今年38歲嘅藝人林雅詩（Grace）息影多年，前年突然復出推出性感寫真集，仲經常出席活動，但背後爆出原來同結婚逾十年嘅圈外老公溫文英感情有問題，同年仲因溫文英被拍得當街啜爆「小三」，令她終於忍痛單方面搞離婚，但對方一直唔肯簽字，令二人為離婚一事對簿公堂，她更多次表示同與老公住緊西貢愛巢，但就已經分房瞓多年！
點知Grace突然喺社交網站話有人每日用說話打擊自己，仲被趕出家門，令佢有輕生念頭：「女人唔易做，點解有啲人離婚，老婆還可以生活好好，點解佢可以咁XX，我每日為生活而努力，佢每日畀說話我聽打擊我，屋我是可以住，現在要趕我出屋，扣左扣右，離婚就甚麼也不需要負責，唔知以為畀好多。本想從屋跳下來，可惜只得2層樓，太矮了，心痛得狠。。。」而東網打咗好多次畀Grace，但Grace都冇覆機，完全失去蹤影，連好朋友都聯絡唔到佢！
緋聞男友證唔開心
同時東網收到讀者爆料，聲稱係Grace嘅鄰居話：「大約6點幾，我架車返屋企見到林（林雅詩）坐喺窗邊，跟住畀佢老公拉返入屋跟住好嘈。林好似想跳樓，嚇死人。」而東網去過Grace位於西貢嘅寓所，都未見佢芳蹤。
Grace經理人兼緋聞男友馬天樂尋日下午接受東網電話訪問，表現不欲多言，話都搵唔到Grace：「我都聯絡唔到佢。（佢呢排唔開心？）都有，最主要都係關於佢同佢老公離婚官司嘅嘢，佢一直都覺得好困擾。」直至尋晚九點，馬天樂再代Grace回覆東網：「佢依家OK。（佢依家點？）呢方面唔方便透露。」
爆老公畀5千蚊家用
其實Grace復出娛樂圈初期，已經傳出婚姻有問題，仲被多次發現出入醫院，包括因手腕經常離奇受傷等。而佢正式復出前，曾被發現經常喺微博上載𠝹手相同寫下充滿情緒性留言，但佢聲稱唔係本人同否認患有情緒病，而佢亦承認飽受唔少壓力，要靠安眠藥入睡。另外，佢曾對外表示老公之前每個月只係畀5千蚊家用，仔仔嘅所有費用，包括課外活動同學費，每次都要開單畀佢實報實銷。
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
