2017年1月1日 星期日

【不斷更新《叱咤》頒獎禮】 欣宜戴「肥姐」眼鏡唱《女神》 再次多謝媽媽 __,女神,欣宜,

今屆叱咤樂壇頒獎禮假座會展舉行,大會主題係「忘我,不忘本」,將頒發43個獎,如果今晚祖兒再奪女歌手金獎,將創下11年霸紀錄。原本有指陳奕迅今晚將不出席,但到頒發至尊歌曲大獎時,Eason突然出現,至於上次缺席《新城勁爆》嘅祖兒同許志安都會出席。叱咤樂壇我最喜愛的歌曲大獎最後五強,包括JW《矛盾一生》、方皓玟《你是你本身的傳奇》、陳柏宇《沒有你,我甚麼都不是》、鄭欣宜《女神》及謝安琪《山林道》。今年 ...




其他影片:>>






今屆叱咤樂壇頒獎禮假座會展舉行,大會主題係「忘我,不忘本」,將頒發43個獎,如果今晚祖兒 再奪女歌手金獎,將創下11年霸紀錄。原本有指陳奕迅今晚將不出席,但到頒發至尊歌曲大獎時,Eason突然出現,至於上次缺席《新城勁爆》嘅祖兒同許志安都會出席。叱咤樂壇我最喜愛的歌曲大獎最後五強,包括JW《矛盾一生》、方皓玟《你是你本身的傳奇》、陳柏宇《沒有你,我甚麼都不是》、鄭欣宜《女神》及謝安琪《山林道》。今年「我最喜愛的歌曲」有兩輪投票,首輪投票會於晚上八時截止。點票後,會先篩選高票數的歌曲,晉身次輪投票。若然於首輪投中,有歌曲得到過半數票數支持,則毋須次輪投票。而「我最喜愛的歌曲」最後兩強,分別係方皓玟嘅《你是你本身的傳奇》,同鄭欣宜嘅《女神》。22:35:叱咤樂壇至尊歌曲大獎:陳奕迅《四季》,原來話唔現身嘅Eason突然從後台步出台前,作曲的周國賢、作詞的小克都有上台,編監CY Kong缺席。Eason話:「大家可能有聽過傳聞,本身個獎唔係我嘅,我真係冇搶番嚟,多謝蔡穎恩,佢係原本嘅主唱嚟。多謝CY突然身痕攞去英國編曲。」Eason又話:「希望大家好似呢隻歌咁,呢隻歌本身係勵志歌,有咩唔開心,經歷幾多季都好,都可以再重拾心情,重新出發,希望大家feel到。」喺唱歌嘅時候,Eason兩度忘詞,第二次忘詞仲大叫:「So bad.」唱完後喺台上苦笑。22:29:專業推介叱咤十大第二位:張敬軒《羅賓》,佢喺台上多謝一眾嘅幕後團隊:「特別多謝Wyman,每一次交畀佢嘅旋律都得到善待。將呢首歌送畀所有幕後嘅『羅賓』!」22:17:專業推介叱咤十大第三位:鄭欣宜《女神》,佢上到台,拎出一副同媽媽肥姐嘅眼鏡好似嘅眼鏡,戴上之後全場拍掌,佢話:「9年前,我失去一個同我相依為命,佢係我生命中最重要,最重要嘅一個人。佢過咗生後,我同佢講『我會爭氣,我會乖』。」欣宜講到眼濕濕:「失去咗佢後,我問自己點做到佢咁樣,我講咗出嚟,我唔似得佢,我唔識講嘢,唔識對人。I am so akward,我唔識點樣表達,我要努力做好我嘅工作。」唱歌嘅時候喊到甩咀,全埸幫佢打拍子。22:11:專業推介叱咤十大第四位:C AllStar《聲音騷了》,佢哋話:「出道7年、9隻碟、71首歌,今日終於拎到叱咤十大。呢首歌係我哋新嘅風格,喺出邊反應都好兩極,好多謝大家支持同播呢首歌,令我哋會去試新嘢!」22:02:專業推介叱咤十大第五位:吳業坤《百姓》,坤哥上到台冇喊,佢話:「好多人問我,如果有機會上台會唔會再喊,我話唔會,因為我本身唔係一個好表露自己感情嘅人,真心嘅。」佢又解釋,上年係因為好多嘢加加埋埋先喊晒出嚟。坤哥又話:「16年好精彩,好多開心唔開心嘅事。有人問我,想唔想上台攞獎,我緊係話『平常心』,但係我好驚,唔係驚冇獎攞,係驚有人去喝倒彩。」佢又話:「好多網民,市民送咗我一程,一個好漂亮嘅旅程,送咗我上一架超速嘅紅van,去咗多好地方,應該係時候落車,再行,希望每一年坐喺下面,繼續做廣東歌。」

21:53:專業推介叱咤十大第六位: 許志安《非安全地帶》,佢上台時仲叫埋Dear Jane一齊,仲話要綁鞋帶先,之後佢就話:「今年同好多Band合作,除咗Dear Jane之外,我仲要多謝觸執毛、Supper Moment同Rubberband。」佢仲話第一次上台係98年《愛你》拎叱咤十大第十位,不過就人有三急去廁所,出到嚟仲冇機會唱歌,第二年99年光仔當住其他歌手同我講:「去廁所要問過佢!」21:45:專業推介叱咤十大第七位:方皓玟+RubberBand《終於好天氣》,方皓玟再次上台,RubberBand Bass手阿偉多謝舊唱片公司,又講笑話要為自己公司賣下廣告。主音6號講到哽咽:「今年係好快樂嘅,我覺得做音樂,或者任何事情都要搵最初份熱情。」最後6號更多謝太太Tim Lui。21:38:專業推介叱咤十大第八位:容祖兒《無人知道雙子座》,祖兒話:「好鍾意1月1號見到大家,因為好有歸屬感,其實我上年出咗一隻廣東碟,冇機會宣傳,o依家除咗演唱會真係好少機會唱歌。好多謝大家播我嘅歌,每一次返到嚟一開收音機聽到我嘅歌,就知大家都記得我。今年係我第18年參加,好多謝你哋你畀我一齊玩。」21:29:專業推介叱咤十大第九位:小塵埃《卜卜卜》,Pollie喺行上台嗰時,已經喊咗出嚟,講感言嗰時Pollie都係喊住講:「喺呢個台攞獎,應該係好多睇電視嘅人都一定會幻想過,自己攞獎要多謝咩人,細個一定有幻想過,呢一刻好唔真實,多謝生我哋出嚟嘅屋企人。」Pollie亦多謝香港不同Live House提供場地畀佢哋演出。另外,Pollie亦多謝監製李一丁,門小雷幫手設計CD封套。唱出《卜卜卜》前,Pollie好可愛咁問Jonathan:「我哋係咪唱《卜卜卜》?」之後又提Jonathan未tune好結他。

21:23:專業推介叱咤十大第十位:林奕匡《愛情小品》, 林奕匡:「愛情好簡單,最簡單可以真誠真心就可以最開心,好多謝製作人員、工作人員。2016係成長嘅一年,有開心、有唔開心、有挑戰,希望2017年繼續成長。」21:11:黃偉文、鄭欣宜同Supper Moment一齊上台,準備唱出《女神》,而喺開始唱之前,黃偉文話:「我從來都唔信拉票嘅,講一個故仔,好多人問點解會有呢隻歌?,呢件事我籌劃咗20年,我以參加電視節目錄影,冇人識好怕醜,主持人肥肥走去幽暗嘅角落同我講嘢,話:『你件衫好靚喎,喺邊買㗎?』我就好開心有人同我講嘢,我仲同佢講:『我著得落你都著得落。』我好好彩,十幾年後遇到佢個女,點解要講呢個故事,20年嘅大報恩。」唱完歌之後,欣宜就話:「多謝咁多位投我票嘅人,我有得喺呢到唱歌,我已經覺得自己贏咗㗎喇,我好開心,多謝同台嘅Supper Moment,佢哋係我喺呢兩年識最好嘅朋友,多謝藍奕邦,黃偉文。」21:06:方皓玟喺台上唱出《你是你本身的傳奇》,唱到中途落淚,喊住多謝佢嘅四大監制。20:59:我最喜愛的歌曲最後兩強現身,分別係方皓玟嘅《你是你本身的傳奇》,同鄭欣宜嘅《女神》。

專業推介叱咤十大第五位:吳業坤《百姓》 專業推介叱咤十大第六位: 許志安《非安全地帶》
專業推介叱咤十大第七位:方皓玟+RubberBand《終於好天氣》 專業推介叱咤十大第八位:容祖兒《無人知道雙子座》 專業推介叱咤十大第九位:小塵埃《卜卜卜》
專業推介叱咤十大第十位:林奕匡《愛情小品》

來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...