熱爆娛樂: [壹週刊 - 1285] 同居飛鵝山　崔建邦溝掂 18歲𡃁模　唐詩詠照上門崔建邦,唐詩詠,M1,

2014年10月23日星期四

[壹週刊 - 1285] 同居飛鵝山　崔建邦溝掂 18歲𡃁模　唐詩詠照上門崔建邦,唐詩詠,M1,

雖然崔建邦和新女友於飛鵝山同居，但上週三（十月十五日），本刊發現唐詩詠帶同愛貓，駕車離開崔建邦的住所，可見二人仍關係密切。

探熱針

同居飛鵝山　崔建邦溝掂 18歲𡃁模　唐詩詠照上門

唔靚仔，但溝女永冇失手的崔建邦，最新獵物，有來自廣州的十八歲𡃁模陳嘉莉（ Kelly），二人更火速於飛鵝山同居。至於跟他翻撻無限次的唐詩詠，完全當崔建邦新女無到，甚至自出自入二人愛巢，當正自己先係女主人。

一撻即着

係男人都鍾意嫩口𡃁妹，難怪三十五歲的崔建邦，第一眼見到 Kelly，去馬！

「佢兩個夜蒲時識， Kelly知 Amigo（崔建邦）係藝人，對佢特別熱情，嗰晚兩個不停咬耳仔， Amigo直頭攬住 Kelly，完全睇唔出係初相識。到第二日， Kelly主動 WhatsApp佢，話咁快就撻着喺埋一齊。」知情人說。

現年十八歲的 Kelly去年由廣州來港，因樣靚身材正，簽約成為 Mandy Lieu師妹。

「 Kelly覺得自己好索，自認係翻版吳千語，成日話要嚟香港搵佢個『林峯』，林峯就搵唔到喇， Amigo都照殺。佢本來住喺親戚屋企，但識咗 Amigo唔夠兩個月，就搬去人哋度住。早排佢哋慶祝拍拖三個月， Amigo下廚、送花同佢慶祝，仲將食物砌成心形， Kelly冧到喺 Instagram晒命。」知情人說。

崔建邦撻着十八歲的 Mandy Lieu師妹 Kelly，日前二人去銅鑼灣拍拖，崔建邦全程保持距離。

唐詩詠與崔建邦相戀以來，男方多次被踢爆偷食，但至今唐詩詠仍堅稱他對自己很好。

本週一（二十日），崔建邦坐的士離開飛鵝山，返回無綫

開工。

男方縮骨

崔建邦知道被踢爆同居後，竟叫 Kelly暫時搬去灣仔，本週一（二十日）她在 Instagram上載素顏愁樣，表示好唔開心。

Kelly去年由廣州來港發展，過去一年拍了約十個電視廣告，成績不錯。

拍拖扮唔識

Kelly在港朋友不多，平日多數留在崔建邦的飛鵝山屋企玩煮飯仔，間中陪男友去大浪灣享受陽光與海灘，比怕曬的唐詩詠跟崔建邦更合拍。

為保密戀情，日前兩個到銅鑼灣拍拖，崔建邦刻意同女友保持距離，更提高警覺不時四處張望。而一直殿後的 Kelly只能摩打腳跟到實，見她不斷從後跟男友說話，但崔建邦卻十問九唔應。

崔建邦開設製作公司，主力幫人搞公司活動，有時會找唐詩詠做司儀，有錢齊齊搵。

Kelly早前跟梁烈唯一起拍廣告。

Kelly青春無敵，有樣有身材，崔建邦非常識食。

Kelly是 Mandy Lieu師妹，她希望像 Mandy一樣進軍影圈。

崔建邦事業翻生，近期跟汪明荃一起主持清談節目，再度得寵。

自出自入

以為崔建邦跟唐詩詠的關係終於成為「過去式」，但上週三（十月十五日）下午，本刊卻發現她帶同愛貓，駕車離開崔建邦的住所。

壹：壹週刊　唐：唐詩詠

壹：頭先係咪去搵崔建邦？

唐：總之我去湊番佢（貓貓）。

壹：崔建邦同新女友 Kelly一齊住，你識唔識佢？

唐：唔識呀，我今日淨係負責湊佢（貓），我未見過佢女友。

據知二人已正式結束情侶關係，並協議共同撫養愛貓「銀仔」。「之前 Natalie（唐詩詠）俾人影過揸車接 Amigo去街，其實係 Amigo冇錢帶銀仔睇醫生，所以接埋佢哋，順便埋診所張單。銀仔係佢哋拍拖時一齊養，邊個得閒就邊個照顧。以前 Natalie負責銀仔生活費，但近期 Amigo間製作公司生意好咗，有本事由西貢村屋搬去飛鵝山，而家 Amigo有適合嘅工作都會預埋 Natalie，兩個關係好好。」

由情人變知己，早前唐詩詠接受訪問，大方公開與崔建邦的關係。「我哋之間經歷咗好多，當中有好多嘢令我哋再次走埋一齊。發現第三者當然有嬲過、喊過，（點解可以接受男友有第三者？）一言難盡，過去咗就由佢過去，佢對我其實好好，最終我哋選擇以朋友關係相處亦係一件好事。」