掃呢頁CODE去手機

2015年5月14日 星期四

打電話搵上門 周嘉儀短訊「問候」陳佩琳 許方輝驚到帶老婆搬 [壹週刊 - 1314] 周嘉儀,嘉儀,許方輝,M1,



上月轉投金融機構的周嘉儀,首次代表公司出席公開活動。

娛頭

打電話搵上門 周嘉儀短訊「問候」陳佩琳 許方輝驚到帶老婆搬

13年,大台新聞部許方輝偷嗒主播周嘉儀斷正,有婦之夫立即單方面斬纜。心有不甘,自以為樣樣勝陳佩琳(許方輝老婆)一籌的周嘉儀,見風頭已過,早前再發動攻勢,電話、 WhatsApp外,甚至打 inline同屋企電話搵上門,又出招氹對方同自己食 farewell飯……幾經辛苦先氹番老婆,許方輝唔敢再亂嚟,一於「唔應機」!好勝周嘉儀不肯罷休,索性短訊問候人妻陳佩琳;為免身邊人再受傷害,慌張許方輝帶埋老婆,急急搬竇。

不忿被撇

許太陳佩琳(圖右)

週日母親節,許方輝親自接載老婆返回新居,二人關係未有受周嘉儀挑撥影響。

和同部門同事周嘉儀密會斷正後,許方輝被大台勒令停工避風頭,至於老婆陳佩琳亦一度離家出走;為保住事業同家庭,出軌許方輝單方面斬纜,自此對周嘉儀不聞不問,復工後,亦刻意將工作時間安排到同對方零機會碰面,免落人話柄。

被許方輝狠撇,周嘉儀一直耿耿於懷,認為對方欠自己一個交代。

「一向只有 Venus(周之洋名)飛人,冇人飛佢,個男人對佢不聞不問,又冇同佢交代清楚,佢當然唔順氣,成日話除咗 timing,無嘢比唔上陳佩琳,我哋幾個(朋友)都勸 Venus唔好咁好勝,飯碗要緊!」周嘉儀的閨密說。

電話搵上門

忍咗年半,周嘉儀終於等到搵到路離開大台,據了解,她未向公司遞信,已第一時間 WhatsApp通知許方輝,以為前度已放低過去,重新出發,許方輝於是爽快回覆並送上祝福,此舉令周嘉儀以為雙方關係有轉機,隨即展開 WhatsApp攻勢。

犯錯後得老婆陳佩琳既往不究,「守行為」中的許方輝唯恐再有閃失,只作有限度禮貌回覆,但見男方有一句冇一句的,周嘉儀於是加大力度,不停 WhatsApp,又大膽到打公司 inline,甚至連許方輝的屋企電話都唔放過。

「其實 Venus好少提同許生啲嘢,有次同佢一齊 shopping,佢好得戚咁話有人 WhatsApp唔覆, inline唔聽,咪打去屋企搵人囉!仲話人搵唔到唔緊要,最緊要過程好玩!有邊個『人』令 Venus咁放唔低?一定係許方輝佢打去人哋屋企,咁即係同人哋老婆直接對話啦,又唔係無人追,搞咁多嘢!」閨密說。

買天線,陳佩琳先影相 WhatsApp問許方輝。

到舊居附近的頌安邨買了一堆家品後,隨即返回新居。

仍在無綫上班的許方輝,收工後拎住新買的咕𠱸回家。

有難同當的陳佩琳,寧願放棄自置的舊居,隨夫搬到月租二萬,位於馬鞍山的迎海。

兩年孽緣

一三年,周嘉儀同許方輝收工後到荃灣篤魚蛋前,兩人先到龍翔道山邊車廂談心。

Watt數高

被網民捧為宅男女神的周嘉儀,電力驚人,除了已婚的許方輝,她自爆曾拍過五次拖,亦揚言只會吼月薪七萬以上的異性。

金融才子

10年,被踢爆溝掂一名身高六呎、外表斯文的金融才俊後,周嘉儀忽然富貴,由葵涌公屋搬到荃灣豪宅,出入有男友名下靚車接送,生活富泰。

已婚四眼男

去年 5月,再搭上一名四眼已婚男,二人約會於尖沙咀撐枱腳,其間周嘉儀施展渾身解數,放電托腮出盡冧功。

有米 Edward

上星期,周嘉儀被撞破與一名叫 Edward的有米男歎日本菜,據了解, Edward是高級西班牙餐廳老闆,名下有多門生意,家住 2,000多萬西貢獨立屋,對住發電機周嘉儀,有米 Edward管接管送傍到實,表現細心。

三扒兩撥搬

相信只要等到周嘉儀離開大台,事情便會過去的許方輝,決定採取守勢,一於繼續冇反應唔回覆。硬招唔見效,周嘉儀轉用軟功,縱然自己在公司人緣普通,但部門之內,仍有一班觀音兵追隨,有人提議和她食 farewell飯,周嘉儀竟然主動開口,話叫埋許方輝。

「班觀音兵聽到都 O晒嘴,許生不嬲都唔同同事 social,兩個之前又有嘢,邊個敢開口喎!」一名無綫新聞部同事說。

放風搵人嗌埋許方輝食 farewell飯外,據知周嘉儀亦親力親為, WhatsApp扭對方請食 farewell飯,但許方輝依然無動於衷。

前度唔受氹,好勝周嘉儀決定玩大佢! WhatsApp陳佩琳,送上問候。

「臨走嗰幾個月, Venus不停玩嘢,許生都呻過,話忍埋呢幾個月就無事,點知呢頭講完,佢就 WhatsApp問候埋陳佩琳!許生驚到唔理咁多,半個月內搵到新屋,帶埋老婆搬走。」知情者說。

住慣馬鞍山區的許方輝,最終租住同區只有兩年樓齡的迎海五六五呎單位。早前,陳佩琳獨自離開舊居,到頌安邨日本城買天線,只見她密密影相,傳 WhatsApp,估計是同許方輝確認貨品是否正確,之後再執了一堆家品,便返回迎海新居。同日晚上七時,許方輝收工捧住兩個大咕𠱸返回上址。週日(十日)下午一時,許方輝一身街坊裝,單拖離開新居,出外接老婆回家,可見周嘉儀的「動作」,並未影響夫婦感情。

未夠五點,周嘉儀已換上 party dress,一副戰鬥格到尖沙咀圓方準備出席活動。

周嘉儀 shopping只吼名牌,在 MaxMara睇晚裝,再入 Chanel睇新款手袋。

大會安排她與張寶華合照,周嘉儀不滿嘴藐藐。

抓緊每一個機會的周嘉儀,在場內積極派咭片,尤其是老細級人馬。

牙齒印

無綫新聞小花為爭上位經常傳不和,其中周嘉儀自恃有人射住,不但搞不倫戀,更周圍辣火頭,歷年來,留下不少牙齒印。

林小珍

周嘉儀離職後,曾與她長期在《香港早晨》中拍檔的林小珍,即在 fb爆出周嘉儀「毒舌」,揶揄她老公出去偷食,黑心咒小珍一入門就剋死老爺,詛咒老人家「死快點」。

盤翠瑩

13年,二人因一個奇異果公開吵大鑊,比自己遲一年加入新聞部的盤翠瑩在 fb留言單打,其後二人在公司撞到正,當場嗌交,周嘉儀更向各同事發內部 email,暗寸有人行為鬼崇,有事就直接講……

黃紫盈

傳與另一小花黃紫盈爭上位,結果被對方向傳媒放料,踢爆周嘉儀做小三,搭上有婦之夫許方輝。

過手癮唔買

至於上月一日已正式上任興業證券市場拓展部聯席董事的周嘉儀。有餐廳老闆 Edward密約追求外,亦有觀音兵做阿四。日前,中午飯時間,周嘉儀離開中環的辦公室,到附近與一名四眼男碰面,人未到,已經千 watt電眼老遠揮手打招呼,接過對方為她代購的一大袋宜家貨品,即閃。下午四時半,化行妝 set晒頭的周嘉儀一身 party dress離開公司,同兩女子坐的士到尖沙咀圓方 shopping,在 Chanel逗留半小時,不同包包試上身,過完手癮後,夠鐘行去 W酒店出席活動。

泊咗新碼頭,還要咬住許方輝夫婦,周嘉儀實在好勝!

觀音兵代買家品,周嘉儀趁中午放飯交收。

去年中同已婚男撐枱腳,周嘉儀使盡渾身解數,姣電對方。

週二(十二日),周嘉儀回應本刊,否認對許方輝發動電話、 WhatsApp攻勢。

大婆險勝

娛樂圈誘惑多,但藝人為保形象,大多數最後一刻都會重返正印身邊,但一不離二,二不離三,小三誘惑始終難抗拒,離婚收場人辦包括羅嘉良、陶大宇、溫兆倫等,可以唔散的,大多數係老婆忍得有功!

江華

96年,和鄧萃雯合作亞視劇《我和春天有個約會》撻着,到女方屋企過夜斷正。事後江華急與鄧萃雯劃清界線,更同老婆麥潔文聯手公開數臭對方,經過這次事件後,江華兩公婆一齊至今。

馬德鐘

人夫馬德鐘在大台走紅後,便成為花旦殺手,先後同郭羨妮、佘詩曼、胡定欣等傳出緋聞。 06年,他搞上圈外女友 Katherine,老婆張筱蘭一怒之下帶同兒子返法國,為了挽回事業及形象,馬德鐘最後重回老婆身邊。

彭順

背住老婆李心潔偷嗒𡃁模 Liddy(李悅彤),被揭發後賤男丟低 Liddy,趕飛馬來西亞箍煲,之後變成跟得老公,經常陪住老婆。

鍾意就快D Share啦!