掃呢頁CODE去手機

2015年5月28日 星期四

2,000萬獨立屋挽嫩妻 魏駿傑:冇條刺就假嘅! [壹週刊 - 1316] 魏駿傑,M1,



冰封三尺,非一日之寒。魏駿傑夫婦想破冰,但坦言彼此放低成見需時間。訪問當日他倆不掩飾嫌隙,講到心灰位男的更索性起身行開抖抖氣。

探熱針

2,000萬獨立屋挽嫩妻 魏駿傑:冇條刺就假嘅!

比老公魏駿傑後生廿年的國產嫩妻張利華,最近被發現和前港隊單車手鄧宏業暗交,七年婚姻亮起紅燈。頭上變色,危在旦夕,魏駿傑心情矛盾,直認心裡有條刺,但同時又想保住頭家,並購入二千萬獨立屋留妻。

嘗試修補關係,但接受訪問時,兩夫婦仍面左左。對於有無信心捱過這一關,魏駿傑更加無奈,離坐表示答唔到。老夫少妻,路難行!

傳單車手鄧宏業介入,令魏駿傑夫妻亮紅燈。

勸老婆珍惜

因為女兒,他倆才並排坐在一起,拍下這張一家三口相。

上週六(五月二十三日),魏駿傑和張利華在家中接受訪問時,雙方關係依然繃緊。魏駿傑坦言二人年多前已出現問題。「修補破裂關係需要時間,喺人前一百八十度掟彎扮恩愛,我哋做唔出。」魏駿傑說。

訪問當日,魏駿傑剛從內地登台返港。「啲人成日講男人出去滾,但都識返屋企,我唔係建議人去滾,只係想講點解會識返屋企,就係因為知道屋企嗰個先係最好。反之而言,就算外面嗰個幾靚仔,某一方面幾強,比老公仲有錢,你諗番轉頭,人生匆匆幾十年,如果伴侶仲喺身邊,好值得珍惜;寧願修補,重新建設,都好過去破壞,尤其仔女仲細。」在自斟自飲的魏駿傑跟記者說的這番話,其實是向一直站在身後的張利華表態。

魏:我老仲點爆單車

對於老婆同黃金寶師弟、前港隊單車手鄧宏業來往,魏駿傑直話直說:「話冇條刺就呃你,我又唔係聖人!佢(指張利華)要改變,要俾番信心我。」

兩公婆年齡相距廿載,所追求的和步伐均不一致,典型老夫少妻的問題。「而家我四十八歲(十月二十日),仲點叫我爆單車,爆一百公里,我點陪你?我都想,我真係想。整整吓咪冇共同話題,因為冇互相遷就興趣。」張利華點頭認同。

至於可否互相讓步,魏駿傑說:「要讓步咪我揸住電單車追住你架單車,你話呢個係咪讓步,唔 work㗎嘛!」

魏駿傑寫埋老婆名購入這個二千萬西貢獨立屋,八月入伙。希望轉換環境,令婚姻有起色。

愛好運動的張利華,不但考取健身教練牌,早排參加單車鐵人賽還獲冠軍。

換大屋留人

有關補救方法,魏駿傑已經有初步諗法。

「搬屋!我覺得而家住嘅地方有局限(七百呎村屋),一嗌交冇得走,吓吓走出街仲衰。如果搬大啲,當我好天真咁諗,可以走上第二層,喺另一間房瞓避一避。」

有心箍煲的魏駿傑,半年前斥資近二千萬,購入西貢五千呎獨立屋,預算今年八月入伙,新屋業權張利華有份,希望給她安樂窩,用物質留人。但這純粹是魏駿傑個人想法。

「我第一日已經講,我性格唔適合做家庭主婦,老公同小朋友唔代表我人生全部,想有自己價值,建立自己事業。」張利華說。

魏駿傑即場反駁:「我從來唔反對女性婚後工作,但我同時要問一個問題,我成日離開香港做嘢,搵錢支持到頭家,以我經濟能力,你係咪需要行呢一步。我係咪會擔心如果太太返朝九晚五,個女日日由司機工人接送,真係對佢好咩!」

一個搭一個拆

至於會否尋求婚姻輔導,魏駿傑說:「都要搵人幫吓!(有冇信心過到關?)答唔到你!」至此,魏駿傑頹爆,只見他突然起身行開,而張利華亦匿入房,迴避僵局。

過了不久,魏駿傑重新冷靜下來。「佢(張利華)頭先話人生唔係得老公同個女,仲有好多嘢!錯……人生係要兼顧每樣事,要擺好先後次序。我同佢嘅排位有太大差別,個女咁細,我一定擺佢最前。(佢一早同你講明唔想做家庭主婦?)我就係唔知,如果知就唔會發生問題啦,可能未結婚已經因為呢個問題分埋手。做父母錫個女就要犧牲,我以前夠鍾意釣魚,但一出海就一日;為咗陪個女,犧牲呢個興趣都冇所謂。

「我知你鍾意踩單車,但可以調節吓,你參加比賽我從來冇反對,但人哋練車你練車,人哋係咪同你有個咁細嘅女同老公先,佢陪個女係愈嚟愈少。我買大屋,就好似雀仔咁逐條樹枝砌過大巢出嚟,雙方都要付出,你唔好我擔樹枝你就拆。」魏駿傑說。

張:一定要爭氣

張利華獨自接受訪問時,亦表示夫妻長期磨擦,令她缺乏安全感。

「我一個人嚟香港,大部分人都對我有偏見,所以我自己一定要爭氣,一直想建立自己事業。

「佢係一個好爸爸,咁多年佢亦好錫我,佢一向想搬大啲,我知佢角度係想俾我一個理想家居,但對我嚟講,要打開個心,平心靜氣咁攞出嚟傾,先可解決問題。過往嘈交嘈到大家都逃避,搞到距離愈來愈遠,其實大家唔係唔愛對方,只係成日嘈交,嘈到個心好攰。」張利華說。

訪問當日,發緊燒的 Jessica一見爸爸回來,如食咗靈丹妙藥般生猛番晒。在孩子身上投放多少時間同心血,即時有回報。

臨老得女的魏駿傑,前年已同老婆聯名買入八百多萬的九龍城匯賢閣,他直言是為愛女儲定財產。

嫩妻鬧出桃色新聞後,灰爆的魏駿傑曾在朋友圈寫文發洩,表露離婚打算。

憑《陀槍師姐》食老本多年,至今仍每月返內地登台六七次,月入廿萬,令一家生活充裕。

張利華稱同老公長期多磨擦,令她失去安全感。

同緋聞男冇聯絡

張利華被影到與前港隊單車手鄧宏業攬腰夜會,事後被老公魏駿傑訓示要檢點。爆出緋聞後,張利華斬釘截鐵說:「而家同鄧生冇聯絡。」至於日後再見到對方會否避忌?她說:「我仲有其他單車圈子,就算見到佢,都會大方咁打招呼,但其他嘢會避忌啲!」

破冰

破冰有心冇力!訪問當日,魏駿傑夫婦冇眼神接觸,冇溝通。經過一晚剖白後,翌日魏駿傑說老婆去參加單車比賽,但出門前約好之後一起晚飯。可惜最終因為寶貝女 Jessica持續發燒要入院而取消,但夫婦關係暫時破冰。之後魏駿傑北上開工,張利華日夜留守醫院照顧女兒,守住個家。

鍾意就快D Share啦!