邊個咁大整蠱呀？
喺啱啱過去嘅父親節，藝人張繼聰（阿聰）一家就發生咗「羅生門」事件，阿聰指仔仔送風扇畀佢嘅原因，竟然出現兩個唔同嘅版本！雖然父親節已經過咗，不過離奇嘅事件係會接踵而來嘅，而今次嘅主角係林盛斌（Bob）！三女爸爸嘅Bob，出晒名錫屋企人，喺呢個無風無浪嘅日子，就發生咗件差啲令林家家散人亡嘅事……
呢日Bob喺社交網站留言指老婆今日如常去信箱拎信，不過佢就收到一張本地郵寄嘅明信片，上面寫住：「To Dad,I Love You」咁Bob老婆就即刻去問三個女係咪佢哋送畀爸爸嘅驚喜，點知三個女異口同聲話唔係，而Bob依家就畀佢老婆審問緊：「啱啱老婆打開屋企個信箱，收到一張咁嘅postcard，問咗三個女唔係佢哋寄嘅，我老婆而（依）家問緊我嘅回應。」
因為三個女都話張明信片唔係佢哋寄，所以Bob嫂即刻偵探上身「審問」老公，令一向口才同轉數快嘅阿Bob，都要問問偉大嘅網友點拆招：「係咪我之前去柬埔寨探訪個妹妹寄呀？本地郵寄喎.........咁會唔會係寄去隔離（籬）屋但係入錯我哋信箱呀？個地址寫得好清楚係呢度喎.........超，又冇寫我名，關我叉事呀？Dad喎，全間屋得你一個男人咋喎....... 請問各位有咩建議答案俾（畀）我？因為我講出所有嘅可能性都有得反駁！」
唔少網友見到Bob咁，即刻做智囊團為佢拆招，唔少人就叫Bob「承認」過錯，係咪自己做過啲乜唔知，亦有人話Bob不如坦坦白白，如果唔係跪榴槤都唔掂！
來源 source: http://hk.on.cc
|
鍾意就快D Share啦！
|
|
|
