噚晚《歌手2017》終於舉行咗總決賽，由開賽前借張敬軒製造話題，到教唱歌嘅杜麗莎都喺早段被foul出局，嗰節目係點……大家心照。決賽總共8位歌手，其實焦點就只係得兩位：哈薩克籍歌手迪瑪希同香港天后林憶蓮，最終都係由佢哋壓軸出場。嗱，先講迪瑪希，佢嘅嘅學習能力真係好高，雖然只係參加咗一季，已經熟悉晒喺大陸比賽嘅技巧，決賽唱咗四首Michael Jackson串燒歌，除咗X叫歌技，仲有跪地chok樣、無啦啦走去打鼓，又搵咗兒童合唱團出嚟唱和音，可以話用盡舞台，綜合得票率只係得18.47%。但唔係屬於你嘅始終唔係你，林憶蓮決賽邀請咗台灣天后張惠妹合唱《也許明天》，兩個平靜對唱，憶蓮甚至有時俾張惠妹歌聲蓋過，都可以有22.74%綜合得票率，壓倒性贏咗迪瑪希。其實憶蓮係《歌手2017》季前嘅宣傳片，話過「我不喜歡光環」（新聞連結： http://bit.ly/2iTsWZy ），最終呢個光環，都係落咗喺佢身上，得獎後佢喺台上感言：「我真的要感謝每一位觀眾、歌手，他們是那麼給我很多靈感。」呢集比賽仲有一個笑位，話說蕭敬騰 嘅獅子合唱團搵咗徐佳瑩同吳建豪幫唱，原本同徐佳瑩合唱時好地地，不過中間吳建豪突然走出嚟，企到最前rap，又揈手揈腳咁喪跳喪「up」，搶咗焦點之餘，仲破壞咗成個氣氛。
來源 source: http://s.nextmedia.com
|
鍾意就快D Share啦！
|
|
|
