掃呢頁CODE去手機

2017年6月15日 星期四

釣金龜夢碎 甩大馬「老千」未婚夫 陸詩韻孖魔術師買牙刷返歸 [壹週刊 - 1423] __,詩韻,陸詩韻,李詩韻,M1,

37歲的高正安,工作瓣數多,既是舞台劇演員又是魔術師。探熱針釣金龜夢碎 甩大馬「老千」未婚夫 陸詩韻孖魔術師買牙刷返歸坦言鍾意成熟男,被指專釣金龜的○ ...


37歲的高正安,工作瓣數多,既是舞台劇演員又是魔術師。

探熱針

釣金龜夢碎 甩大馬「老千」未婚夫 陸詩韻孖魔術師買牙刷返歸

坦言鍾意成熟男,被指專釣金龜的○五年港姐亞軍陸詩韻,自一三年飛甩大馬「老千」未婚夫吳銘偉,打回原形復出演舞台劇,同返大台拍劇,多次釣金龜都失敗收場,陸詩韻決定放棄搵老細級男友,轉口味同魔術師高正安,兩人低調拍拖近三年。日前陸詩韻孖男友到赤柱開餐後,一齊去超市買牙刷等日用品返歸,戀情開始浮面。撰文、攝影、攝錄:娛樂組 設計:何嘉慧

孭成身債

○五年港姐亞軍陸詩韻,當選後緋聞不絕,被指專釣金龜的她,與同屆冠軍葉翠翠風頭叮噹馬頭,不過葉翠翠兩年前嫁人生埋仔,陸詩韻婚期仍無着落,原來多年來屢遇空心老倌的她,唔再專吼有米男,轉口味與三十七歲魔術師兼舞台劇演員高正安低調拍拖。

一三年,陸詩韻被踢爆與大馬商人吳銘偉同遊汶萊,返港後自爆對方是其未婚夫,二人更合資開公司,可惜陸詩韻連對方欠債纍纍兼有個八歲女亦全不知情,更被對方呃埋做公司董事及貸款人,搞到周身蟻。

「四年前同吳銘偉分手, Sharon(陸詩韻)其實好傷,俾對方呃埋做貸款擔保人孭咗成身債,連自己啲積蓄都無埋!」陸詩韻身邊人說。

嫁有錢人夢碎,陸詩韻一度要搬返父親將軍澳居屋,幫父親的內地製衣廠打工,更要復出做舞台劇賺錢。



葉翠翠、陸詩韻當選後都緋聞不絕。

陸詩韻出活動,總愛拋胸騷本錢!

13年同吳銘偉遊汶萊斷正,陸詩韻返港自爆對方是其未婚夫!

好有默契

亦因為演舞台劇她與魔術師高正安撻着,當時被拍到在西貢撐枱腳,陸詩韻亦表現避忌,還公開表示鍾意成熟男,對嫩口男無興趣。

「由細到大, Sharon都鍾意啲大年紀同做生意嘅男人,覺得咁先至穩重,可以照顧到佢,但係識咗 Andy(高正安)佢反而覺得對方夠細心,同自己亦好夾,而家感情係好穩定!」陸詩韻身邊人說。

日前陸詩韻與高正安到赤柱拍拖開餐,兩人之後一齊去商場超市買日用品,只見女方入到超市,急急腳去攞了一排牙刷,高正安似乎很忙碌,一直掛住講電話,陸詩韻揀齊嘢瞄咗男友一眼,已經有默契行去俾錢,高正安一支箭出門口行去等𨋢,但因為行錯方向,二人轉行去另一邊往停車場攞車。

高正安在粵港澳都有不少魔術演出。

入到超市,陸詩韻火速去攞牙刷。

買完嘢,陸詩韻跟實男友去停車場攞車。

空殼金龜

情路一波三折的陸詩韻,一直都想黐個有米男友,可惜次次都撻 Q,誤釣空殼金龜。

富豪曾文能

07年初,曾與年長她十四年兼曾入獄的富商曾文能同遊日本三日,其間有傳周汶錡硬撬,兩人關係維持一年玩完。

「廉署剋星」林炳昌

08年 4月,被拍到與「廉署剋星」律師林炳昌夜會中環,其後因男方被律師會釘牌,二人關係即時無影。

「假油王」朱明

08年尾,被拍到與身家十億的「油王」朱明拍拖行超市,更搬進銅鑼灣月租十萬的酒店式公寓,兩個月後,因陳法蓉介入而分手,其後朱明亦被爆欠債 7億人民幣而改名避債。

未婚夫吳銘偉

09年,搭上大馬華僑吳銘偉( Jeff),陸詩韻更為 Jeff的公司做貸款擔保人,其後男方被揭有妻有女欠債纍纍兼走佬,陸詩韻人財兩空,被銀行追討 71萬港元,結果二人對簿公堂。

撰文、攝影、攝錄:娛樂組


鍾意就快D Share啦!