掃呢頁CODE去手機

2016年12月22日 星期四

威過祥哥 聚居灣仔 新添三奶同枱食飯 鄧兆尊平養三頭家 [壹週刊 - 1398] __,鄧兆尊,兆尊,M1,

12/12一拖三當日兆尊同車厘子喺灣仔接埋三奶同大婆Carmen去食飯。佢故意墮後陪住得寵三奶傾偈。兆尊邊行邊執佛珠唸經,唔通為一拖三求平安。娛頭威過祥哥 聚居灣仔 新添三奶同枱食飯 鄧兆尊平養三頭家將近五十歲的鄧兆尊,老豆是已故慈善伶王新馬師曾(鄧永祥),有錢有地位!作為星二代,幕前事業平平冇奇的他,拍馬都比不上伶王老豆,但感情生活,就青出於藍。新馬師曾先後有過四位太太,鄧兆尊亦唔弱,大婆Car ...


12/12一拖三

當日兆尊同車厘子喺灣仔接埋三奶同大婆 Carmen去食飯。佢故意墮後陪住得寵三奶傾偈。兆尊邊行邊執佛珠唸經,唔通為一拖三求平安。

娛頭

威過祥哥 聚居灣仔 新添三奶同枱食飯 鄧兆尊平養三頭家

將近五十歲的鄧兆尊,老豆是已故慈善伶王新馬師曾(鄧永祥),有錢有地位!作為星二代,幕前事業平平冇奇的他,拍馬都比不上伶王老豆,但感情生活,就青出於藍。

新馬師曾先後有過四位太太,鄧兆尊亦唔弱,大婆 Carmen,二房車厘子,再加祥嫂口中的骨妹三奶。在「老公」安排下,三房齊腳同枱食飯,融為一體!此情此景,真係連賭王都望塵莫及!

馭女有術,享受到齊人之福的至高境界,是鄧兆尊最大成就!

聯成一線抗阿三

近半百的鄧兆尊,多年來周旋兩個女人間,相安無事,但早前祥嫂爆料:「仲有一個係揼骨妹,揼揼吓就揼咗返嚟,唔使下下去骨場,佢(兆尊)又諗得到喎,唔知佢慳時間定慳腳骨力。」原來還有三奶。

和正印 Carmen一起接近廿年,之後入局有祥嫂口中傻夾戇、由助手變二奶的車厘子。十幾年來,在兆尊「教育」下,加上車厘子識分庄閒,兩女和諧共處,經常開心三人行。為了共抗強橫阿三,大婆二奶更連成一線,同仇敵愾。

祥嫂口中的骨妹三奶,據知八年前已跟兆尊搭上,近日更獲確認地位,高調現身;上月,兆尊便撇低正印同阿二,拖住阿三到觀塘出席朋友喜宴。

一頭短髮,身形大隻的阿三,「大媽」味濃,偏奀瘦的兆尊,口味貫徹,喜愛肥膩。

二房車厘子 mark實兆尊。冇乜偈傾的大婆同三奶,俾面兆尊都要坐埋一枱,幸好成餐飯相安無事。

食完飯,聯同一線服侍兆尊的大婆同車厘子,夾住兆尊返永祥大廈,唔俾佢送得寵三奶返家。

大婆 Carmen對三奶唔多理睬,全程只同車厘子傾偈。

上月兆尊一拖二帶住大婆同車厘子睇趙學宜個唱,三奶未獲批出席公開活動。

坐住身邊陪打牌

飲宴當日,兆尊帶住三奶與一位麻雀腳一齊前往酒樓,途中三奶同女友人煙癮起,兆尊於是停低企埋一邊陪「打邊爐」。二人過馬路手拖手,行又繑住,對比跟大婆同二房出街,一副愛理不理的兆尊,明顯偏愛阿三。

上到酒樓,兆尊與三女友人開雀局,長得有幾分似祥嫂的三奶雖然有股掩不住的霸氣,但對住兆尊,全程乖乖在身邊陪打牌,好小女人。

上月底,兆尊揀三奶陪伴去飲宴,冇大婆二房𥄫住,兆尊同三奶甜蜜蜜拖手過馬路。

三奶乖乖坐喺側邊睇佢打牌。

三奶個樣,有幾分似祥嫂。

一皇三后完美示範

打麻雀唔驚三娘教子,同時間踏三船的兆尊,更有本事令三個女人,痴痴呆呆,坐埋一枱。

本月中下午,單拖離開寓所永祥大廈的兆尊,先到灣仔會合二房車厘子去維園行工展會,行到黃昏,二人便同到灣仔駱克灣一唐樓,接埋阿三。多隻香爐多隻鬼,寵幸被分薄,但車厘子超識做,對住阿三,面口相當寬容。三人之後再接埋在附近 stand by的大婆 Carmen,兆尊完美示範一幕男人葡萄死的一皇三后場面。

13/12

車厘子大方到同兆尊一齊陪三奶掃貨,仲幫眼揀衫。負責埋單的兆尊,幫三奶孭埋戰利品,有風度又照顧周到,難怪可以三房共融。

三奶同樣大 Size,當日買衫飛埋釘,似乎唔鍾意戴 bra。佢樣貌除有幾分似祥嫂,同大婆氣質亦相近。

16年

同屬暴乳類

當年同兆尊甜蜜行街的大婆 Carmen未膨脹,上圍豐滿,都算靚女一名。依家一把年紀,仍愛作少女打扮。

07年

車厘子冇樣腰又粗,但有胸,合乎兆尊口味。

拍《皆大歡喜》而力追巨咪陳彥行,可惜近水樓台都得唔到月。

四人卡座兆尊點揀

一拖三,浩浩蕩蕩去搵嘢食。兆尊馭女有術,雖然最錫三奶,但為免另外兩女打爛醋埕,全程雖然墮後陪住阿三行,但就唔夠膽拖手。

身邊人開完一個倉又一個倉,花了不少時間,才接受二奶車厘子的 Carmen,對三奶出現,明顯抗拒。當日所見, Carmen和三奶冇乜交流,亦冇埋身接觸。

返永祥阿三冇份

「一家四口」最後去了一間平民飯店開飯,四人卡位如何分配?醒目兆尊選擇了最順得人,大細房都夾到的車厘子同坐,無兩句的大婆和三奶焗住坐埋一邊;雖然大細兩房無偈傾,但能夠同枱食飯,相安無事,兆尊真係掂。

飯後, Carmen同車厘子夾實兆尊返永祥大廈,被撇低的三奶先扯支飯後煙,再獨自返回距離永祥大廈不遠的駱克道寓所。

三房能夠共融,兆尊本事之外,其女人湯丸的性格亦是關鍵。

「 Carmen係沈嘉偉個親戚(表姐),開時裝店,兆尊一直好 support佢,又另外打本俾 Carmen做其他小生意。 Carmen亦放唔低兆尊,就算當年出現車厘子,亦因為唔捨得,最後都接受咗。

「兆尊份人除咗花弗,其實脾氣好,對女人又細心,又肯(遷)就;佢照顧晒三房生活費,亦唔大細超,有俾錢支持車厘子同三奶搞吓小生意。呢幾個女人又唔求攞 Hermes、住豪宅,我哋班朋友都笑兆尊使少少錢養幾頭家,抵到爛。」兆尊身邊友人說。

10/12

有大婆就有車厘子,最重口味的二房,祥嫂口中傻夾戇的車厘子,拑實個男,又湊掂大細房,佢最有計就真。

一拖二食晏後大婆走先,兆尊陪車厘子返菲林明道愛巢攞行李喼,照顧周到。

11/12 

獨霸睡衣兆尊

冇乜細藝嘅兆尊,呢日著住似睡衣嘅裝扮出街,全程車厘子獨佔,陪佢剪髮,然後孖住去食車仔麵。

有指大婆 Carmen是 I.T老闆沈嘉偉的親戚。

二廠最有辦法

除咗女人,兆尊孖弟妹同阿媽爭產,一度轟動全城。

大婆最長情,阿三最得寵;祥嫂口中傻夾戇的二房車厘子,雖然夾正中間,但做過助手湊慣人又搞得掂兆尊,更可以穿梭大細房之間。

識做的車厘子,陪 Carmen行街食飯,轉頭又陪三奶 shopping,左右逢源。連日所見,兆尊無論跟大婆外出,抑或去見三奶,車厘子都有辦法將自己安插其中;而無論三人定四人行,她總是可以爭取到幾粒鐘二人世界。

鷸蚌相爭道理應該識啦,所以三女之中,二房車厘子最有辦法。

安置灣仔 平養三房

身家億萬的兆尊,將三房全安置住灣仔舊樓,方便見面,又唔重皮。

大婆 永祥大廈

大婆同兆尊同居阿爸剩落嘅永祥大廈。

二婆 菲林明道舊樓

二房車厘子住灣仔菲林明道,間唔中亦在永祥大廈過夜。

三婆 駱克道舊樓

住灣仔駱克道的三奶同二房只係隔籬街,由永祥大廈行去二、三房屋企,只需十分鐘路程。

祥哥四段婚姻

有慈善伶王之稱的新馬師曾,先後有過四段婚姻。首任妻子梅麗芳因性恪不合離異,跟第二任妻子梁添添的一段婚姻亦十分短暫,梁因肺病早逝,當年只得 29歲。第三任妻子賽珍珠,是粵劇二幫花旦,跟祥哥分開後,帶着三個兒子移居英國生活,但十分低調,並不活躍於當地華人社會。 97年祥哥病逝,訃聞中雖有賽珍珠所生的三個兒子及四個孫兒女名字,但全部缺席喪禮。至於第四任妻子「祥嫂」洪金梅, 20歲認識祥哥並共賦同居,誕下兩子兩女包括兆尊、兆榮、小艾及碧玉。 92年,二人註冊成為正式夫妻,但祥哥病逝卻爆發爭產,一家人為錢反目。 06年,四子女出席祥嫂 61歲壽宴宣布和好後,去年又告決裂。

祥嫂是祥哥唯一註冊結婚的老婆。

祥哥的第三個老婆

賽珍珠

與賽珍珠所生長子

鄧兆楷

孫仔

鄧梓源

雙尊爭食車厘子

鄧兆尊三條 Queen中,二奶車厘子得來不易。車厘子原是安德尊助手兼女友, 01年,同樣喜歡重口味的鄧兆尊硬撬牆腳,結果爆發「雙尊爭子」騎呢爭女戰。

移情兆尊初期,車厘子仍以助手身份照顧安德尊,三角關係一度糾纏不清。

靠老豆食過世

一直在大台做配角的鄧兆尊, 94年加入無綫拍過幾部處境劇,其中以《皆大歡喜》及客串電影《國產零零漆》最為人有印象。 97年,祥哥逝世留下位於灣仔永祥大廈、西貢四萬呎地皮以及筲箕灣楚留香酒樓等物業,一家人爆發爭產戰,四兄妹跟母親祥嫂對簿公堂,四兄妹最後獲勝訴得九成永祥大廈業權,並於 03年以接近一億賣出。向來喜歡投資股票的鄧兆尊,往後專心做投資買賣。 04年,將位於筲箕灣地鋪賣出套現 700多萬,加上多年前以接近 1300萬賣出的羅便臣道豪宅,鄧兆尊靠父蔭,食過世。

老豆的作品版權,也是鄧家收入來源之一。

齊人唔易做

男人可以分身享齊人福的,大部分都是有米之人,如賭王何鴻燊、大劉劉鑾雄、已故華光航業集團董事長趙世光,到後起的洗米華!但可以做到鄧兆尊咁一拖三出街,身邊女友坐埋一枱相安無事,冇幾人!

何鴻燊

賭王有四頭家,大時大節要逐房交人。 10年底,二、三房曾夾攻與四房梁安琪爭澳博股權。近年因為賭王身體問題,大部分時間長駐養和,家產分配好,四房爭寵才稍為平息。

劉鑾雄

近年大劉身邊有呂麗君和甘比兩位紅顏服侍,兩房亦各自替他生下一對仔女,上月大劉公開宣布,兩年前已與呂麗君分手,又跟甘比正式註冊結婚,兩房鬥爭告一段落,甘比坐正成為劉太勝。

趙世光

趙世光與元配何琍琍育有四名子女; 93年,戀上前亞姐譚玉梅,二人關係長達十年,直至 04年趙世光中風,譚玉梅出局後,又爆出他原來早有一紅顏程秀麗並育有一對子女。今年七月趙世光病逝,隨即引發爭產案,爆出前秘書劉園園身份是「三奶」。

洗米華

有樣有錢的洗米華貪戀 Mandy Lieu,又要𢱑爆頭氹洗米嫂 Heidi,不過做齊人夢粉碎,去年 12月,正印 Heidi主動申請離婚,但洗米華卻不肯簽字,還努力求復合。

撰文、攝影、攝錄:娛樂組


鍾意就快D Share啦!