2016年2月18日 星期四

小霸王橫行無綫 樂易玲召王晶女照肺 [壹週刊 - 1354] __,無綫,王子涵,王晶女,王晶,樂易玲,M1,

娛樂偵訊小霸王橫行無綫 樂易玲召王晶女照肺現年25歲的王晶女王子涵,有高層俾面睇住照顧,去年六月加入無綫後要風得風要雨得雨,更被一班看風駛𢃇的二打六團團簇擁變成小霸王,要他們私下幫自己friend的食肆免費宣傳,又同班觀音兵愈玩愈埋七國咁亂,睇唔過眼的樂易玲,終於出手,話之你老豆係殼王心腹,都要照肺。濫用公司資源老豆是殼王同學,王晶女王子涵在無綫打尖拍劇做主持,機會優先!令不少靠埋堆搏機會的藝人, ...


娛樂偵訊

小霸王橫行無綫 樂易玲召王晶女照肺

現年 25歲的王晶女王子涵,有高層俾面睇住照顧,去年六月加入無綫後要風得風要雨得雨,更被一班看風駛𢃇的二打六團團簇擁變成小霸王,要他們私下幫自己 friend的食肆免費宣傳,又同班觀音兵愈玩愈埋七國咁亂,睇唔過眼的樂易玲,終於出手,話之你老豆係殼王心腹,都要照肺。

濫用公司資源

老豆是殼王同學,王晶女王子涵在無綫打尖拍劇做主持,機會優先!令不少靠埋堆搏機會的藝人,爭相投靠擦鞋,只要王子涵搞 party,逢請必到。

「大家黐埋去,話就話搏搞好關係可能有嘢關照,但未見其利先見其害,有人私底下叫 Ada(王子涵)做小霸王!因為佢每次吹雞叫大家食飯,食完大家會喺 ig或者微博 po相同寫嘢,仲要寫埋食肆個名,擺明係幫佢朋友宣傳。所以而家有啲人都開始 say no,但 Ada就會笑住咁問對方係咪唔想拍劇!

「公司高層權鬥大混亂,大家真係驚唔埋堆會冇嘢做,有啲人就算唔係好想去,都可能係咁意到一到;不過好多經理人都私底下提醒過大家,話要小心啲唔好踩錯線。」知情者說。

借公司資源幫外人免費宣傳,王子涵身邊一班觀音兵就算唔理計較照做,但身為經理人部門揸弗人嘅樂易玲卻唔同講法,認為要揸正嚟做。

「樂大媽都係忍到最近先出聲,大家都知無綫藝人做軟性宣傳都要收錢,佢成日喺網上見到呢啲 post好唔高興! Ada變相叫班藝人幫佢啲 friend免費做嘢啫,等同倒公司米。樂大媽早排叫過 Ada返公司傾偈照肺,不過礙於王晶關係,大媽都係好溫和,好輕手!」

邀請一班藝人到朋友開的食肆食飯,王子涵事後在 ig鋪相,何君誠、周志文以及大隻仔等都例牌出現。

樂易玲帶住一班藝人去捧《賭城 3》場,其中黃建東(前左一)屬王子涵鐵腳觀音兵之一。

《賭城 3》首映,王子涵出席外,據知更「點燈」幾個藝人齊去睇首映。

小心處理男女關係

據了解,對王子涵留咗手的樂易玲,雖然沒有直斥她搞亂檔,但照肺期間,亦乘機勸對方要處理好男女關係。

「觀音兵之中,何君誠表現最積極,周圍同人講話自己同 Ada拍緊拖,以為已經得米,但其實 Ada同其他男仔好似周志文,都有私下出街玩得好埋,連樂大媽都收到風,勸佢要檢點啲,因為藝人形象好緊要,揀定一個發展,唔好周圍點着晒啲火頭。講到咁明, Ada應該識聽。」知情者說。

農曆年跟家人到外地旅行,王子涵晒三點式泳裝照。

王子涵去年簽約無綫,即獲安排做扮靚節目《姊妹淘》主持。

王子涵早前去睇 RAIN演唱會,觀音兵周志文有份外,也有新加入的沈震軒。

家長管治

企業化但家長式管治的無綫,自從有樂大媽樂易玲上場睇經理人部門後,只要旗下藝人自損形象,影響身價令公司收益受損,便會揸正嚟做。

周志文

「巨聲大孖」周志文出道以來緋聞不絕,雖然屢遭警告依然未知驚,去年又先後狂追劉佩玥、吳若希以及何雁詩等小花,樂大媽一怒之下,開大會投票將他叮走。

麥明詩、龐卓欣

除了男女關係,公司光環樂大媽亦嚴格監控!十優麥明詩跟有米女龐卓欣參選期間因同屬大熱而屢傳不和,為顧及港姐形象,樂大媽出手下令兩人做好姊妹,當選後即扮 friend拖手行街。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...