掃呢頁CODE去手機

2014年8月13日 星期三

[FACE 377] 公主到 公主癌復發 《沒女》 Toby前傳 姣樣大公開 沒女,梁靖琪,Toby,MF,





今年 24歲嘅 Toby, 2年前將扮 model靚相放上 fb同人分享,大 S pose攞你命,成個肥美版 G.E.M.咁。網上圖片

真面目

公主到 公主癌復發 《沒女》 Toby前傳 姣樣大公開

點解話大台冇得救?一個節目已經說明全部。叫你生性啲學下強國、台灣綜藝節目嘅創意同製作,好嘢冇你份,疑似造假都預咗,濫情狂落味精催淚有咁慘得咁慘先最難頂。改造成功?認真你就輸了!

話說今週講到「公主癌」 Toby轉死性,同奶奶抱頭痛哭完又服侍老公,原來又係做戲咁做! Toby唔只公主病冇好過,仲大膽到同編導岑應吵大鑊要求罷拍。週一佢仲唔認為自己有公主病。「如果令一個男人錫自己多啲,咁我唔知點定義喇!」









《沒女》 Toby家陣係典型肥師奶,但其實佢都少女過,愛化妝愛自拍更會扮 model影龍友相,難怪冧到老公咁聽話。但係 Toby話到明係「公主癌」唔係「公主病」,邊有咁易醫?《沒女》 Toby最後一集改造成功,呃到幾多觀眾未有統計,不過肯定呃唔到自己又呃唔到編導岑應,節目都仲做緊,已經聽聞佢在家已舊病復發,在外亦小事化大。

被標籤公主癌, Toby話:「唔覺自己有問題!」表面上改造成功,不過有讀者報料上週初 Toby過大海遊玩時又發揮公主本性為瑣事嘈到拆天,更被乘客拍埋片,隨時流出市面。電視畫面

於節目中鬧老公又鬧奶奶, Toby話:「我只係想令身邊男人更加錫我啫!」電視畫面

「捧到我成個公主咁!」

話說參賽期間贊助商向 Toby提供免費美容修身療程, Toby就當正自己俾全費做大客,預約唔到即發難,鬧勻美容院全場職員,再返無綫鬧爆監製,威脅退出。好彩你惡,岑應都唔弱,叫 Toby俾番啲療程錢就隨時可以走人,結果 Toby梗係乖乖留低

週一( 11日), Toby向本刊承認想退出,但竟然唔覺自己有公主病,「我只係令身邊男人更加錫我,捧到我成個公主咁啫,唔一定係公主病嘅!」對於退出,她說:「退出嘅主要原因係我唔想改變自己囉!我覺得自己冇問題,呢個就係最大嘅問題!我有公司贊助我個瘦身療程,如果我退出就要支付番我成個療程費用,唔關 TVB事,佢哋冇收過我一分一毫!」你都覺得自己冇問題,咁成個節目咪即係搵嚟搞?

呢個世界有樣嘢叫物以類聚,其他嘢可能造假,但班沒女原來堅係友誼萬歲,節目做完都約埋一齊去唱 K。

婚前婚後, Toby磅數其實差冇幾,不過對住鏡頭仲識笑、再加埋試穿套婚紗開超低 V,即時加晒分。網上圖片

難怪巴打個個都話中伏,皆因 Toby婚前自拍深明「角度的重要性」,可惜呃得一時呃唔到一世。網上圖片

接受訪問 Toby話老公當自己大過天、百般遷就仲任自己虐待,點睇都似係曬命多過似慚愧。網上圖片

Toby話同老爺奶奶關係變差係因為產後抑鬱,哦,產後抑鬱都俾大台擺上枱就係大台唔啱喇!網上圖片

《沒女》好討厭

一講冇樣冇身材嘅沒女,好多港人好易聯想到魯芬 BB,其實 BB不知幾正面幾有自信絕對不是沒女嚟:「電視一做沒女,唔只一間傳媒搵過我,仲諗住我有舞台劇上,幫手宣傳,原來想我講沒女。咩沒女呀!我係有女,樣樣都有齊,呢個節目唔關我事,我鬧都唔想鬧佢、唔想幫佢搞宣傳!」

魯芬 BB:我係有女

電視畫面


袁彌明:抹黑港人
冇睇大台好多年,但係袁彌明都對《沒女》略有所聞,一提就有火:「唔該無綫唔好再抹黑香港女仔!香港女仔不知幾好!佢哋啲電視劇同綜藝都最興抹黑香港人,得閒搞個宅男、得閒又嚟個沒女,扮晒講社會議題其實係抹黑。見人有真人騷佢又真人騷,佢抄都抄得唔湯唔水,抄到做晒媒!」

大隻仔教練係女人

大台真人騷除咗班「沒女」個個有特色外,今輯連班導師都好夠話題,其中人稱鴨仔的健身教練王君萍, man爆外型加肌肉似足男人,單睇外形已經令人有好多疑問!

睇呢張相,你會覺得少咗啲女性應該有嘅嘢,同佢少女時代比較吓,真係唔只女大 18變咁簡單!網上圖片

男人要練腹肌練人魚線,鴨仔都練到,嗰排朱古力實激死張家輝,不過做乜唔拉高 2吋呢?網上圖片

網上圖片

同性伴侶蜜遊


網上圖片
雖然自稱鍾意男性,但喺佢社交網站又發現有一位同性伴侶經常孖住甜蜜外遊,好可疑!


網上圖片
自稱每日健身時間長達 15小時嘅鴨仔, 03年已經代表香港贏過亞洲健身錦標賽冠軍,成身造型除咗細碼比堅尼泳衣同化咗妝,基本上同男性冇分別,不過原來佢得 5呎 2。

健身教練鴨仔(王君萍)坐擁大量明星富貴客如何超雲、張敬軒、 G.E.M.等,在行內算好出名,最爆係成個外形跟男性冇乜分別,就咁睇電視你會覺得佢似男多過似女。擁有一身勁過男人的完美爆肌,鴨仔亦曾承認說:「有啲女仔原來一直都以為我係男仔!」鴨仔仲話自己試過入女廁被人問性別「要拎張身份證畀廁所阿嬸睇!」,不過她堅持自己 100%鍾意男人,對於同性追求者,鴨仔話:「我會話畀佢哋知,我係百分百鍾意男人!」個女友仲 Man過自己,呢種感覺真係好詭異。

鴨仔多明星客,除咗富貴超雲外,估唔到連嬌滴滴嘅 G.E.M.都係佢客仔。網上圖片

網上圖片

上週五( 8日)鴨仔出場幫 Toby減肥,隔住件衫都 feel到佢啲肌肉。電視畫面


鍾意就快D Share啦!