今晚係無綫台慶頒獎禮，先係行紅地毯入場，爭妍鬥麗一番。爭奪視帝視后成大熱嘅陳展鵬胡定欣以壓軸姿態登場，而曾傳於台慶當晚糖黐豆又selfie令岑杏賢唔開心，翌日更宣佈分手嘅袁偉豪王君馨就一齊出場。胡定欣得獎呼聲高唱入雲，今晚佢件戰衣都博到盡，中門大開，非常性感。定欣就話：「佢哋話上年咁密實，好似好耐都冇試過性感，所以咪幫我設計呢套衫。我自己都想俾觀眾一啲特別感覺，好難得連續2年都有好角色去提名。」問到有冇諗過同展鵬一齊贏？定欣就話：「我都希望大家一齊提名一齊攞，希望今晚可以夢想成真。(多人期望得獎會唔會鍚鍚先？)唔知點解會變咗做娛樂節目，大家最緊要開心，冇綵排過。(問到會唔會結婚？)唔會，見到觀眾咁支持係開心，不過啲報道唔係真。」陳展鵬今晚係影帝嘅大熱門，佢仲話係最大機會嘅一年，咁有冇袋定得獎感受？佢話：「上年留咗好多俾機會我嘅人嘅說話都冇講，今年好幸運遇到城寨，如果真係拎獎要多謝佢哋。(問到佢有冇緊張？)咁又冇，係開心嘅事，做演員係追求共鳴嘅感覺，今年遇到好多人支持，已經好開心。」講到陳展鵬嘅一票投咗畀邊個，佢就話：「自己嗰票投咗俾祥哥(黎耀祥)一個演員一年要拍2、3套劇，又要保持水準，係好難嘅事，體力同集中精神都好緊要，所以投咗佢一票。(至於得獎之後係咪會求婚？)如果真係得到獎，如果又真係求婚，一定會話俾大家知，放心，但係暫時都係合作伙伴，大家要俾心機做嘢。」
來源 source: http://s.nextmedia.com
|
鍾意就快D Share啦！
|
|
|
