現年31歲嘅Cookies餅女楊愛瑾（Miki）同經歷8年風雨嘅永安太子爺郭永淳於上年4月30號修成正果，簽紙結婚，佢更喺11月宣佈同老公成功「搞出人命」，陀B 3個月。準媽媽Miki喺陀B後仍然活躍，不時外出，日前某晚9點半左右，見到佢同老公拖住手，同行仲有3大1細朋友喺銅鑼灣現身，已經見肚嘅Miki同郭永淳全程拖實，郭永淳邊行邊回頭同朋友傾偈，見Miki心情唔錯，佢着住波鞋，行得好輕鬆，步速亦頗快，睇落好似趕時間咁。一行數人行到去一個咪錶位上車，當晚由其中一位男友人揸車，另一男友人坐喺司機位旁，Miki兩公婆同剩低嗰1大1細朋友坐後座乘客位。Miki企喺路邊開咗門企定腳，郭永淳兜去另一邊上車，坐喺後座中間，Miki見老公上咗車先坐上去，後嚟上齊人就開車走。睇番架車嘅資料，架車係2009年出廠嘅Benz E63 AMG，o依家二手價都要約40萬港幣左右，登記車主係一間私人公司，公司董事係一名姓丁嘅男士。《蘋果》問Miki陀B陀成點，佢以短訊回覆話：「最近身體幾好呀，多謝關心！」仲補充多幾句：「之前唔係好舒服，近呢個月身體好番好多，食番多啲嘢，冇之前咁攰，所以多咗出街散步。」咁就好喇，陀B最緊要心情好、食得好又有運動，阿B一定好精靈！
| （採訪、攝影：梁繼光、朱志聰） | | |
| | | |
來源 source: http://s.nextmedia.com
|
鍾意就快D Share啦！
|
|
|
