熱爆娛樂: 生晒 40吋巨腩　阿徐篤住 Eason日行 10公里地獄減肥 [壹週刊

2016年5月26日星期四

生晒 40吋巨腩　阿徐篤住 Eason日行 10公里地獄減肥 [壹週刊 - 1368] __,阿徐,陳奕迅,Eason,徐濠縈,M1,

陪老公做運動，貼身衫打扮的肯亞徐全程行得好輕鬆，但 Eason就攰爆！更熱到除埋衫晒巨腩。

娛頭

生晒 40吋巨腩　阿徐篤住 Eason日行 10公里地獄減肥

巡唱兩年，賺過 3億的陳奕迅，個個週末做「陳永安」，不但荷包腫脹，連個人都愈忙愈脹！

有錢都要有健康，見老公佗住 40吋巨腩， fit爆的肯亞徐，為對方身體着想，惟有親自落場，篤住 Eason地獄減肥。不過，四年前韌帶受傷留手尾， Eason唔跑得，阿徐惟有改變計劃，陪老公日行 10公里瘦身。

日前，兩公婆孖住玩「特急行」， Eason行到除晒衫，現出 40吋巨腩。咁啱跑步經過的許志安，都忍唔住，郁手摸！

腳傷唔跑得

過去幾年，不停世界巡唱的陳奕迅，忙到爆！但體重卻不減反升，眼見老公快將四十二歲， fit爆的 E神嫂徐濠縈為免老公過肥出現中年危機，近月積極篤住 Eason日行 10公里，進行地獄減肥。

本身是長跑健將的肯亞徐，為配合有腳傷的 Eason，編好一套行山路線，只要 Eason在港，便中午出發，日日行十公里。

肯亞徐的督促下， Eason雖然未至於日行山路六粒鐘的發哥，亦開始有成績，開始減磅。

「其實 Eason都嘗試過跑步，但佢之前左腳韌帶受傷做過手術，醫生唔贊成佢跑步，提議 Eason行山同游水！阿徐知道老公無乜耐性，所以寧願犧牲自己練跑時間，陪 Eason一齊行，佢仲捉老公去跟黃佩霞做瑜伽！做咗一段時間， Eason比舊年瘦咗好多！」知情者說。

阿徐行得快，不時落後的 Eason，有啲索氣！

熱到剝衫

上週四中午， Eason同阿徐孖咇離開屋企，行去南灣再折返壽臣山。一身黑色緊身衫褲的 fit爆阿徐，為讓 Eason專心，大部分時間合埋口，免得影響運動意識。

當日陽光普照，行到身水身汗的 Eason，最終忍唔住除衫，大街大巷露出白雪雪的豬腩肉，與只得二十二吋腰的徐濠縈行埋一齊，強烈對比。

簽約英皇時期，被指做到冇得停的 Eason，拍埋霆鋒度，都算 fit！

年做幾十場世界巡迴，上週六（ 21/5）， Eason在鄭州開騷。

Eason最開心是一家三口飛外地家庭樂，至於三變四，兩公婆都冇刻意計劃。

11歲包包（陳康堤），已差唔多有媽咪咁高。

俾許安摸

行到去淺水灣，咁啱見到好友許志安跑步經過，安仔停低同 Eason狂吹，又好奇地伸手摸，「調戲」 Eason的 40吋巨腩，其間他還揭起自己件衫，向 Eason晒腹肌。

晒完料，許安繼續跑， Eason在阿徐支持下，按計劃行事。

全球經濟不景，不少品牌生意都受影響，徐濠縈手上兩間時裝店，生意額亦有跌冇升。老公搵得到，所以阿徐亦冇有怕，對時裝生意有興趣的她，即使長期捱貴租，仍堅持撐落去。

「做生意要守，阿徐唔想就咁放棄，寧願入少啲貨，另外嚟緊佢會再搞二手衫，佢係潮流 icon，所以佢搞二手衫次次反應都好好。」徐濠縈身邊人說。

許志安跑步經過，見到阿臣肚腩，一路摸一路笑。

Eason頸背後的紋身，是 03年推出《七》大碟時紋的，原來七係佢幸運號碼。

個個週末做「陳永安」，運動愈嚟愈少的 Eason，早前踩單車陪老婆跑步，不過近日阿徐再下旨，要落地行山，冇得偷懶。

熱衷長跑的徐濠縈， 14年飛倫敦跑馬拉松。

唔刻意追多個

去年底缺席渣馬，徐濠縈被傳大肚，當事人急著緊身運動衫闢謠。

「阿徐都四十二歲， Eason思想又西化，仔女對佢哋嚟講係一樣，所以唔會好恨要生個仔，包包（康堤）今年都十一歲啦，要追一早已經追咗！呢幾年阿徐除咗時裝生意，其他時間都放喺個女身上。包包開始大，兩母女可以傾時裝一齊扮靚，阿徐不知幾滿足！好老實，阿徐自己都話，如果再有，都係天意，佢兩公婆都唔會刻意去追！」徐濠縈友人說。