掃呢頁CODE去手機

2014年11月28日 星期五

[忽然1周 - 1009] 爆外母嫌棄 婚後避孕唔生住 王祖藍:驚亞男會後悔 祖藍,王祖藍,MW,




獨家:理工爆戀事

周一( 24日),王祖藍應邀出席理工大學做 talk騷嘉賓,內容全部圍繞他和李亞男的戀情。一向信心爆棚的王祖藍席間自嘲外形似細龜,驚襯唔起李亞男。

打頭陣

爆外母嫌棄 婚後避孕唔生住 王祖藍:驚亞男會後悔

上周台慶夜,王祖藍歷史性跪地向李亞男求婚,哄動全城。結婚騷唔好停,周二( 25日),他在活動上宣布二人於明年情人節行禮,翌晚則於迪士尼擺酒大宴親朋。日前,本刊獨家直擊祖藍安排雙方家人到迪士尼,為準老婆慶生及順道為婚宴試菜。

與外母一家溫馨的王祖藍,原來多年前曾遭外母嫌棄又霉又矮。周一( 24日),他在大學 talk騷中大爆:「佢(李亞男)媽咪好緊張,乜都管束住。」二人更因此分手。

而一直講明因信仰關係,婚前要禁慾的他,在 talk騷上透露婚後會設防暫不生 B,「我想亞男拼搏吓先,驚佢會後悔。」難得女神肯屈膝下嫁,外母又終於開綠燈,王祖藍當然乜都要 say yes












一夜間成功製造話題的祖藍、亞男,被質疑「擦鞋」,搞求婚騷。事後二人遭連環踢爆,原來一早 plan定結婚,台慶求婚只為製造「驚喜」。

上演求婚騷

台慶夜王祖藍預備定三卡鑽戒向李亞男跪地求婚,求婚騷較啱時間撼港視首播的《選戰》。

微博晒幸福

王祖藍求婚成功,曾揚言即使收鎖匙扣都一樣肯嫁的李亞男,即上微博狂晒幸福。

唔想亞男唔甘心

面對圍插,王祖藍一於少理,心情靚爆留港籌備婚禮。周一( 24日)晚,他以「傑青」身份獲邀出席理工大學名為「走進扮嘢王的浪漫童話故事」講 talk。約近一小時的 talk騷,幾乎全是王祖藍剖白與李亞男的拍拖歷程。席間有學生問他婚後會否即生 B,祖藍扁扁嘴無奈地說:「我知身邊有好多女藝人結咗婚,生完 BB會後悔,後悔當初為咗個男仔放棄演藝事業,生完仔呢啲女人會有身份危機。我想亞男喺呢段時間做晒自己想做嘅嘢先,拼搏吓先。我驚佢後悔,唔想佢第時唔甘心。我希望佢做夠晒嘢,冇後悔,我哋先去另一個階段。」

踢爆已訂婚

王祖藍求婚騷成全城熱話,有航空公司踢爆二人早已訂婚及拍攝蜜月特輯,變相踢爆王祖藍在台上求婚前,二人對結婚早有共識。

誓神劈願

王祖藍周二( 25日)出席首映時,發誓自己在台慶當晚是第一次向李亞男求婚,但同時又指自己七月已向李亞男父母提親,講得多錯得多。

外母想要王力宏

在 talk騷上,祖藍透露了他與李亞男很多鮮為人知的秘密。原來李亞男的前度是一名律師,而李王二人早在○六年時已在教會秘密撻着,因當時祖藍籍籍無名,一直有傳得唔到李亞男母親歡心。再者身高五呎三配五呎九,李母實在難以接受。其間王祖藍亦透露女友家人希望女兒搵伴侶要達「王力宏」級數。「我由 17歲到 25歲遇到李亞男之前一直都冇拍過拖,當時我好驚,如果李亞男拍拖對佢屋企人嚟講好大件事,佢媽咪一定會好緊張,事事睇實,乜都管束住。亞男從小喺溫室長大,漂白水唔識用,微波爐唔識用,罐頭唔識開,佢係乜都唔識,因為佢媽咪真係好照顧佢。佢屋企人覺得亞男拍拖,應該係王力宏,點知你俾細龜佢,你諗吓幾大件事!唔係翅同碗仔翅嘅分別,係翅同豉油嘅分別。我嗰時係咩啫?兒童節目主持,冇人識,身高又……而佢,華姐喎,又高又靚,我唔敢高攀。佢哋由細到大都覺得係咪要搵個好啲嘅呢?所以佢(亞男)都有啲驚。我哋 05年認識, 06年決定喺埋一齊,但好快又冇喺埋一齊。」

拒合照即閃

當晚 talk騷約三百座位爆滿,完騷後更有不少同學仔要求與王祖藍合照,但由於場面難控制,加上他一早約好圈中好友到新屋為李亞男慶祝生日,因此婉拒簽名即嗱嗱臨上車走人。

暗指外母拆散

台慶成功求婚後,雙方長輩即時現身祝賀,李亞男母親更主動與王祖藍抱抱。但王祖藍在 talk騷中,卻爆出 06年與李亞男拍拖時,李經常聽母親說話,二人最後亦曾分手三年,間接指出自己遭外母嫌棄,導致分手。

爆喊炒車

無奈「被分手」後,王祖藍自爆為李亞男喊過無數次,更因壓力太大搞到炒車。「當時我喊咗好耐,係聽住〈葡萄成熟時〉喊嘅,點解我望住側邊一 pair pair都得,我都幾好吖,點解我冇呢?嗰排我成日同蔡少芬傾心事,因為佢經歷過地下情、好多拍拖嘅嘢,佢會好明白我。佢開解我,叫我同亞男分開啲。我同佢(蔡少芬)傾心事,結果記者以為我哋拍拖而追訪我哋,我緊張到撞爛咗自己架車,好大壓力。」與李亞男分手後,祖藍決定的起心肝工作,歌影視三邊忙。

獨家:試菜兼慶生

周二( 25日),李亞男 30歲正日生日,王祖藍特別安排兩家人到迪士尼樂園酒店試菜兼慶生。李亞男每逢離櫈攞嘢食,王祖藍都跟到實,十分癡纏。

笑到冇眼

難得兩家人一同試菜,又適逢生日,不施脂粉的李亞男全晚笑到瞇晒眼,幸福滿瀉。

兩家碰頭

王祖藍和李亞男的家人有傾有講,兩邊親家關係融洽。

作歌寫情信翻撻

09年,自覺紅咗的王祖藍自信心返晒嚟,機緣巧合下,更成功翻撻李亞男。「 09年藝人之家叫我同亞男去美國傳道,我用咗 3年半時間去忘記佢,依家又要對住佢 3個禮拜,我覺得好危險。我同樂小姐(樂易玲)講,湖南衞視有個節目《舞動奇跡》,不如你俾李亞男試吓啦。但一個禮拜之後,佢竟然拗柴跳唔到,要去傳道!喺美國期間,有日我發現原來我仲好鍾意佢。返香港之後我寫咗一封情信加一隻自己寫嘅歌〈跌落凡間的天使〉送俾佢,終於我哋又走番埋一齊。」

當晚迪士尼聚餐,王祖藍餅印妹(左)亦有出現,飽餐後更打包返屋企。

婚前蜜月

除遭航空公司抽水踢爆二人早已訂婚,二人微博亦有晒今次在新西蘭的甜蜜合照。

迪士尼慶生

王祖藍排除萬難終娶到女神,周二( 25日),本刊獨家直擊王祖藍、李亞男及兩家人到迪士尼試菜,並順道慶祝李 30歲生日。當晚眾人被安排到 VIP區進餐,餐廳高層更特別安排了侍應輪流「傍住」服侍,眾人當晚亦順道為婚宴部分菜式試菜。知情人士透露:「嗰晚餐廳阿頭好緊張,係咁提住啲員工要整靚啲碟餸,話佢哋係上賓,仲不斷俾啲新菜佢哋試,因為王生同我哋 marketing嗰邊阿頭好熟,驚得失佢哋上頭會責怪落嚟。」

當晚眾人只試了鴻運花膠湯和原隻菜膽鮑魚等菜式。記者發現待嫁的李亞男心情甚佳,雖然冇化妝,但不時咧嘴大笑。用餐約兩小時,王祖藍與李亞男各自駕車載家人離開,再返回大埔愛巢繼續聚天倫。

人窮志不窮,人矮至緊要有計,五呎三吋王祖藍成功攀登高妹李亞男,難得長短腳終於開花結果,就算求婚騷被指造假,但點都要講句:「恭喜晒」!

晒百萬「慳啲啦」新車

王祖藍近年在影、視兩邊均吃得開,賺到盤滿缽滿的他,上月換了一架價值百萬的美國品牌 TESLA電動車,車牌更套用他在《福祿壽》節目的角色名「 HANDELA(譯音:慳啲啦)」,認真搞鬼!

購千四萬獨立屋

王祖藍今年豪擲千四萬買大埔雅景花園獨立屋,作為婚後與李亞男的愛巢。大屋裝修近十個月到近日仍未完工。

笑準老婆鱷魚頭

王祖藍雖然在 talk騷經常自嘲襯唔起老婆,但轉頭把口唔收嘅佢亦乘機笑老婆鱷魚頭老襯底,家事通通唔曉,要媽咪代勞,剛出道時更用 A貨手袋。

2.15豪擺二百萬婚禮

王祖藍和李亞男鐵定在明年 2.15在香港迪士尼樂園擺酒。本周二( 25日),王祖藍出席活動時透露婚禮細節:「依家籌備緊,情人節 2.14會喺九龍城一間容納到 4,000人嘅教會行禮。第二日就會喺迪士尼擺酒,其實酒席都係上個月先着手去搞,依家連帖都未 design。」祖藍雖然猛話上個月先 book酒席,但大家都知酒席起碼一年前要 book定啦,仲要情人節喺迪士尼喎,真係講都冇人信。

在圈中人面甚廣的王祖藍,講明會豪擺 60幾圍酒席,大宴親朋,據知他揀選的「稀世寶鑽婚禮」套餐,每圍接近 2萬,計埋酒水和場地布置等, 200萬絕對冇走雞。

一世人結婚梗係要豪一次,王祖藍最後扑槌揀選最貴套餐,有黑松露,有鮑魚,每圍盛惠 2萬蚊。

九龍城浸信會樓高兩層,會堂可容納 4,000人,早前李亞男亦在此處做見證分享,有指明年王李二人就在這裏行禮。

2年掘千萬人仔

識搵錢,梗係搵人仔。

王祖藍之所以忽然富貴,全賴 12年開始北上掘金。據知他在香港竄紅後,湖南衞視便開始邀他任節目《百變大咖秀》評判兼表演嘉賓。

因扮嘢技術出神入化,在內地紅爆,由當初收 5萬人仔一集酬勞,升呢為依家 35萬, 2年便掘千萬人仔。

《百變大咖秀》葫蘆娃成名

最初祖藍只被邀演出一集,但因反應好被加碼,其中他扮內地神級騎呢卡通人物葫蘆娃爆紅,微博粉絲激增至逾百萬。

《 Running Man》爆紅

韓國真人騷節目《 Running Man》被改編成內地版《奔跑吧,兄弟》,同樣大受歡迎。節目令祖藍人氣持續高企。

拍拖上處女號

除了北上賺錢,王、李二人更孖實𢱑銀。今年 4月,麗星郵輪處女星號重臨香港試坐,據知二人當日便輕易賺了 15萬酬勞。



鍾意就快D Share啦!