掃呢頁CODE去手機

2016年3月2日 星期三

首爾追蹤 《 Produce 101》唯一港女 難忍隊友排擠  Shin@As One首爾爆喊:俾人鬧埋唔到堆 [FACE - 458] __,港女,吳思佳,Shin,As One,MF,

Shin同香港朋友喺首爾食飯,忍唔住喊爆訴苦。封面首爾追蹤 《Produce101》唯一港女 難忍隊友排擠 Shin@AsOne首爾爆喊:俾人鬧埋唔到堆AsOne隊長Shin(吳思佳),早前離隊去韓國參加電視節目《Produce101》,如果成功從101人中成為最後11強,就可以同當地娛樂公司簽約正式出道做韓星!韓星夢唔易發,Shin雖然有一半韓國血統,但在當地仍被其他參賽者視為外人。人在異鄉仲要 ...


Shin同香港朋友喺首爾食飯,忍唔住喊爆訴苦。

封面

首爾追蹤 《 Produce 101》唯一港女 難忍隊友排擠  Shin@As One首爾爆喊:俾人鬧埋唔到堆

As One隊長 Shin(吳思佳),早前離隊去韓國參加電視節目《 Produce 101》,如果成功從 101人中成為最後 11強,就可以同當地娛樂公司簽約正式出道做韓星!

韓星夢唔易發, Shin雖然有一半韓國血統,但在當地仍被其他參賽者視為外人。人在異鄉仲要冇朋友,壓力勁大的 Shin忍唔住爆喊哭訴:「成日俾韓國啲代表鬧!每一次見我都係咁叫我減肥!又唔係好同佢哋埋到堆!」

要捱出頭唔容易,不過紅咗就唔使再受人白眼, Fighting!

21歲 Shin係中韓混血兒,媽媽係韓國人,本來好有條件去韓國發展。不過 Shin唔係土生土長,即使識講韓文都唔會被視為自己人,何況每個參賽者都當對方係假想敵,更加識唔到朋友!

Shin最大壓力係減極都減唔到肥,不過其實 Shin上鏡都面尖尖,起碼好過衞蘭(電視畫面)

(吳思佳幾可愛吖!)

(呢位姐姐好令人心動!睇佢 ig嘅相好靚!點解得咁少鏡頭㗎?好傷心!)

減極都肥

上週五( 26日)中午,《 FACE》在江南區撞正 Shin獨自一人返回酒店,似係剛拍攝完節目, 20分鐘之後就再步出酒店,搭地鐵到江南區一間著名錄音室,直到晚上 6點再轉場去練舞。踩足一日, Shin晚上 11點先會合一名女性朋友食飯,難得見到同聲同氣香港人, Shin坐低後就開始訴苦,連揀食物都要呻。「我得沙律可以揀,唔使就我,你想食咩就嗌啦,我已經慣咗睇人食好嘢。」

韓國出名炸雞同韓牛, Shin冇肉食已經夠慘,仲要食菜都肥!「我已經食好少嘢,但唔知點解減極都減唔到!其實我以前好瘦,唔知幾時開始,可能太大壓力,開始愈來愈肥,上鏡真係好肥!」

只食沙律

為咗減肥, Shin每餐只可以食沙律,冇得食肉同澱粉質。

眼見 Shin喊到收唔到聲,朋友即拎手機俾 Shin睇粉絲窩心留言,安慰對方。

喪排舞

除咗錄節目, Shin每日都要排舞,冇得偷懶。

成日俾人鬧

講起減肥, Shin愈說愈激動,突然對住朋友喊,「我已經淨係食沙律,淨係食啲冇澱粉質嘅嘢,但都係減唔到,我都淨係食菜同食雞胸不過甜嘢真係唔係好戒到,好 stress呀,你明唔明?」

Shin不斷抹眼淚,期間一度崩潰,趴低喪喊,要朋友好言安慰,又向 Shin展示粉絲的鼓勵留言,安撫對方。不過 Shin睇完笑一笑後,即向朋友繼續呻,「成日俾韓國啲代表鬧,每一次見到我都係咁叫我減肥!同埋佢哋乜嘢 schedule都唔話我知,淨係講開工時間,永遠冇收工時間,想拍到幾時就幾時!」工作人員唔照顧,連其他參賽者都排外,「始終你係香港人,佢哋個個都係自己人,都係韓國人,唔係好同佢哋埋到堆!」

住旅館

食完飯, Shin同朋友返回租住的平價旅館。

識唔到朋友, Shin在韓國大部份時間都係獨來獨往。

Shin(右二)離隊去韓國,其他 As One隊友都相當支持。

慳住平酒店

冇朋友陪冇啖好食, Shin亦冇得住宿舍或者五星酒店,要死慳死抵租住平價旅館。衣食住行全部靠自己, Shin話最掛住媽媽,每次打俾對方都會喊,「我好掛住媽咪!其實我真係唔介意辛苦,但我自己一個人,一聽到佢把聲我就想喊!」

除了打俾媽媽, Shin好彩都得到公司支持先捱得到,講明幾辛苦都唔會中途棄權,「我唔想公司失望,我知道大家都好辛苦,好努力想幫我,所以我唔會放棄!」好在 Shin現時在《 Produce 101》走勢唔錯,上星期排 21位,絕對有機會幫港女爭口氣出人頭地!

讀韓文

雖然媽媽係韓國人,但 Shin亦需要上韓文堂進修。

未上到位, Shin現時出入都要坐地鐵。

Shin經常 update ig,仲會放嘟嘴 cute樣吸客。(網上圖片)

GOT7 Jackson溝過 Shin?

Jackson仍是訓練生時,已睇中 Shin,仲大讚佢靚女,不過追唔追到手都冇人知喇!

Jackson所屬的組合 GOT7前年出道,發展唔錯。

去年 As One上韓國電視台宣傳新歌〈 Candy Ball〉,喺後台同 Jackson見面。(電視畫面)

Shin唔使包尾

早前公布的第 4集成績,第 1名係 Jellyfish練習生金世靜,第 4名係金秀賢同父異母細妹金珠娜,而 Shin則由排名 32跌至 56,不過 Shin於第 5集急升 17位(第 6集跌回 21位),粉絲唔使太擔心喎。

港星有發圍

Shin離隊攻韓發展,其實近年有唔少港星都成功在韓國成名,除了 Got7的 Jackson,童星出身的 Elkie、 Angelababy同擁有香港身份證的湯唯都掂!

莊錠欣  Elkie

拍過唔少大台劇如《 On Call 36小時 II》、《老表你好 hea!》等,上年在 CUBE香港選拔被睇中,與 6名成員組成 CLC。

Angelababy

曾與金秀賢合作的 Baby,在韓國知名度頗高,機場、巴士車身及旅遊景點都不時見到 Baby代言的廣告。

《蘋果日報》圖片

湯唯

陀住猴 B湯唯, 10年與韓星玄彬拍電影《晚秋》在當地成名, 14年嫁埋俾韓國導演金泰勇,做半個韓國人。

韓國練習生非人生活

在韓國做偶像明星,表面風光,背後付出的努力外人難以想像,尤其做練習生時期的 5年內,無論體力及精神都受盡折磨,可以捱得過在娛樂圈出道的藝人,真係要講句恭喜。

骨折死頂★★★★

韓庾(前 Super Junior-M成員)

曾効力 Super Junior-M的中國籍成員韓庾,因不能接受不平等條款合約而解約,曾爆料指在 SM當練習生時,每天要連續練習 20小時,因為要向公司表明自己堅強,試過連自己骨折了兩個月也要死頂。

遲到罰企★★★

太妍(少女時代成員)

少時是現時韓國 No.1女團,但成員在出道前個個都曾接受軍訓式訓練,隊長太妍曾爆料,她試過上堂時遲到 1分鐘,竟被罰企 1小時,要把尊嚴放低。

攰都唔俾★★★

秀英(少女時代成員)

出名聽話的秀英也曾呻,指當時每朝 6時起床返學,中午 12時即趕回公司練習,直到凌晨 3時,而公司規定各成員就算多疲累也不可面露疲態。

老閉監控★★★★★

Nichkhun( 2PM成員)

野獸組合 2PM出名跳得唱得,所以嚴苛練習難不到他們,但隊中靚仔成員曾爆料指在 5年受訓期間,公司不准他們生病,不許請病假,不准帶手機,不准隨便回家,更不可談戀愛;而有傳其公司 JYP更用閉路電視監控他們在受訓時的一舉一動,慘過做囚犯。

採訪、攝影:娛樂組(首爾)

撰文:娛樂組


鍾意就快D Share啦!