掃呢頁CODE去手機

2015年3月5日 星期四

發姣溝奀星 陳凱琳遭陳瀅截糊 [壹週刊 - 1304] 凱琳,陳瀅,陳凱琳,M1,




拍攝劇集《四個女仔三個 Bar》時,陳瀅與陳凱琳齊齊睇中奀星林景程,大搞三角戀。

探熱針

發姣溝奀星 陳凱琳遭陳瀅截糊

在劇集《四個女仔三個 Bar》首次做女一的 23歲陳凱琳( Grace),與同屆港姐亞軍蔡思貝齊被封為「人肉發電機」,據了解,《四》劇開拍初期,她便𥄫中奀星林景程(阿 King),甚至幫男方扣恤衫鈕,做晒主動。

女神出手,以為一定得米,點知黃雀在後,被戲中飾演有錢女 Brittany的陳瀅( Jeannie)橫刀奪愛。

上週劇集大結局,阿 King陳瀅拍拖出席慶功宵夜直落,更當眾拖手玩頭髮,至於大輸家陳凱琳,身為女主角都缺席慶功宴,費事眼寃。

嫌太主動

嫌陳凱琳過分主動熱情,阿 King最後揀陳瀅,二人一撻即着。

表面上,《四》劇中四個女仔陳凱琳、陳瀅、劉佩玥、何雁詩戲裡戲外情同姊妹,但講到爭仔,就無情講。充滿電力的陳凱琳,一早已經睇中阿 King林景程,撒嬌投懷送抱,實行多方位出擊。

有港姐冠軍主動獻殷勤,偏偏阿 King反而對性格較含蓄的陳瀅嗒糖,還自動波做阿四,經常化身龍友幫女神揸機影相,拍外景又做埋「觀音兵」,擔遮遞水,火速奪得芳心。

「唔好睇阿 King個樣木木獨獨,佢把口好叻,成日搞 gag氹到班女仔鬼咁開心,尤其 Grace(陳凱琳)同 Jeannie(陳瀅)擺到明冧, Grace仲做晒主動,不過阿 King寧願揀 Jeannie,話嫌 Grace太進取。」知情者透露。

拖手

拉手

離開糖水鋪時,陳瀅主動拉住男友手,林景程即報以甜笑。

玩頭髮

行行下林景程更伸手玩女友頭髮。

改黐張繼聰

據劇組人員透露,外表斯文的陳凱琳,其實相當 open,合作過的男演員,十居其九都觸電!單身嘅無任歡迎,有老婆一樣唔放過;入行短短一年,已先後同人夫張繼聰、大隻港男溫家偉、地王之子周子揚傳過緋聞。

「其實佢同蔡思貝都係不相伯仲,一樣係人肉發電廠,不過思貝比較目標為本,剩係對啲監製同小生有興趣, Grace就上至監製下至場務,總之係男人就嗲,佢講嘢陰聲細氣,個個都俾佢電到暈陀陀。初時一班女仔仲有傾偈,之後 Jeannie同阿 King一齊,另外兩個女仔(何雁詩、劉佩玥)又同 Jeannie啱傾啲,搞到 Grace完全埋唔到堆,咪成日黐住張繼聰囉。」一名劇組人員說。

大結局當晚,眾演員去完慶功,便拉大隊食宵夜,唯獨陳凱琳冇影。

俾陳瀅截糊後,陳凱琳唯有轉黐張繼聰。

當街調情

上週五(二月二十七日)劇集大結局,一眾演員做完傳媒活動後,拉大隊到九龍城食糖水,唔想見到阿 King同陳瀅出雙入對的大輸家陳凱琳,全程冇影,免得眼寃!

當晚因為明知有記者跟住,陳瀅先孖住好姊妹劉佩玥(阿 Moon)到糖水鋪,阿 King則殿後到。食到凌晨一點,離開時二人已放下戒心,陳瀅伸手拉住男友手臂,阿 King又反捉實女友玉手,互望甜笑。其後陳瀅同阿 Moon並排行,尾隨護花的阿 King竟從後偷襲,出手玩女友頭髮,二人當街調情,完全當身旁的電燈膽透明。

進取形的陳凱琳,入行短短一年,幾乎同佢合作過的男演員都傳過緋聞。

早前陳凱琳在中環拍攝外景,深受劇組一班「叔叔」愛戴。

本週二(三月三日),陳瀅出席活動被問到緋聞時即甜笑:「(林景程揀咗你喎!)吓?佢真係咁講呀?」但問到同陳凱琳是否好姊妹,即衝口而出:「唔會!」

巨聲幫出身

現年 30歲的林景程( King),巨星幫出身,入行前從事物理治療師,因為父母愛炒賣磚頭,林景程並無任何家擔。 07年他參加《新秀》比賽入了八強,但未有機會入行,直到 09年參加《超級巨聲》才正式加入無綫。 12年在劇集《 On Call 36小時》飾演實習醫生而為人識,在劇集《四個女仔三個 Bar》中飾演何雁詩男友齊安居,佔戲不少。

撩仔部

自認「處女」的 2013港姐冠軍陳凱琳,鬼妹仔性格,有樣夠主動又 open,短短一年,已經同不少拍檔搞出緋聞。

溫家偉

與大隻港男溫家偉合作主持飲食節目《搵食飯團》,拍攝期間二人態度親暱,甚至在鏡頭前互相餵食,即時被大台勒令斬纜,大隻仔更被叮走。

周子揚

西貢地王太子爺周子揚,與何傲兒快閃戀後,即與陳凱琳傳出緋聞,二人合作《四個女仔三個 Bar》其實只有極少對手戲,但一有機會,便黐到實密密傾。

陳展鵬

與陳展鵬到長洲拍《張保仔》外景時,二人毫不避忌傾到雞啄唔斷,陳凱琳更主動伸手與煎 pan玩「兜巴星」。

洪永城

去年 10月,執黃浩然二攤拍《張保仔》的洪永城,休息期間同陳凱琳一支茶兩份飲,關係好到呢!

張繼聰

對在《四個女仔三個 Bar》中有多場對手戲的張繼聰出盡冧功,主動請對方食朱古力,人夫亦經常講笑話氹陳凱琳,又幫手擔遮拎風扇。

鍾意就快D Share啦!