掃呢頁CODE去手機

2013年12月25日 星期三

[FACE 344] 英雄有淚 收 chok樣救火 謝霆鋒任摑喪喊 霆鋒,謝霆鋒,MF,




今次收起 chok樣唔扮型的謝霆鋒,戲中救唔到安志傑後非常內疚,更忍唔住流馬尿。

真面目

英雄有淚 收 chok樣救火 謝霆鋒任摑喪喊

傳出撻著細 9年的 Janice Man,轉個頭謝霆鋒又同前妻張栢芝一家大細遊新加坡。

否認緋聞兼冇復合打算, 33歲霆鋒繼續專心工作,下週四( 2日)上映的《救火英雄》,由霆鋒孭重飛做消防員,日日拎住幾十磅器材跑上跑落,又要吸濃煙拍攝,辛苦到嗌曬救命。動作場面搵命博,文戲都唔好受,其中一場講冼色麗怪霆鋒冇盡力救人,一時扯火兜巴星,堅打摑足 5 take先收工,打到霆鋒都忍唔住流眼淚!痛就事小,整親個靚仔樣先大件事呀!

霆鋒今年電影產量唔多,只拍了《救火英雄》和《澳門風雲》,除了收片酬外,又以自己公司「朝霆」接埋《救》片的後期,幕前幕後擸曬嚟做。

短暫失聰

收得兩份錢,霆鋒當然交足功課。一向唔錫身的霆鋒,今次《救》片勁多內心戲,演一個內斂消防員,暫時收起 chok爆樣,加上在戲中要徒手爬高樓、又要應付大量爆破場面,據知拍完其中一幕近距離爆炸戲時,霆鋒的左耳突然短暫失聰,好在現場有醫生幫手,但最後霆鋒都要送去醫院診治。

不過,霆鋒非常忍得,拍火場戲分時個個演員要戴面罩,但霆鋒唔想又戴又除嘥時間,寧願閉氣繼續拍,「我有潛水牌,肺活量比較好,喺火場入面我可以閉氣閉耐啲!」

冼色麗出盡力狂摑霆鋒,佢話打到對方面腫之餘,自己隻手都超痛!

累好兄弟慘死被摑後,霆鋒又收到女友電話嗌分手,雙重打擊下,攬實安志傑囝囝痛哭。

安志傑同霆鋒本來係好兄弟,可惜安為上位竟然出賣兄弟,最後去火場搵霆鋒交涉時失足墮樓死。

霆鋒同導演郭子健(右) 02年首次合作拍恐怖片《 2002》,今次再度合作已經好有默契。

摑到面紅

高難度動作唔用替身,霆鋒拍攝一場被掌摑戲時,亦堅持要對方真打咪手軟,連「打手」冼色麗都讚 man,冼色麗說︰「嗰場戲講霆鋒救唔到我老公,亦都係佢上司嘅安志傑,我嬲得滯一把打埋去!其實拍之前我哋完全唔識,所以我都唔敢真打,但霆鋒覺得就住就住唔夠逼真,叫我出力摑,足足摑咗 5個 take先收貨。霆鋒塊面同耳仔紅曬,樂仔同其他人喺側邊笑到收唔到聲,反而霆鋒仲識笑笑口,搵水洗個面就拍下一場!」

雖然唔使俾人摑 14巴,但出名 chok嘅霆鋒,今次好大犧牲㗎喇!

呢場高難度拯救行動,霆鋒同任達華要用繩合力拯救譚耀文,望落好似好簡單,其實拍攝當日有退休消防隊目駐場做顧問。

譚耀文飾演電子公司高層,佢堅持唔畀消防員關閉發電廠的天然氣管,令火災一發不可收拾。

戲中發電廠係實景搭建,導演堅持連地基都起埋,確保場景受得住多場爆破戲。

電影主題曲〈愛最大〉由霆鋒親自作曲兼主唱,國語版 rap由「快樂男聲」歐豪負責。早前歐豪獲得亞軍,係由評判之一的霆鋒力撐揀出嚟。

邊個最搶鏡?

孭戲 謝霆鋒

飾演高級消防隊長,戲分最重,由頭帶到尾,主線講佢同樂仔、安志傑的兄弟情。

感人 餘文樂

飾演消防隊長,戲分僅次於霆鋒。戲中做單親爸爸,其中一幕用消防車送仔返學戲幾感人。

慘死 任達華

飾演總隊目,戲分同胡軍差不多,後段壯烈犧牲自己救全隊人,都睇到眼濕濕。

鬥 fit 胡軍

飾演由內地來港的消防員,兒子在火場慘死,經常同任達華鬥 fit,仲要鬥跑樓梯。

奸仔 安志傑

飾演香港史上最年輕助理消防區長,只想上位唔鍾意救火,為人陰險,戲分少不過幾搶鏡。



鍾意就快D Share啦!