面對依家個瘋癲樓市，娛樂圈唔少樓王樓后都收晒手，不過仍然有人膽大照博，異軍突起，我Nuts哥估都估唔到，昔日黎明愛將李治廷，喺香港銷聲匿迹接近3年，竟然唔聲唔聲，一係唔買，一買就買足三間，用4,500萬掃晒嘉匯三個單位，三百幾呎、七百幾呎同九百幾呎，乜Size都有，證明堅有貨！啱啱先30歲仔，堅係歲月神偷靠乜？梗係多得緋聞女友范冰冰帶挈拍完套《武則天》就食住條水到依家，拍到冇停手。
黎明開路 夥拍巨星
講家底，李治廷有個經營清潔公司嘅富爸爸，自細就住清水灣，喺全英國排名Top 3嘅英國Imperial College化學系畢業，因為佢有阿拉伯、馬來西亞同中國人血統，百分百係混血兒，講廣東話猶如ABC咁，又有S音又有鼻音，青靚白淨又夠高大，個樣又似李小龍，又識唱歌作曲彈結他，成個package簡直係perfect！人人都以為佢係公子哥兒，屋企大把水，出嚟做明星只係過吓癮，事實擺在眼前，佢話畀大家聽，佢今時今日唔係靠父幹！
唔好成日話簽親黎明就冇運行，雖然李治廷喺香港發展麻麻，但就係靠擁有龐大廣闊人脈嘅黎明幫佢開咗個靚頭！成日簽女嘅黎明，八年前睇中咗李治廷即收歸旗下，第一部電影就拍住影帝影后任達華同吳君如主演《歲月神偷》，仲攞埋金像獎「最佳新演員」獎！之後幫佢接咗部內地電影《一夜驚喜》，做埋「媒人」撮合佢同范冰冰！查實內地啲小鮮肉，真係多到可以開豬肉檔，點解李治廷冧到范冰冰，就係勝在個樣鬼鬼哋，讀過番書識雞腸，個人又幽默，加上年輕又夠精壯，得閒又玩吓爆肌，就算唔拍拖做男友，做細佬一齊行出嚟都夠照有台型就係單緋聞一谷，李治廷仲唔一夜驚喜就假啦，部戲勁收超過二億票房，令佢人氣勁升，加上有網友話佢哋雙雙去布吉度假，親密到玩錫錫，呢位小鮮肉更加以「關係開心」嚟形容同范冰冰嘅關係，仲話大家係親密嘅朋友，呢段姊弟戀嘅花生指數爆晒燈！
肯捱夠搏 寒天晒肌
就係「親密」呢兩個字，即刻打開李治廷嘅錢途，年年喺收入榜都排第一嘅范冰冰有財有勢，挾住「國際范」之威名，帶挈李治廷搵食，唔單止擺明車馬情侶檔出活動。機會係人哋畀啫，李治廷本身都付出唔少努力，單睇佢飾演皇帝李治，由十幾歲演到老年都不但止，啲對白文縐縐，翹口又摻手，但話晒尖子嘅佢真係easy job，記憶力驚人，勁到到依家都記得！雖然佢個樣面長長鬼鬼哋，但做皇帝又啱feel，完全冇話格格不入，加上套劇係范冰冰領軍上陣，結果梗係搞到大陸甚至全亞洲都煲呢套劇李治廷就係憑呢鋪，正式落戶喺大陸搵食吸金，早排仲夥拍成龍拍動作電影，被成龍讚到天上有地下無！
雖然范冰冰冇幾耐就宣布「封盤」話同內地男星李晨拍拖，最終食唔住粒「冰」嘅李治廷，又唔好以為佢冇咗個碼頭就閉翳！查實李治廷都唔係洗腳唔抹腳嘅公子哥兒，佢勝在夠搏，除咗一劇接一劇，拍真人騷時就算天寒地凍都除衫晒肌，呢啲錢抵佢賺據聞佢仲係「慳神」一個，知慳識儉到基本上搵十蚊儲八蚊，平時就算返香港，十次有九次都係拖阿媽去飲茶行街，唔蒲唔wet唔爛玩，呢個幾乎「有入冇出」嘅理財方式，佢買樓投資都識得返番嚟香港，就知佢有計！
|
鍾意就快D Share啦！
|
|
|
