樓市越升越有，荃灣新盤兩房單位亦要過千萬，不過依然有勇者無懼入市，仲要一買就過億。呢個勇者，就係15年港姐季軍郭嘉文。郭嘉文舊年俾蘋果讀者「爆相爆片」影到同李澤楷蜜遊日本。二人戀情隨即被踢爆。今日有報道指原住馬鞍山屋苑嘅郭嘉文，日前以個人名義，購入九龍塘逸瓏天池屋，成交價1.068億元，呎價近5萬元。一度創項目呎價新高。本報曾致電郭嘉文求證，郭未有回覆。《蘋果》記者今日問李澤楷係唔係同郭嘉文交往?送贈1億豪宅，李澤楷以短訊回覆：「Have a good evening!Richard!」記者祝李澤楷生活開心，佢話：「Same to u!」記者再講可以公佈任何喜訊，請通知，李澤楷禮貌以ok手勢同合十手勢嘅emoji回應。郭嘉文購入嘅單位，係5座頂層單位，實用面積2,188平方呎，另有天台，面積1,855平方呎，天台設有泳池，原業主放盤時，曾開放單位俾傳媒拍攝，內附有豪華裝修。根據土地註冊處顯示，該單位買家為郭嘉文，資料顯示未有做任何按揭。睇番臨時買賣合約，代表買家簽訂文件嘅人，就係盈大地產副主席及行政總裁李智康，而李智康一直係李澤楷嘅愛將，同李澤楷拍緊拖嘅郭嘉文，順理成章就係今次億元屋嘅買家。話晒郭嘉文當選港姐後同無綫簽咗8年長命約，以佢喺大台人工，未必能夠通過銀行壓力測試。據知港姐每月有一千六百蚊車馬費，本來唔止㗎，起薪點接近三萬，但後來無綫取消港姐在任期間一萬元月薪，變成一年兩萬蚊車馬費，主要靠廣告同商業演出先至有收入。咁依家郭嘉文單係俾首期都要俾幾千萬，唔通24歲郭嘉文真係生財有道？《蘋果》第十二屆金話梅電影選舉（Golden Plum）又嚟喇!由今日起，請在以下網址（http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。
