈走,人體真係好奧妙,明明鬼打咁精神,但行行吓竟然突然暈低,同行嘅女友人就食咗「大力菜」咁,又抱又攬抬住佢走,呢啲朋友真係識得過喎!經理人都有戲㗎,幾乎跪晒地咁狂叫佢個名,暈到咁,3歲細路都識打三條九啩?唔知點解,林雅詩最後畀人抬咗上「黑車」, 唔係白車!唔通架黑色七人車係私家救護車,有齊氧氣罩同心臟電擊器?

「螃蟹陰招」抄得過

搞出大頭佛,林雅詩玩人間蒸發,唔聽電話、唔敢見人,連Facebook都閂埋,實行以靜制動,封口唔提唔講,博件事淡化冇人提!橋唔怕舊,最緊要受,早排網上瘋傳一單「新聞」,Nuts哥真係笑到噴飯,林雅詩查實可以照辦煮碗!話說有位女子喺新加坡海灘玩裸曬被螃蟹拑住私處唔放,同行女友人竟然用口啜毒!古有關雲長刮骨療毒,早有國產凌凌漆睇鹹片挖子彈,依家仲要啜毒療傷?螃蟹有毒?唔係啩?雖然呢單係來自「內容農場」(Content farm) 嘅網上虛構新聞,不過依然引起全城熱話,皆因夠晒香艷同搞笑,吸Like吸到傻!林雅詩不妨參考吓呢條橋,唔通啲螃蟹會聲討你抹黑咩?

連底底差啲攞出嚟畀人睇

你可能會話:「博見報?扮病入醫院、撞鬼或者走光咪得囉!」其實你噏得出嘅,林雅詩都做過!向來大膽嘅佢19歲選港姐,20歲被王晶睇中拍三級片,又同當時未升呢做視帝嘅黎耀祥拍過《PR Girls青春援助交際》,臨收山息影前仲同古天樂傳緋聞,都算好頭好尾,點知早幾年因為同前夫唔妥就話復出,走出嚟出寫真同班妹妹鬥過,做埋寫真女王!講到入院,佢試過疑似自殘𠝹手,再嚴重啲都有,年初突然自爆想跳樓,仲話為爭個仔嘅撫養權好煩,所以一時衝動!以上全屬真人真事,因為佢性格夠烈、夠衝動,不過點都有炒作新聞嘅成分,頭頭碰着黑嘅佢聲稱懷疑畀鬼纏,早兩年仲自爆同前夫離婚前,關係差到5年分房瞓冇性生活!

呃Like都要用腦!

離婚爭撫養權、拍寫真、撞鬼、拍三級片、自殘企跳、冇性生活等,林雅詩幾乎所有類型嘅新聞都出過,可能佢見上年自爆喺布拉格酒店換換吓衫突然有男人入房都有得見報,今次索性玩大佢!有Like有價值,冇Like一文不值,唔少藝人都鍾意喺Facebook玩直播或者放相儲人氣,其實炒作新聞博見報無可厚非,但係搞埋人哋地頭,就真係可大可小,林雅詩分分鐘以後被禁入境!等Nuts哥教精大家啦,其實呃Like都要用吓腦,有手尾跟就唔係高招


來源 source: http://hk.on.cc
鍾意就快D Share啦!