耳傷後，陳展鵬拍新劇《同盟》唔再搏命，大部分動作場口用老替，自己就坐埋一邊發呆。
娛樂偵訊
出爐視帝 陳展鵬忽然 Hea爆
憑着《城寨英雄》威勢，「拳佬」陳展鵬在週日舉行的《萬千星輝頒獎典禮》中，同「刁蘭」胡定欣拍拖得到視帝視后。
回帶睇番頒獎禮前夕，忙於為新劇《同盟》開工的陳展鵬，開工期間竟然瞌眼瞓，更突然錫身，將大部分動作戲交由動作替身頂上！
Hea成咁，莫非知道做硬視帝，坐定粒六！
耳傷有陰影
陳展鵬上月拍新劇《同盟》不慎傷耳，事後更須停工養傷，不過擔心拖累劇組的他，隔幾日便包住紗布復工；劇中有不少打鬥場面，陳展鵬都堅持親自上陣，搏到盡！
但早前出外景，陳展鵬卻突然錫身，大部分動作場口，都由替身頂上，還柄埋一邊發呆瞌眼瞓，其間有工作人員叫他試位，明明聽到的陳展鵬竟然毫無反應，繼續一尊佛咁坐喺度，令負責上前請他試位的工作人員，十分尷尬，幸好動作替身抵得諗，主動請纓幫手！
Hea足一粒鐘，陳展鵬才滿足，並如導演要求，拍了他全日唯一親自上陣的簡單動作場口。
「未整親耳仔前，煎 Pang真係搏到好盡㗎！有啲動作戲根本唔係佢能力範圍內做得到，佢都堅持要親身試，唔想隨便用替身，所以搞到周身傷晒！直到嗰次傷到要入院縫針，嚇親屋企人之後，煎 Pang就開始錫身，好多稍為複雜同有風險嘅動作鏡頭都唔再自己嚟，交俾替身搞掂算數！」劇組工作人員透露。
情侶檔搵銀
《城寨英雄》受歡迎，主角胡定欣和陳展鵬這對熒幕情侶，在《星和無綫電視大獎 2016》及《 TVB馬來西亞星光薈萃頒獎典禮 2016》早已先拔頭籌，拎埋視帝視后連中三元，不少內地商演、廣告商，紛紛邀請二人拍拖接 job，令荷包大有進賬。
「公司都想佢兩個拍住上，如果有商演，製作劇組會盡量配合放期。情侶出 show價錢特別高，加埋一對視帝視后，身價更加三級跳。煎 Pang一直都有睇樓，應該可以好快做業主！」一名無綫人說。
拍拖有賺
因為拍劇，被撮合成一對的大台小生花旦不計其數，情侶拍檔出騷，條件酬勞特別優厚，講心又講金，雙贏！
撰文、攝影、攝錄：娛樂組
|
鍾意就快D Share啦！
|
|
|
