掃呢頁CODE去手機

2017年5月4日 星期四

鳳凰主播 $700萬入新地豪門 [壹週刊 - 1417 - 財經] __,M1,

郭炳聯及太太劉寶賜對這位來自北京的新抱寵愛有加,二人已榮升為爺爺嫲嫲。中環人語鳳凰主播 $700萬入新地豪門在中環OL界有個說法,有個想釣金龜女仔,朝 ...


郭炳聯及太太劉寶賜對這位來自北京的新抱寵愛有加,二人已榮升為爺爺嫲嫲。

中環人語

鳳凰主播 $700萬入新地豪門

在中環 OL界有個說法,有個想釣金龜女仔,朝朝早搭車上山頂附近跑步,旨在結識富二代,近水樓台先得月永遠都 work嘅,嗱,千億新地郭氏家族第三代,郭基泓( Christopher)與老婆就在美國史丹福大學認識,小宗打聽到呢位郭太原來是鳳凰衞視主播——趙情晴( Rachel),二○一三年就去咗 Stanford讀咗一年書做 Visiting Scholar,咁啱 Christopher又喺嗰度讀 MBA因而擦出愛火花,但要進身豪門之列,都要睇埋背景嘅,趙情晴貴為鳳凰美女主播,名氣夠晒,聽講其父為京城軍方醫院的院長,又點會唔門當戶對呢,郭、趙兩家火速對親家後,舊年仲抱埋孫女添,老爺奶奶都好錫呢位來自北京的新抱,對她寵愛有加。此亦有見於去年郭基泓向港交所申報,以五億元增持新地股份,妻子趙情晴( Zhao Qing Qing)都有名㗎,而她個人名義亦持六萬股新地,市值七百萬,莫非是入門利是?

趙情晴( Rachel)在北京出生,曾是鳳凰衞視美女主播之一。

年僅三十歲的郭基泓,是郭炳聯的幼子,去年出任新地執行董事。

2013年趙情晴到史丹福大學讀書,郭基泓也在該大學取得工商管理碩士。

揀酒知年紀

貴為馬會名譽遴選會員( Honorary Voting Members)的許世勳,五十年代已養馬,老人家唔單只識馬,仲係識酒之士,講到明無一百分嘅紅酒唔會飲,有時一百分都唔止,仲要飲產量少,貴其他一百分酒莊三倍嘅 Petrus,別以為佢招積,佢今年九十過外,識計數嘅,仲飲得幾多年呢,梗係搵支靚嘅飲,所以每逢許世勳出席賽馬日都好受歡迎,唔少世姪都走到呢位 uncle個包廂,黐啲靚酒飲吓。

許世勳(左二)已九十六歲,是馬會七名名譽遴選會員之一。

聽說許世勳早年收藏不少靚紅酒, 1982 Petrus是其中之一。

中環寸嘴 要學賭王晒冷推牌!

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

迪士尼擴建撥款五十五億喺立法會審議,我睇電視𥄫到實,雖然班尊貴議員識得嗌「喪權辱港」口號,但都係唔識 quantify嚟到講;四民排位——所謂「士、農、工、商」,作為一介商人,我哋好低等嘅啫,不過我可以大膽講香港啲官都未見識過大美國主義作風,何來同美國佬拗手瓜?呢個蘇錦樑仲爆響口,傾迪士尼個 deal,對家話:「 Take it or leave it!」家陣香港班官同晚清時期割地求和有乜分別?割完個香港島俾英國,再賠二千一百萬白銀,之後再租借界限街以北,深圳河以南!

唉,我睇唔到坐喺迪士尼董事局班官(包括:陳茂波、陳家強、馬紹祥及朱曼玲)有乜談判實戰經驗,冇為香港人爭取過乜嘢,淨係識兩道護身符——尊重合約精神,即係世世代代唔使改,第二就係商業秘密,即係乜都唔使交代。都係田二少鬧得好,蝕住錢仲要嘔大筆管理費、專利費俾迪士尼,鄭重同啲官講話:「大家記着,我係哈佛 MBA嚟㗎!」我哋呢啲人,自細住半山嘉慧園,出入鄰居,最低級都係跨國公司東南亞主管,小時候同鬼仔、鬼妹喺屋企玩,食茶點、飲杯奶、食件餅,好似 Donald Trump話齋 smart cookies(醒目仔)。出差同鬼佬打交道點會蝕章?如果唔係今時今日仲企得住咩。硬係唔明祖國咁強大,自己都要扯白旗嘅?講咁多我都係要證明一個 point,香港都仲係以為英式教育下先至係人才!

預留塊地俾迪士尼擴建,又唔俾國際級主題公園競爭,例如 Legoland,跟晚清時割地求和冇分別。

班官同迪士尼周旋應該好似賭王咁,晒冷一鋪推牌,以回應佢講話:「 Take it or leave it!」

Donald Trump都讚金正恩係 Smart Cookies(醒目仔),呢個詞語真係幾老餅,不過都令我有童年回憶。

香江第一女強人

虎父無犬女。楊元龍位掌上明珠楊敏德確係女強人。《明報》透過查冊得知,楊敏德兩姊妹間 BVI公司 Prescill Holdings Limited借咗 300萬元俾鬍鬚曾做競選經費,咁仲唔係食咗豹子膽?

阿爺唔單只擺到明唔妥鬍鬚,仲三口六面喺西環同老虎女講清講楚,叫佢唔好撐鬍鬚。點清楚法?

老虎女間公司食年夜飯,擺定枱等老細到。誰不知等吓一個鐘,再等吓又一個鐘;等到幾乎十點鐘,酒樓都差唔多閂門啦,老細至由西環趕到嚟。咁你話叫佢唔好撐鬍鬚番說話講得清唔清楚啦。但有用咩?老虎女所有生意喺晒上邊,都企得咁硬,此又能不叫其他 777條友汗顏?

楊敏德夠硬淨,莫非畢業於麻省理工學院的她,與浸過鹹水的鬍鬚曾啱嘴型啲?

選舉完畢後已鮮有露面的曾俊華,五月中會出席一個劍擊慈善賽做嘉賓,到時看他是否魅力猶在。


鍾意就快D Share啦!