掃呢頁CODE去手機

2017年1月5日 星期四

大劉溫莎情意結 [壹週刊 - 1400 - 財經] __,大劉,劉鑾雄,M1,

畢業於Windsor大學的劉鑾雄,被同學譽為「Windsor大班」。中環人語大劉溫莎情意結華置(127)近幾年不斷出售旗下物業,不過就唔捨得賣銅鑼灣的皇室堡(WindsorHouse),去年更從上市公司收歸入私人口袋,大劉還沿用置地八十年代WindsorHouseLtd的公司名來持有。大劉對Windsor其實有個情意結,七十年代佢喺加拿大WindsorUniversity讀數學,聽佢一位同屆同學仔 ...


畢業於 Windsor大學的劉鑾雄,被同學譽為「 Windsor大班」。

中環人語

大劉溫莎情意結

華置( 127)近幾年不斷出售旗下物業,不過就唔捨得賣銅鑼灣的皇室堡( Windsor House),去年更從上市公司收歸入私人口袋,大劉還沿用置地八十年代 Windsor House Ltd的公司名來持有。

大劉對 Windsor其實有個情意結,七十年代佢喺加拿大 Windsor University讀數學,聽佢一位同屆同學仔講,大劉讀書時「溝女」一如其做股壇狙擊手一樣,盡顯「快、準、狠」本色,大劉老豆當時唔係咁富貴,有時零用錢未匯到,等唔切江湖救急都要問朋友仔度住一百幾十蚊加紙,話就話係借住嚟入油,一缸油打爆都係廿蚊,剩低嘅就用嚟做溝女經費,揸住架二手車直剷上去寶詠琴就讀嘅 Waterloo大學。七十年代香港女喺嗰邊好矜貴,事關父母通常供仔唔供女讀書嘅,大約廿條仔對一條女,大劉一招「快、準、狠」自然冧死女,亦冧得掂呢個屋企專代理名牌嘅少爺仔喎,啲錢唔還都冇所謂。 Windsor大學靠近美國底特律( Detroit),當時中國仔最興揸車落去租鹹帶睇,怪不得連網上介紹此大學,都講學生喺 Windsor同底特律有多姿多采嘅夜生活!

八十年代皇室堡屬英資置地,以 Hong Kong Land(Windsor House) Ltd持有,一九八七年落入華置手上,去年再轉到大劉私人手上,

他則以 Windsor House Ltd持有。

以往不少報導指大劉與已故前妻寶詠琴就讀 Waterloo大學,但他並沒有刻意澄清,其實大劉畢業於 Windsor大學,最新加拿大排名為廿五, Waterloo大學排行第七。

介紹 Windsor大學的網站,也特別強調其夜生活多姿多采。

李秀恒傾力演出

廿年前,李秀恒接受本刊訪問,不惜「踎塔」上鏡,認真投入。

廠商會會長李秀恒反應夠快,急不及待伸個頭出嚟以「中華文化藝術推廣基金」撐「故宮」、撐林鄭;仲話自己及廿名富豪經常出外經商,在海外搜羅唔少古董文物,但苦無檔期展出以慶祝回歸廿周年;其實李秀恒做事一向投入,廿年前接受敝刊專訪,為介紹日本洗 pat pat功能廁所,也不惜犧牲色相,著住條孖煙囪上鏡,唔知李會長有冇收藏皇帝嘅尿壺呢?

中環寸嘴 我係公子中嘅公子

貴刊老闆喺佢專欄話我楊公子「老子寸得起!」,真係受唔起,我哋做人都係想安安樂樂嘅啫,星爺喺電影《唐伯虎點秋香》話齋「華勝」、「華強」受唔起,叫我「華安」得啦,一陣容乜易俾人剷我哋呢啲港英餘孽!我哋講嘢簡簡單單,絕不馬虎,一係直插 G-spot,一係畫龍點睛,唔好嘥大家時間嘛。

連咁有分量嘅文化推手都叫我楊公子,不過公子未免叫到「俗」晒,你估好似以前「麗春院」咁,嫖客都叫做公子咩?如果叫到俗晒,我唔怕自認係「公子中嘅公子」,我又唔係世家子弟,一生世襲,係要自己 earn返嚟㗎,即係個招牌生咗銹要自己省番令佢,嘻。肥佬黎你話我優哉游哉,我其實係苦中作樂咋,當你經歷過戴卓爾夫人仆街,喺香港揸住磚頭唔值錢,要去外國同家族開山劈石,嗰種求變、求生存嘅動力就好強,如果唔係咁,除咗漚臭,同條鹹魚有乜分別?我估肥佬黎作為文化推手,都好似推拿聖手咁,好用力咁去捽啲下屬㗎?

啲世叔伯成日同我講:「你老豆歎得少呀!」鬼佬成日寸我哋中國人 Live Poor Die Rich,到咗我呢個年紀,應該時常調校吓生活質素呀!做𡃁仔時,經常北美香港兩邊走,頻撲過度成日口擘擘,俾時差煎熬,唔補補佢好易冇。同大家分享昔日舊照,就知我講乜啦。

大學畢業即做東華三院「靚總」(右一),真係骨瘦如柴!

衰衰哋叫做喺多倫多大學畢業,後生個樣都有啲傲氣!

楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

鏞記樓上藏大鱷

今時今日做基金佬,仲坐喺度等股票升?潮流興 Activism,要主動出擊去劈錢返來;最近有條對沖基金大鱷,由紐約游咗嚟香港,就喺鏞記樓上設竇,名為 Lakeville Capital Management,目標正瞄準一間喺美國上市嘅公司——大陸旅遊網「去哪兒」 Qunar.com;話說「去哪兒」今年中接納一家私募基金收購並提出私有化,溢價只為公布時 15%, Lakeville揸弗人吳恒澤( Stephen Woo)插個私有化價格不公平( fairvalue),準備到開曼群島( Cayman Island)法院開拖,事關「去哪兒」雖然喺美國上市但在開曼群島註冊,私有化過程要遵循註冊地的《公司法》;呢條大鱷似乎都好熟悉開曼群島的《公司法》,佢寶號 Lakeville背後股東同樣在此群島註冊,喺開曼群島註冊嘅美股,只要 66%投票權通過即可,買方又唔使迴避,且容許同股不同權,今鋪要睇吓鏞記樓上呢條大鱷點同大陸公司「過招」。

今年五月才成立的對沖基金 Lakeville Capital Management就在鏞記對上的華威大廈。

Lakeville Capital的寫字樓,揸弗人吳恒澤曾是以紐約為基地的對沖基金 Gruss Capital香港負責人,專注重組、清盤及收購合併搵食。

美國上市的大陸旅遊網「去哪兒」,市值$44億美元。


鍾意就快D Share啦!